JEREMIYA 4
4
Nzigo zelitezururo
1 Hompa ta tanta asi: “Mbunga zaIsraeli, nsene ono hara kutengura, tengwira kwange. Nsene o komba po vakarunga woyimpempa ava na nyenga o limburukwe kwange, 2kuwapa tupu nye o gane medina lyange. Makura nomuhoko nadinye ngadi hundira nge ni di tungike, makura ngadi fumadeke nge.”
3 Hompa ta tantere mbunga zaJuda naJerusarema asi: “Tutureni mapya geni aga va dira kututura; mwa ha kuna mbuto zeni momega. 4Sikiseni mo egwanekero lyeni name, ame Hompa gweni, lipongwereni nge, one mbunga zaJuda naJerusarema. Nsene mu yi nyoka oyo, ngano ehandu lyange ngali hwama ngwendi mundiro, morwa yininke yoyidona eyi mwa rugana. Ngali hwama, nye kapi ngapa kara ogu gokuvhura kulidimisa.”
Simpagwa sokutunda koMuzogo
5Fudeni nombendo omo mwa za sirongo!
Zigireni unene yi zuvhike!
Tantereni vantu womoJuda
naJerusarema va dukire
koyitata yepopero.
6Va likideni nzira zokoSiyoni!
Dukireni kougami! Mwa ha liranga!
Hompa ta reta simpagwa, ezonauko
lyenene lina kutunda koMuzogo.
7Moomu a tundu nyime
mouvando wendi,
nomuhanaguli gonomuhoko
nage ana bubuka ko.
Age kuna kuwiza a ya hanagure Juda.
Yitata nayinye yaJuda
ngayi kara nondambo domarunda,
nagumwe si ogu nga kara mo.
8Ano ngesi dwareni nonsako,
lireni oku tomu kwenauka,
morwa ehandu lyenene lyaHompa
kapi lina tundu po pwaJuda.
9 Hompa ta tanta asi: “Mezuva olyo ohompa nomarenga ngaga pira uradi; vapristeli ngagu va pwaga, ano vaporofete ngava tetuka.”
10Makura ame tani tanta asi: “Hompa Mupangeli, ove kwa pempura nawa‐nawa mbunga zaJerusarema! Ove kwa tente asi ngapa kara mpora, nani nye rufuro runa kara ponomuliu dawo.”
11Ngapa kara siruwo esi ngava tantera vaJerusarema asi mpepo zompyu kuna kupepa komeho zomburundu zi wize kwawo. Kapi ngazi kara zongwa ngwendi zezi ava hepa pokuzera — 12mpepo ezi ngazi wiza kompangera zaHompa ngazi pitakanene mononkondo pozo! Hompa mwene yige ana kudivisa epanguro kovantu vendi.
Juda tadi mu kundurukida nonkore
13Tara, nkore kuna kuwiza ngwendi maremo. Turukara twendi toyita ngwendi kakunguru, ano nonkambe dendi kugenderera kupitakana makuvi. Tuna zumbana nye! Hawe deedi nye twa lire!
14Jerusarema, kuhwa udona komutjima goge, makura ngava ku parure. Dogoro siruwoke ngo sininika kugazara yigazo yononzo?
15Nontumi dokoDana nedi dokonondundu daEfurayimi kuna kusanseka mbudi zondona. 16Ado kuna wiza di ya rondore nomuhoko nokuyatantera Jerusarema asi nonkore kuna kuwiza di tunde kosirongo sokoure. Nonkore edi ngadi ya zigira koyitata yaJuda, 17tadi ya kundurukida Jerusarema moomu ava nomene vagara epya, morwa vantu vendi kwa katukira va vyuke Hompa. Yimo ana kutanta Hompa.
18Juda, eyi nyamoge wa yi lihadera moyikara yoge nomu mweyi o rugana. Nzo zoge yizo zina reta ruhepo oru; azo yizo zina ku wurura dogoro komutjima.
Eguwo lyaJeremiya kombunga zendi
19Kukoree! Kukora kapi nani ku didimika!
Mutjima gwangiee!
Mutjima gwange guna pata nge!
Kapi nani vhura kumwena;
ame kuna kuzuvha nombendo
nonkugo zoyita.
20Ehanaguro kuna kukwama
kehanaguro ekwawo;
sirongo nasinye nondambo
domarunda dina kara.
Kuliharuka notenta detu
dina hanauka;
makehe gado gana tavauka ununu‐ununu.
21Dogoro siruwoke ngani mona
yirwa yina sikama, oku tani
zuvhu nombendo dina kuhagara?
22 Hompa kuna kutanta asi:
“Vantu vange vapote;
kapi va diva nge.
Awo kwa fana vanona wovagova;
kapi va paka nondunge.
Awo kwa tokomena kurugana yoyidona,
nye kurugana uwa kwa va vhura.”
Emoneko lyaJeremiya lyezonauko lyokuwiza
23Tani tara evhu — alyo kuna
vhundara, mapuku lina kara;
ni tare keguru — uzera kutupu.
24Na tara konondundu — ado kuna kukankama,
ano yindundu kuna kutengauka.
25Tani mono asi patupu vantu;
noyidira yeeyi yina tuka yina zi.
26Sirongo sevhu lyewa mburundu
nye zina kara;
yitata yaso nondambo domarunda
morwaehandu lyenene lyaHompa.
27(Hompa kwa tanta asi uzuni
mudima ngau kara mburundu,
nye kapi ngau zonagura po nuunu.)
28Uzuni ngau lira;
keguru ngaku sovagana.
Hompa ana yi tanta,
ano age kapi nga rundurura
egazaro lyendi.
Ga mana kutokora
kapi nga rundurura.
29Konzogera zovarondi
wononkambe nava womauta gonkanza
navenye ngava duka.
Vamwe ngava dukira mowiza,
vamwe ngava ronda pokatji komamanya.
Nkenye sitata ngava si zumba ngorooro,
kutupu ogu nga kara mo hena.
30Jerusarema vana ku pangura!
Yinke ono kudwarerera yoyigeha?
Yinke ono kulitjaperera
maurenga oku to painda meho goge?
Nayimwe si eyi
ono kuliwapaikira nyamoge!
Ava va ku hara vana ku nyenge
awo kuna hara va ku dipage.
31Ame kuna kuzuvha etakumo,
ngwendi lyomukadi gokoruzega,
kutuga ngwendi komukadi
ana kuhampuruka mbeli zendi.
Alyo etakumo lyaJerusarema
ogu ana kuhesangana,
ana gonona kuwoko kwendi
oku ta tanta asi:
“Vana pangura nge!
Awo kuna kuwiza va ya dipage nge!”
Currently Selected:
JEREMIYA 4: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
