JEREMIYA 7
7
Jeremiya ta udisa montembeli
1-3 Hompa kwa tumine nge kerungavero lyontembeli, oku ava zi vantu womoJuda va ka tongamene. Kwa tanterere nge ni sikame po ni divise eyi ga here kuvatantera. Hompa Munakondo nadinye, Karunga gwaIsraeli, eyi ana hara kuvatantera asi: “Rundurureni ukaro wononzira deni noyininke eyi omu rugana, makura ame ngani mu pulisira kutunga ngorooro omu. 4Hagekeni kuuyunga nonkango doyimpempa, eyi omu uyunga asi: ‘Ose katjakara ketu! Ezi ntembeli zaHompa, ezi ntembeli zaHompa, ezi ntembeli zaHompa! ’
5“Rundurureni ukaro wononzira deni noyininke eyi omu rugana. Kareni mousili momalikaro novakweneni. 6Hagekeni kuhepeka vanayirongo nononsigwe novafisavaya. Hagekeni kudipaga vantu ava va hana nonzo mosirongo esi. Hagekeni kutongamena vakarunga vapeke, yeeyi ngava ka mu zonagwisa po tupu. 7Nsene mu runduruka, ngano ngani mu siga, mu tunge mosirongo esi na pa ozinyakurweni si kare ugawo wawo wanarunye.
8“Tareni one kuna kuhuguvara nonkango doyimpempa. 9One kuvaka tomu dipaga tomu hondere, tomu uyunga yimpempa mokugana, tomu zambere Bara nokukanderera vakarunga ava mwa dilire kudiva nare. 10One kurugana yininke eyi na nyenga, tomu wiza mu sikame kosipara sange montembeli zange tomu tanta asi: ‘Ose katjakara ketu!’ 11One kugazara asi, ntembeli zange evango lyokuhoreka vanamahaka ndi? Ame nina mono eyi muna kurugana. 12Zendeni koSiro, evango lyomuhowo eli na horowere lyokutongamenena nge mu ka mone eyi na li ruganena morwanonzo dovantu vange Vaisraeli. 13Nyone mwa zona nonzo nadinye edi. Nye nampili ngoso, ame kumuuyungisa narunye, nye one tomu nyoka kudipurakena. Apa ani mu zigida, one kapi omu hara kulimburukwa. 14Ano eyi na ruganena Siro, yiyo ngani ruganena hena ezi ntembeli zange, ezi mwa tura konomutjima. Apa pevega eli na pere ozinyakurweni none, ngani rugana po moomu na rugene Siro. 15Ame ngani mu tjida ko kosipara sange moomu na tjida ko ekoro lyeni, mbunga zaIsraeli. Ame Hompa nyame nina kuyitanta.”
Kudira kulimburukwa kombunga
16 Hompa ta tanta asi: “Jeremiya, wa ha kandererera mbunga ezi. Wa ha kuga ndi asi o kanderere morwawo; wa ha likwambera nge, morwa kapi nani ku zuvha. 17Kapi ono kumona eyi vana kurugana moyitata yaJuda nomononzira daJerusarema ndi? 18Vanona kutjava yitare, vagara tava hwameke mundiro, ano vakadi tava duwu usura va kangere yikuki karunga gomukadi ogu ava tumbura asi Hompakadi gEguru. Awo kugava hena nzambo zovhinyu kovakarunga vapeke, asi va korese nge komutjima. 19Nye ame sili nyame nye vana kukoresa komutjima ndi? Hawe, vene vana kulirorora va liretere vene nomuga. 20Ano ame Hompa Mupangeli, ngani pimpira ehandu lyange lyenene kontembeli ezi. Ngani li pimpira kovantu nokoyinamwenyo nokoyitji kooku nokonombuto. Ehandu lyange ngali fana ngwendi mundiro gokudira kuvhura kudimisa.
21“Mbunga zange, nonzambo dimwe kudiswakerera nuunu posizambero, ano edi dimwe kwa di mu pulisira mu lye. Eyi na kutanta ko ame Hompa yokudilya nadinye. 22Ozinyakurweni kapi na va pere nompangera dokuhamena kononzambo deswakerero ndi nonzambo dapeke, apa na va gusire moEgipite. 23Ame kwa va pangerere asi va limburukwe kwange, asi ngani kare Karunga gwawo, ano awo va kare vantu vange. Ame kwa va tanterere asi ngava kare moomu nina kuvapangera, makura yininke ngayi va wape. 24Nye awo nokulimburukwa si ndi asi va yi pakere mbili. Makura tava rugana moomu dina kuvatantera nomutjima dawo dononkukutu donondona, makura tava yipa pevega lyokuwapa. 25Kutunda kezuva eli va tunda ozinyakurweni moEgipite dogoro naina ngesi, ame kumutuma?-?tumina vakereli vange vaporofete. 26Nye nagumwe si gokupurakena ndi asi a yi pakere mbili. Makura yiyo mwa runda nye mutwe unene, mu tangarare kupitakana ozinyakurweni.
27“Ano Jeremiya, nonkango nadinye edi ngo ka di tantera vantu vange, nye kapi ngava ka ku purakena; ngo va zigida, nye awo nakumbutu si. 28Ngo va tantera asi muhoko gwawo kapi agu limburukwa kwange, ame Hompa Karunga gwawo, hena asi kapi ava lirongere ko komafutiso gawo. Usili wa fa mo. Nampili kuuyunga kooku, kapi ava u uyunga.
Yirugana younzoni momuramba gwaHinomu
29“Lireni, vantu womoJerusarema;
kurureni ko nohuki deni, mu di
zugumine kwi.
Dimbeni rusumo romalirankali
kondungu zondundu,
morwa ame Hompa na handuka,
yiyo na nyenge vantu vange.
30“Mbunga zaJuda za rugana sininke sosidona. Vakarunga vawo woyimpempa ava na nyenga, kwa va tura montembeli zange, yiyo va zi nyateka. 31Momuramba gwaHinomu yimo va tunga sizambero esi ava tumbura asi Tofeti, va zamberere po momundiro vana vawo wovagara nava wovakadi. Ame kapi na yi va pangera eyi asi ava yi rugane — nokugazara kapi na yi gazara rumwe. 32Nye mazuva ngaga wiza, apa ngava dira kusitumbura hena asi Tofeti ndi asi muramba gwaHinomu, nye ngava gu tumbura asi muramba goMadipagero. Vantu yimo ngava va vhumbika, morwa kutupu evega lyokuvavhumbika. 33Yimpu ngayi kara nondya doyidira noyikorama, kutupu ogu nga yi tukuka. 34Sirongo ngasi kara mburundu. Marunkalinkali nomazwi goruhafo naga gepemburo lyoyipito yomakwareko, ngani ga hagesa moyitata yaJuda nomononzira daJerusarema.
Currently Selected:
JEREMIYA 7: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
