JEREMIYA 32
32
Jeremiya ta randa epya
1 Hompa kwa uyungisire nge momumvho gomurongo gwaSedekiya mouhompa waJuda, ago yigo gwa kere hena mumvho gomurongo nantano‐nantatu gwahompa Nebukadenesara gwaBabironiya. 2Posiruwo oso vakwayita vahompa gwaBabironiya awo kuna kurwisa Jerusarema, ano ame vana zedilire nge morugumbo rombara. 3Hompa Sedekiya yige ga zedililire nge mo, ta pe nge usima wokuzuvhisa asi Hompa ta tanta asi: “Tani sigi hompa gwaBabironiya a kwate sitata esi, 4ano hompa Sedekiya kapi nga horama. Ngava mu gava kwahompa gwaBabironiya; ngava ka limona sipara nosipara, tava ka litambwasana kuuyunga. 5Sedekiya ngava mu twara koBabironiya, ta ka kara kooko dogoro noku ngani mu diworoka. Nampili nga rwise Vababironiya, kapi ngayi mu wapa. Ame Hompa, nyame na yi uyunga.”
6 Hompa ta tantere nge asi 7Hanameli, munwahekurwange Sarumu, ta wiza kwange nohepero zokurandesa epya lyendi eli lya kara moAnatoti mosirongo saMbenyameni. Morwa ame nyame ekoro lyendi lyopopepi, makura nyame nye na wapera kuliranda. 8Moomu tupu ga tanterere nge Hompa, Hanameli ta wiza kwange omo morugumbo rombara, ta hundire nge asi ni rande epya. Ame na yi divire nawa‐nawa asi Hompa ga uyungisire nge. 9Tani randa epya kwaHanameli, tani mu vihire yimaliva; ndando tazi gu moyimaliva yoyitenda murongo nayitano‐nayivali yosisiliveli. 10Tani tjanga mbapira zondando, tani zi tura sinongweneso, tani zigida nombangi, makura tani heteke yimaliva kosiviha. 11Makura tani gusa mbapira zomarandesero ezi vana pata pamalizuvho gompangera naga gosinongweneso, tani gusa hena zimwe za hana sinongweneso — 12makura tani di pe Baruku zaNeliya, mutekurwaMaseya. Ame kwa di mu pere komeho zaHanameli nonombangi edi da sainine mbapira zomarandesero nokomeho zovantu ava va hingilire morugumbo rombara. 13Komeho zanavenye tani tantere Baruku asi: 14“Hompa Munankondo nadinye, Karunga gwaIsraeli, yige ana ku pangere o guse nombapira nadinye edi, nezi zomarandesero zokupata nezi zokudira kupata, o di ture mokavaza kerova, asi di pungukwe nokonomvhura odo dina kuwiza. 15Hompa Munankondo nadinye, Karunga gwaIsraeli, kuna tanta asi, mambo nomapya noyikunino yoyindjembere ngava yi randa hena mosirongo esi.”
Ekanderero lyaJeremiya
16Eyi na gava mbapira zomarandesero kwaBaruku, tani kanderere asi: 17“Mupangeli Hompa, ove nyove wa sita eguru kononkondo doge dononene; kutupu eyi ya ku digopera ove. 18Ove kwa monekesa eharo lyanarunye komayovhi, ano ove hena kufutisa vantu morwanonzo dovakurona vawo. Ove o munene naKarunga gononkondo; ove Hompa Munankondo nadinye. 19Ove kwa kara nomayere, to rugana yononkondo; ove kumona nayinye eyi ava rugana vantu, to va futu mokuliza noyirugana yawo. 20Ove kwa rugene nare yidiviso noyitetu moEgipite, yiyo ono kutwikira kuyirugana nelyezuva moIsraeli nomokatji konomuhoko peke, makura yiyo ono divikwa nye napenye. 21Morwakuruganesa yiruganatetu noyitetu eyi yina tukukisa nonkore detu, ove ono ruganesa nonkondo doge mokugusa vantu woge Vaisraeli mosirongo saEgipite. 22Ove kwa va pa ugawo ou nosirongo esi sondombe, moomu wa si tumbwidilire ozinyakurwawo va si guse si kare sawo. 23Nye apa va wizire mosirongo esi va guse si kare sawo, kapi va limburukwire konompangera doge ndi asi va kare merongo lyoge. Awo kapi va rugana moomu wa va tantera. Makura yiyo wa va retera ezonauko nalinye eli.
24“Vababironi vana dike ekuma lyepopero, li umbilikide sitata va si kwate. Awo makura vana si rwisa. Yita nonzara nehamba ngayi ninkisa sitata si ze momawoko gawo. Ove kuvhura kuyilimonena nayinye asi eyi wa uyunga yina kara yosili. 25Nye nampili yimo yina fana ngoso, nyove Hompa gefumano ono tantere nge asi ni rande epya moyitarameho yonondipo, nampili sitata pokusikwata Vababironiya sina kerere.”
26 Hompa ta tantere nge asi: 27-28“Sitata esi ngani si gava kwahompa gwaBabironiya Nebukadenesara kumwe novakwayita vendi. Awo ngava si kwata, 29tava si ngongeke endiro. Aso ngava si hwika po kumwe nomambo, omu va handukisa vantu mokuzambera Bara manganganga gedumba lyewa konondundu nokuzambera nonzambo dovhinyu kovakarunga vapeke woyimpempa. 30Kutunda petameko‐tameko lyohistoli zawo, vantu Vaisraeli nava Vajuda kapi va hafesa nge. Awo kwa handukisa nge tupu, morwayirugana eyi va rugana. 31Vantu wositata esi, kwa handukisa nge momunene kutunda tupu kezuva eli va si tunga po. Ame kuna tokora ni si zonagure po 32morwaudona ou va rugana vantu womoJuda nomoJerusarema kumwe nohompa nomasimbi gawo novapristeli novaporofete vawo. 33Awo kwa pa nge nyima, nampili ngomu ani va rongo ngorooro, awo nokupurakena si va yi lironge. 34Awo kwa tura yikarunga yawo yokunyata montembeli ezi va dikira nge va kandererere nge mo, makura yiyo va zi nyateka. 35Awo kwa dikira Bara yizambero moMuramba gwaHinomu va zamberere ko nzambo karunga goyimpempa Moreki vana vawo wovagara nava wovakadi. Nye ame kapi na va tantera asi va rugane eyi, nomomagazaro gange si kapi ya kara mo, asi va rugane ngano yininke yokufana ngesi va zonese vantu womoJuda.”
Etumbwidiro lyehuguvaro
36 Hompa, Karunga gwaIsraeli, ta tantere nge asi: “Jeremiya, vantu kuna kutanta asi, yita nonzara nehamba yiyo ngayi tulisa sitata esi momawoko gahompa gwaBabironiya. Ntaantani purakena hena kwayimwe eyi nani tanta. 37Tani ka pongaika vantu moyirongo nayinye ava na haraganesera mehandu lyange lyenene, makura ngani va tengwide pevega eli, ngani va ninke va kare nombili. 38Makura awo ngava kare vantu vange, ano ame ngani kare Karunga gwawo. 39Ame ngani va pa sininke simwe moukaro wawo esi: sokufumadeka nge nkenye apa, morwauwa wavene nou woruvharo rwawo. 40Ame ngani paka po egwanekero lyanarunye kumwe nawo. Narumwe si ngani hageka kuvaruganena yoyiwa, makura ngani va ninke ngava tjire nge nonomutjima dawo nadinye, ngava dire hena kutunda ko kwange. 41Ame kwa hafera mokuvaruganena yininke yoyiwa, ngani va paka mosirongo esi, ngava kare mo narunye.
42“Moomu tupu na retera vantu ava simpagwa, yimo ngorooro ngani va pa yininke yoyiwa nayinye eyi na va tumbwidira. 43Vantu kuna kutanta asi, sirongo esi ngasi kara mburundu, omu ngava dira kukara vantu noyinamwenyo, hena asi ngasi za koVababironiya. Nye mapya ngava ga randa hena mosirongo esi. 44Vantu ngava ga randa, tava tjanga nombapira domarandesero, tava di tura yikorekeso, ano nombangi nado tadi kara po. Eyi ngayi kara po mosirongo saMbenyameni, monomukunda edi da kunduruka Jerusarema, moyitata yaJuda, moyitata yomosirongo sokonondundu, monomuramba nomoJuda zokoMbindakano. Ame ngani tengwida hena vantu mosirongo sawo. Ame Hompa, nyame na yi uyunga.”
Currently Selected:
JEREMIYA 32: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
