Johanesa 4
4
Jesus nomukadi goMusamaliya
1Hompa apa ga dimbwilire asi, Vafalisayi kuna zuvhu Jesus, omu a koko oku ta kuhu varongwa wovanzi kupita vaJohanesa, 2nampili ngomu nga dili kukuhwa mwene Jesus, nye varongwa vendi yiwo ava kuhu — 3ta sigi Judeya, makura ta tengura hena koGalireya. 4Nye age kugenda zaSamaliya yiko tupu.
5Ta wiza nye mositata simwe saSamaliya, edina lyaso yiso Sikara, popepi nomaliro aga ga pere Jakopo munwendi Josefa. 6Ako ndjombo zaJakopo za kere ko. Jesus eyi ga rorokere rugendo, makura ta ka hingira pondjombo. Ezuva alyo poyiha yomutwekatji.
7Makura tapa wiza mukadi gumwe goMusamaliya, a ya vhete mema. Jesus ta mu tantere asi: “Kwafeni nge ko mema ni nwe.” 8Yeeyi varongwa vendi kwa zire kositata, va ka rande nondya. 9Mukadi goMusamaliya ta limburura asi: “One amesi mu Vajuda, ame ni Musamaliya, ngapi omu muna kuhundira nge mema?” Yeeyi Vajuda kapi ava ligendere noVasamaliya. 10Jesus ta limburura asi: “Nganosi kuna diva uhwi waKarunga nogu ana kumutantera asi, ‘Kwafeni nge mema,’ ngano none muna mu hundire, ano age ngano ana mu pe mema gomwenyo.” 11Mukadi ta mu tantere asi: “Tate, one kutupu sipako sokuvhetesa, azo ndjombo hena nde. Kupi nomu ga gwana gene mema gomwenyo? 12Opo muna kara, one si mu vanene nye kupita zinyakurwetu Jakopo, ogu ga tu pa ezi ndjombo, omu nga nu mwene novana vendi noyimuna yendi?” 13Jesus ta mu limburura asi: “Nkenye ogu a nu mema aga, kufa hena enota. 14Nye ogu gokunwa mema aga gokumupa ame, narumwe si hena kufa enota dogoro narunye. Yeeyi mema gokumupa ame, kukara mwendi runone romema gokuvhira mwenyo gwanarunye.” 15Mukadi ta mu tantere asi: “Tate, kwafeni nge nye mema ogo no, ani dire hena kufa enota, ame ani dire hena kuyavheta.” 16Jesus ta mu tantere asi: “Komu zi si mu ka zigide mugara gweni, mu wize oku.” 17Mukadi ta limburura asi: “Ame kapi na paka mugara.” Jesus ta mu tantere asi: “Hawe yimo, douhunga muna tanta asi, ‘Kapi na paka mugara.’ 18Yeeyi one vagara vatano mwa kere nawo, nye ogu muna kara nendi ntaantani, kapisi mugara gweni, opo monzira muna uyunga.” 19Mukadi ta mu tantere asi: “Tate, nina mu mono nye asi, one mu vaporofete. 20Ozinyakurwetu ngava kanderere kondundu ezi, nye one kutanta asi, moJerusarema yimo mevega lyokukanderera.” 21Jesus ta mu tantere asi: “One nane, pureni nge kweyi asi, ngasi wiza siruwo, esi ngomu dira kukanderera Tate kondundu ezi ndi moJerusarema. 22One Vasamaliya kutongamena eyi mwa dira kudiva, nye ose Vajuda kutongamena eyi twa diva, yeeyi ezoworo kwa tunda moVajuda. 23Nye siruwo ngasi wiza, nasene nare sina wiza, apa ngava kanderere vakandereli wosili Tate moMpepo nomousili, yeeyi vakandereli vangoso yiwo va hara oTate. 24Karunga Mpepo, ano wokumukanderera ava kanderere moMpepo nomousili.”
25Mukadi ta mu tantere asi: “Na yi diva asi, Mesiyasa ogu ava tumbura asi Kristusa, nga wiza. Apa nga wiza age nga ya tu dimbwira nayinye.” 26Jesus ta mu tantere asi: “Ani nyame ogu nina kuuyunga neni.”
27Posiruwo sooso varongwa vendi yipo va wizire. Awo kwa tetukire pokuyamugwana ta uyunga nomukadi. Nye nagumwe si ga mu tanterere asi: “Yinke ono hara?” ndi asi: “Yinke ono kuuyungira nendi?”
28Mukadi makura ta sigi kavaza kendi a ze kositata, makura ta ka tantera vantu asi: 29“Wizeni mu ka tare mugara, ogu ana tantere nge nayinye eyi na rugana. Kapi na kara yige Kristusa nampo?” 30Awo makura tava tundu mo mositata, va ze kwaJesus.
Etezo novatezi
31Posiruwo nye oso varongwa vaJesus kwa mu tumangedere asi: “Murongi, lyeni tanko!” 32Nye age ta va tantere asi: “Ame kuna kara nonondya edi mwa dira kudiva.” 33Varongwa tava lipura‐pura asi: “Mpange pweli ogu ana mu retere nondya?” 34Jesus ta va tantere asi: “Nondya dange dedi dokurugana mpango zogu ga tuma nge nedi dokusikisa mo sirugana sendi.
35“One amesi kuna kutanta asi, ‘Simpe nomwedi ne ko, ntani ngapa kara etezo.’ Ame tani mu tantere asi: kankukeni, mu tare mapya omu gana fire etezo. 36Mutezi kuna kutambura mfuto, makura ta pongaike nombuto komwenyo gwanarunye, asi mukuni nomutezi va hafe kumwe. 37Apa nonkango dina siki mo edi adi tanta asi, gumwe kukuna, mukwawo ta teza. 38Ame kwa mu tumina asi, mu ka teze apa mwa dira kurugana. Nawopeke yiwo va rugana, one yiyo muna kulipanda kuteza eyi va rugana.”
Vasamaliya tava pura
39Vasamaliya wovanzi wositata oso kwa pulire Jesus, morwanonkango domukadi edi ga sansekere asi, “Age kuna tantere nge nayinye eyi na rugana.” 40Ano Vasamaliya apa va wizire kwendi, tava mu hundire asi a kare tanko pwawo. Jesus makura ta kara po mazuva gavali.
41Ano wovanzi ko nye unene va pulilire morwanonkango dendi. 42Awo makura tava tantere mukadi asi: “Kapisi morwanonkango doge hena tuna pulire, yeeyi nyose vene tuna lizuvhire ko yiyo tuna diva asi, nani yige sili Muzowoli gouzuni.”
Jesus ta zi koGalireya
43Eyi pwa pita ogo mazuva gavali, Jesus makura ta tundu po, a ze koGalireya. 44Yeeyi Jesus mwene kwa tente asi, muporofete kapi a kara nekuto mosirongo sawo. 45Ano apa ga wizire moGalireya, Vagalireya tava mu tambura, yeeyi awo kwa mwene nayinye eyi ga rugene moJerusarema posipito soPaska, morwa nawo yiko va zire.
Everuro lyomuna gerenga
46Jesus kwa zire hena koKana zomoGalireya, oku ga situnukisire mema ga kare vhinyu. Ako kwa kere erenga eli lyomuna gomugara ogu ga verere moKaperenaumu. 47Age apa ga zuvhire asi Jesus ana tundu ko koJudeya, a wize moGalireya, makura ta zi kwendi, ta ka mu hundira asi, a ze a ka verure munwendi, yeeyi mokufa ga kererere. 48Jesus ta mu tantere asi: “One nsene mu dira kumona yidiviso noyitetu, one nokupura si.” 49Erenga tali limburura asi: “Tate, ya tu ya zeni, paapa ana dili kufa munwange.” 50Jesus ta mu tantere asi: “Zende, munoge na paruka.” Mugara ta pura nonkango daJesus, makura ta ka za. 51Nye age simpe monzira, a ze kembo, vantu vendi awo tava mu simbagwire, tava tanta asi: “Munoge muzuni.” 52Age makura ta va pura siruwo esi ka varekere kuveruka. Awo tava mu tantere asi: “Nkera, potundi zopomuhowo yipo ka u mu sigire uvera wokupyapyara.” 53Ano guhwe ta diworoka asi, yizo tundi zoozo ka mu tanterere Jesus asi, “Munoge na paruka.” Age makura ta pura nava vembo lyendi navenye.
54Esi yiso sidiviso sauvali esi ga ruganene Jesus pokutunda kwendi moJudeya, a wize moGalireya.
Currently Selected:
Johanesa 4: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
