JEREMIYA 6
6
Jerusarema tadi mu kundurukida nonkore
1Mbunga zaMbenyameni, dukeni mu ka vande! Siukeni mo moJerusarema! Fudeni mbendo moTekoa mu pake po sidiviso somundiro moBete‐Hakeremu. Siponga nehanauko pepi yina kerere yi tunde koMuzogo. 2Sitata saSiyoni siwa, nye ngasi hanauka po; 3ohompa yipo ngava dika nokamba dawo kumwe novakwayita vawo. Ngava tomeka notenta dawo va kunduruke sitata, nkenye ogu nga dika kamba zendi paapa ana harere. 4Awo ngava tanta asi: “Liwapaikireni kurwisa Jerusarema! Kwateni nontondo di kore! Tatu ka rwa pomutwekatji!” Makura ntani ngava tanta asi: “Hai, tuna liranga, ezuva lina gomboka, nomundwire kuna kurepa. 5Natu ka rwa masiku; tatu ka hanagura po nohotepopero dositata.”
6 Hompa Munankondo nadinye yige ga pangera ohompa ava va tete yitji, va tunge nondambo dokukunduruka Jerusarema. Age kwa tanta asi: “Ame ngani futisa sitata esi, morwa sa zura ehepeko. 7Moomu tupu ali wapeke etope mema galyo, naJerusarema nage yimo a wapeke udona wendi. Ame kuna kuzuvha ukorokotji nezonauko mositata; uvera noyironda yelike nina kumona mo. 8One Vajerusarema, maudigu aga ngano taga kara erondoro lyeni; nsene yimo sa, ngano ngani mu zumba, makura sitata ngani si pirure si kare mburundu, evega eli nga dira kukara muntu.”
Israeli muhezuvhu
9 Hompa Munankondo nadinye kwa tantera nge asi: “Israeli ngava mu pupura mo too, moomu ava pupura mo mandjembere nagenye mosikunino soyindjembere. Ano yoworora mo nkenye ogu ana ku wapere, paapa sina kara po simpe siruwo.”
10Ame tani limburura asi: “Yilye ogu ga purakena nge apa na va tantera ni va rondore? Awo kwa runda nomutwe, yiyo va nyoka kupurakena mbudi zoge; awo kuzora eyi wa tantera nge asi ni yi va tantere. 11Ehandu lyoge kwawo, name kuna kudumuka mwange, Hompa, kapi nina kuvhura hena kudidimika.”
Hompa makura ta tantere nge asi: “Pimpira ehandu lyange kovanona mononzira nokoyigongi yovadinkantu. Vagara novakadi ngava va twara, novakurupe vaava kapi ngava va hupisa ko. 12Mambo gawo ngava ga gava kwavamwe vapeke, mapya gawo novakadi vawo nawo ngosikwawo. Ame tani futisa vantu wosirongo esi. 13Navenye a kare munona ndi mukurona, kuna kulipaparera yimaliva monkendi za hana kuzira mo; novapristeli novaporofete kuna kukumbagera vantu. 14Kuna kurugana ngwendi vava vana kutorokanya tupu yironda yovantu vange. Awo kutanta asi: ‘Nayinye yina wapa’ ayo ya hana nye kuwapa. 15Va fa nye rumwe nomuga mokurugana yininke eyi yoyihuna ndi? Hawe, kapi va fa nomuga; nokukisumuka kooku kapi va ku diva. Ano awo ngava gwa moomu va gwa vapeke; apa ngani va futisa, yilyo ehagero lyawo ngali kara lyoolyo. Ame Hompa nyame na yi uyunga.”
Israeli ta nyoka nzira zaKarunga
16 Hompa ta tantere vantu vendi asi: “Sikameni ponompangwanzira mu tare. Pureni nonzira danare noku za kara nzira zongwa po. Gendeni mo, makura ngomu kare mompora.”
Nye awo tava tanta asi: “Hawe, ose ure oyo!” 17Makura Hompa ta tura po vanomeni va purakene erondoro lyombendo. Nye awo tava tanta asi: “Kapi natu yi purakena ose.”
18Makura Hompa ta tanta asi: “Purakeneni, one nomuhoko, lirongeni kweyi yina kuhorokera mbunga zange. 19Evhu, purakena! Ngepanguro lyomagazaro gawo nagenye, ame tani reta ezonaguro kovantu ava, yeeyi awo va zumba erongo lyange, nononkango dange kapi ava di limburukwa. 20Etutumikido lyomanganganga gedumba lyewa aga aga tundu koSeba yinke naga kwafa nge, ndi yitoveseso eyi ayi tundu kosirongo sokoure? Nonzambo dawo, kapi tani di tambura ndi asi ni di hafere. 21Ano ame ngani pundukisa vantu ava, ngava gwe. Oguhya novana wovagara ngava fa rambanga ko vakwaawo novamaparambo.”
Ehomono lyokutundilira koMuzogo
22 Hompa ta tanta asi: “Vantu ngava tunda kosirongo sokoMuzogo, muhoko gononkondo gokoure kuna liwapaikire yita. 23Awo kuna damuna mauta gonkanza nomagonga; awo vantu wovadona va hana nkenda. Ezogerero lyawo kwa fana ngwendi lyendundumo lyefuta, nsene vana rondo nonkambe dawo. Awo vana liwapaikire kurwisa Jerusarema.”
24Vantu womoJerusarema tava tanta asi, “Mbudi tuna zi zuvhu, nye mawoko getu gana mi, woma una 25tu kwata nokukora ngwendi mukadi ogu ana zegama. Ose nokulipepekera si kuza ponze zosirongo ndi asi tu gende mononzira, yeeyi nonkore detu kuna humata netjiliso kuna tu umbilikida.”
26 Hompa ta tantere mbunga zendi asi: “Dwareni nonsako, one mu lisindumune menoto. Lireni malirankali moomu ava lili empogwe lyomuna gomugara, yeeyi ogu ana kuwiza a ya ku hanagure po, ta di ku sara mokuliharuka. 27Jeremiya, vantu vange va heteka moomu o heteke yivera, o yi koneke asi ngapi omu ya fana. 28Awo navenye kwa runda mutwe, kwa kukuta ngwendi ngoporo noyivera. Navenye kwa zonauka, kuna kugendagura va hanese nonkango da hana mulyo. 29Ediko lyomundiro kuna kuvengauka, nye sivera esi va zumba kapi asi hemuka ku tunde nkerewe. Kutupu sirugana kutwikira kuzereka mbunga zange, yeeyi asi ava va yipa mo kapi va va gusa mo. 30Awo ngava va tumbura tupu yininke yomawoko‐woko, yeeyi ame Hompa, nina va zumbu.”
Currently Selected:
JEREMIYA 6: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
