JEREMIYA 8
8
1“Ano posiruwo oso, yisupa yohompa neyi yomarenga gomakurona gaJuda rambanga ko noyisupa yovapristeli neyi yovaporofete neyi yovantu ava va tunga moJerusarema, ngava yi vhumbura monontoko, 2mevega lyokuyipongaika va yi vhumbike, yisupa yawo ngayi fana ngwendi mboresa ezi zina rundama pevhu. Ayo ngava yi zara komeho zezuva nokwedi nonombungururu eyi va hara vantu ava oku tava kerere, eyi ava pura egano tava yi tongamene. 3Vantu womuhoko gomudona ava va hupa po, ava va tunga momavega aga na va haraganesera, ngava lihorowera po nomfa kupitakana kukara nomwenyo. Ame Hompa Munakondo nadinye, nyame na kuyitanta.”
Nzo nefutiso
4 Hompa kwa tantera nge ni tantere vantu vendi asi: “Nsene gumwe ana liganda, nani nokuvhura si a pinduke po? Nsene gumwe ana zumbanesa nzira, nani nokuvhura si a tengure? 5One vantu vange, yinke nye omu tundire po pwange, one kapi omu tengura hena nampili nakauke? One kukakatera kovakarunga veni woyimpempa tomu nyoka kutengwira kwange. 6Ame kwa purakena nawa‐nawa, nye kapi mwa uyunga usili. Ano nagumwe si gomumweni ga zuvhira udinikarunga wendi kukora, nagumwe si ogu ga pura asi: ‘Yinke eyi na rugana yokupuka ngesi?’ Nkenye ogu kuna kulivyukira nonzira zendi, ngwendi nkambe zina kugenderera moyita. 7NaSamunkoma googu ga diva ruveze rokutengura, nonkutji noyisampamema nomangwangali ya diva ruveze rwayo rokudiruka. Nye one vantu vange kapi mwa diva noveta edi ani mu pangeresa. 8Omu nomu vhura kuuyunga asi one vanongo mwa diva noveta dange ngapi nye? Tareni, noveta vana di rundurura nonopena dovatjangi woyimpempa. 9Vanandunge veni vana va fisa nomuga, awo vana va piyaganeke vana va lyatanga. Awo kwa nyoka nonkango dange, unongo musinke nye ou vana kara nawo ntaantani? 10Ano mapya gawo tani ga gava kovantu vapeke, novakadi vawo kovagara vapeke. Nkenye ogu a kare mukurona ndi munona kukambadara kugwana yimaliva mouhanasili. Vaporofete novapristeli nawo kukumbagera vantu. 11Awo kurugana ngwendi vava tupu vana kutorokanya yironda yovantu vange. Awo kutanta asi: ‘Nayinye nawa tupu’ nampili nayinye kapi yina wapa. 12Vantu vange, nye mwa fa tupu nomuga, morwa mwa rugana yininke eyi yoyihuna ndi? Mpili kuna manga asi mu fe nomuga one; nokukisumuka kooku nelizuvho lyonomuga mwa ku diva one! Ano ngomu gwa, moomu va gwa vakweneni; apa ngani mu futisa yilyo nye ehagero lyeni ngali kara lyoolyo. Ame Hompa nyame nina kuyitanta.
13“Ame kuna hara kupongaika vantu vange, moomu a pongaike muntu muzangu gwendi, nye awo kwa fana ngwendi sindjembere sa pira mandjembere ndi sitji soukuzu sa pira ekuzu, noyihako yeeyi ya rembuka. Ame na pulisira vanayirongo, va va guse sirongo.”
14Vantu vaKarunga tava pura asi: “Yinke tuna hingilire simpe? Wizeni, tu zeni tu dukire koyitata yepopero tu ka fireni ko. Hompa Karunga gwetu kuna tu pangwire nomfa. Age kuna tu pe uhungu tu nwe, yeeyi twa zona kwendi. 15Ose kwa huguvarere mpora nosiruwo severuro, nye nayimwe si ya kwafa, udigu welike wa wiza po. 16Nonkore detu nare modili mositata saDana, kuna kuzuvha yipembo yononkambe dawo. Sirongo nasinye kuna kumenga, nsene tadi lilikida nonkambe dawo. Nonkore kuna wiza di ya hanagure po sirongo setu neyi nayinye ya kara mo, sitata setu novantu navenye ava va tunga mo.”
17 Hompa ta tanta asi: “Takameseni, ame tani tumu mazoka mokatji keni, mazoka gouhungu ga hana kumuhafesa, ngaga ya mu hume.”
Ruhodi rwaJeremiya kovantu vendi
18Ruhodi rwange nokuvhura si kuruverura,
ame kuna kukora nge komutjima.
19Purakeneni! Ame kuna kuzuvha
nkugo zovantu vange
mosirongo mudima.
“Nani, Hompa mutupu nye moSiyoni?
Ohompa vamo, nawo mutupu
mo ndi?”
Hompa, Mupangeli gwawo
ta limburura asi:
“Yinke mwa handukisira nge
pokukanderera vakarunga
veni woyimpempa,
mu twire nongoro vakarunga
veni wovanayirongo
ava va hana sirugana?”
20Vantu kuna kukuga asi:
“Kurombo kuna piti
netezo lina pu,
nye ose kapi vana tu parura.”
21Mutjima gwange guna teka po
yeeyi vantu vange vana teka po,
tani kwenauka yihuna yina
gwana nge.
22Nani, moGiliyata mutupu mo mutji?
Motupu mo nani nondokotora?
Yisinke vana dilire kuverura
vantu vange?
Currently Selected:
JEREMIYA 8: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
