JEREMIYA 5
5
Nzo zaJerusarema
1Vajerusarema, dukeni
omo mwa za yitata yeni!
Tara‐tareni nakunye! Litareni nyamweni!
Konakoneni pomarandesero!
Kuvhura mu gwane po ogu
a rugana youhunga a kambadare
kulimburukwa kwaKarunga ndi?
Nsene mu mu gwana, Hompa
ngano nga dongwenena po Jerusarema.
2Nampili ngomu omu gana asi
tomu tongamene Hompa,
kapi mwa diva eyi omu tanta.
3Yosili Hompa kuna tara ulimburukwi.
Ga mu toona, nye one nombili si;
ga mu teza po, nye one
tomu nyoka kulironga.
One kwa rundire nomutwe, tomu
nyoka kutunda mo mononzo deni.
4Makura yipo na gazarere asi:
“Ava vahepwe awo vasima.
Va litura mougova;
kapi va diva eyi ga hepa
Karunga gwawo,
eyi ga va harera Hompa asi
yiyo nava rugana.
5Ame ngani za kovantu mononkondo,
ni ka uyunge nawo.
Yosili awo va diva eyi ga hepa
Karunga gwawo,
eyi ga va harera Hompa asi
yiyo nava rugana.”
Nye navenye va zumba epangero lyaHompa,
yiyo va nyoka kumulimburukwa.
6Yiyo nye ngava va dipagera
vanyime womowiza nye oyo;
mambungu gomowiza
ngaga va lipapagwira,
ano vangwe ngava va hondjavera
omo mwa za yitata yawo.
Nkenye ogu ana kupwaga mo
tava mu boborora,
morwa nonzo dawo dina vhuka.
Ano nkenye apa awo kuzumba Karunga.
7 Hompa ta pura asi: “Papi nye
apa nani dongwenena po
nonzo dovantu vange?
Awo kwa zumba nge,
makura yiyo ava tongamene vakarunga
ava va hanasi vakarunga sili.
Ame na va kutika,
nye awo tava rugana yorukehe,
tava manene siruwo sawo ponohondedi.
8Awo kwa kara ngwendi
makambe gomatwedu ga neta
gana kutjirana kedowo,
nkenye ogu kuna kukumakuma mukadamukwawo.
9Makura omu nani dira nye
kuvafutisa morweyi,
ni dire kutondora muhoko ngogu?
10Ngani tuma nonkore di ya tete
yikunino yoyindjembere yovantu vange,
nye kapi ngani yi hanagwilira po nuunu.
Ngani va tantera va tete ko nomutayi,
morwa nomutayi odo kapisi dange.
11Vantu vaIsraeli naJuda
va gombeka nge nuunu.
Ame Hompa, nyame na yi uyunga.”
Hompa ta zumbu Israeli
12Vantu vaHompa kwa mu patana tava tanta asi: “Age kapi nga rugana yuma nawa‐nawa. Ose kapi ngatu kara noyiruwo yoyidigu; kapi ngatu gwana yita ndi erumbu.” 13-14Awo kutanta hena asi, vaporofete neisi, awo vakavauki tupu, kapi ava uyunga yokutunda kwaHompa. Hompa Karunga Munankondo nadinye kwa tanterere nge asi: “Jeremiya; morwa vantu ava kwa uyunga yininke yokufana ngesi, nonkango dange tani di ninki di kare ngwendi mundiro mokana koge. Ano vantu ngava fana ngwendi yitare makura mundiro ngagu va veveke po.”
15Mbunga zaIsraeli, Hompa kuna kureta muhoko gokutunda ure gu ya mu rwise. Ago muhoko gwanare gononkondo, muhoko mwa dira kudiva eraka lyago. 16Vakwayita vawo womauta gonkanza vanankondo, awo kudipaga pwa hana nkenda. 17Ngava ya djobwana muzangu gweni nonondya deni; ngava ya dipaga vana veni wovagara nava wovakadi. Ngava ya myona nonzwi deni, tava hanagura yindjembere yeni noyitji yeni yomaukuzu. Yitata yegameno eyi mwa huguvara, ngayi hanauka po kovakwayita vawo.
18 Hompa ta tanta asi: “Nopomazuva si ngoso ogo kapi ngani hanagwilira po nuunu vantu vange. 19Nsene ngava pura asi yinke nina kuyiruganena nayinye eyi, va tantera Jeremiya asi, moomu tupu va tunda kwange va kerere vakarunga wovanayirongo mosirongo savene, yimo ngorooro ngava ka ruganena vageni mosirongo sa hana asi sawo.”
Karunga ta rondora mbunga zendi
20 Hompa ta tanta asi: “Tantera nontekuru daJakopo, tantera mbunga zaJuda: 21Zuvheni eyi, one vantu wovagova wovapote, ava mwa kara nomeho, nye kapi omu mono, one kwa kara nomatwi, nye kapi omu zuvhu. 22Ame nyame Hompa; yinke nani eyi omu dilire kutjira nge? Yinke eyi omu dilire kukankama komeho zange? Ame kwa paka po muheke, gu kare mururani gefuta, mururani gwanarunye ogu ali dili kutaguruka. Efuta kuvhura li yerauke, nye nokupitakana po si; mankupi nampili ga wayare ngapi, nokugutaguruka si. 23Nye ove mbunga zangiee! Ove kwa runda mutwe, ove hena wa tangarara; one kwa zapuka yiyo mwa zumba nge. 24Kapi mwa gazara rumwe asi mu fumadeke nge, nampili ngomu ani gava mvhura zomuhowo nezi zokuhulilira, tani mu pe siruwo somuzangu nkenye mvhura. 25Ano nonzo deni yido da mu zuminisa yininke nayinye eyi yoyiwa.
26“Vantu wovadona kuna kara mombunga zange; awo kukumbagera, tava ndindire ngwendi vagara vana zanzumuna ekwe va kwate yidira, nye nani kuna tege yiraha yokukwata vantu. 27Moomu tupu a zwida mukongo rumpandi rwendi yidira, nawo yimo va zwida mambo gawo yokukakwata moyita. Yiyo nye va nkondopera va ngawopa, 28yiyo va lya va neta. Yirugana yawo yoyidona kapi ya paka uhura. Kapi ava pe nonsigwe eyi ya va tumbukira ndi asi va wapeke ava ava hepeke.
29“Nye ame Hompa ngani va futisa moyininke eyi; ngani rugwida kuwoko muhoko ogu. 30Sininke sosidona sokureta mahwilili sina horoka mosirongo esi: 31vaporofete kuuyunga yimpempa yelike; vapristeli kupangera moomu vana kuvapangera vaporofete, ano mbunga zange yiyo nye za hara oyo. Nye omu ngava rugana, nsene ngayi haga nayinye eyi, ngapi nye?”
Currently Selected:
JEREMIYA 5: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
