JEREMIYA 9
9
1Ame kuna hara asi mutwe gwange
ngano gu kare etope lyomema
nomeho gange runone romahodi,
ngano tani kugu mutenya nomasiku,
morwavantu vange ava vana
dipaga. 2Ame kuna hara ngano
ni kare mombururundu,
ni vhure kulipora kovantu vange.
Navenye vahalimburukwi
mbunga zovanayimpempa.
3Awo narunye kusanseka yimpempa;
uhanausili yiwo una kupangera
sirongo pevega lyousili.
Hompa ta tanta asi:
“Vantu vange kurugana‐rugana
yininke yoyidona,
kapi va diva nge asi nyame
Karunga gwawo.”
4Nkenye ogu a rungararere mukwawo,
pa ha kara gokuhuguvara
mumbya ndi mukurwa;
yeeyi nkenye mumbya
ndi mukurwa munayimpempa
ngwendi Jakopo,
ano nkenye ogu kukumbagera mukwawo.
5-6Navenye kupukisa vakwaawo,
nagumwe si gokuuyunga usili;
va rongesa maraka gawo yimpempa,
kapi ava hageke kuzona.
Awo kukwamesa ko kurugana
ukorokotji noyirugana yoyimpempa.
Hompa kuna kutanta asi, vantu
vendi va mu zumba.
7Yipo nye ana kuuyungira Hompa
Munankondo nadinye asi:
“Ngani hemuna vantu
ngwendi sivera, ni va tare.
Vantu vange va rugana udona —
makura ngano ni va rugane
ngapi nye?
8Maraka gawo kwa fana yikutji yoyidona;
awo kuuyunga nkenye apa yimpempa.
Nkenye ogu kuuyungira
mumaparambo gwendi dombili,
nye nani mousili siraha
ana kumutega.
9Makura ni dire nye kuvafutisa
morweyi ndi?
Muhoko ngogu makura ni dire
nye kugurugwida kuwoko ndi?
Ame Hompa, nyame na yi uyunga.”
10Ame kwa tanta asi:
“Ngani kwenaukira nondundu
tani lilire maliro goyimuna,
morwa ya kukuta, nagumwe si
hena ogu a gendi ko.
Mazwi gonongombe kapi gana
kuzuvhika hena;
yidira noyikorama ya duka ya za.”
11 Hompa kuna kutanta asi:
“Jerusarema ngani mu ninka
a kare ndambo zomarunda,
ngali kara evega lyovambanze;
yitata yaJuda ngayi kara mburundu,
evega lyokudira kutunga vantu.”
12Ame tani pura asi: “Hompa sirongo eyi sina kerere mapuku, si kukute ngwendi mburundu, mu dire kugenda vantu, nani yinke? Yilye munongo gokuyikwata egano eyi? Ogu wa yi singwenena asi nga yi tantere vakwawo yilye?”
13 Hompa ta limburura asi: “Eyi kwa horokera morwa vantu vange va zumba nerongo eli na va pa. Kapi va limburukwa nge ndi asi va rugane eyi na va tantera. 14Makura yiyo va runda nomutwe va tongamene vakarunga woyimpempa moomu va va ronga ozinyakurwawo. 15Ano ngesi purakena nye eyi ngani rugana ame Hompa Munankondo nadinye, Karunga gwaIsraeli: Ngani pa vantu vange yimeno youruru va lye nouhungu va nwe. 16Ngani va haraganesera monomuhoko edi va dira kuzuvha rumwe nozinyakurwawo si vaava, ngani va tumina nombunga dovakwayita dogoro ngadi va mane po nu.”
Vajerusarema tava kugu ekwafo
17 Hompa Munakondo nadinye
ta tanta asi:
“Gazareni eyi yina kuhorauka!
Zigideni valili va wize,
novakadi ava ava dimbi
nonsumo domalirankali.”
18Vantu tava tanta asi:
“Va tantereni va genderere ko
va ya tu dimbire rusumo romalirankali,
dogoro meho getu ga zure mahodi,
ano nonkope detu di wore kokulira.”
19Purakeneni kezwi lyonkugo
moSiyoni asi:
“Tuna hanauka po!
Tuna swaukilire!
Ngesi tatu zumbu nye sirongo setu;
mambo getu gana zunguruka.”
20Ame tani tanta asi: “Purakeneni
kwaHompa one vakadi,
pakereni mbili nonkango dendi.
Rongeni vana veni wovakadi kulira,
novakweneni rusumo romalirankali.
21Nomfa dina hwilire di pitire momakende
dina hwilire monombara detu;
dina tetagura vanona mononzira
novadinkatugara pomarandesero.
22Yimpu kuna kulihana napenye,
ngwendi nondambo doruhoho momapya,
ngwendi mahangu vana teza tupu
va ga sige ngorooro vatezi,
nye wokugapongaika kutupu.
Eyi yiyo ana tantere nge Hompa
asi ni yi sanseke.”
23 Hompa kuna kutanta asi:
“Vanongo va ha litangera
unongo wawo,
ndi vanankondo unankondo wawo,
ndi vanangawo emona lyawo.
24Ogu ana hara kulitanga,
a litangere nondunge dokudiva nge,
morwa eharo lyange lyanarunye,
hena ame kurugana eyi ya vyuka
ya hungama.
Eyi yiyo ayi hafesa nge.
Ame Hompa, nyame na yi uyunga.”
25-26 Hompa kuna kutanta asi: “Siruwo tasi wiza, esi ngani futisa vantu vaEgipite naJuda naEdomu naAmoni naMowaba nava womomburundu, ava va teta nohuki dawo. Vantu navenye ava kwa va rugana yovamba, nye kapi ava sikisa mo egwanekero eli eyi lya kerera po. Patupu povantu ava ndi poVaisraeli ogu ga sikisa mo egwanekero lyange.”
Currently Selected:
JEREMIYA 9: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
