JEREMIYA 31
31
Israeli ta tengura kembo
1 Hompa ta tanta asi: “Ruveze taru wiza, apa ngani kara Karunga gomazimo nagenye gaIsraeli, makura awo ngava kara vantu vange. 2Ame ngani zavererera ava va vanda nomfa momburundu, apa ngava diworoka vantu vaIsraeli epwizumuko. 3Ame na va monekera kutunda nokwanare. Mbunga ove zaIsraeli, ame kwa ku hara narunye. Ame tani twikire simpe kukulikida eharo lyange lyanarunye lyokukuhara. 4Ame ngani ku tungurura simpe. One ngomu gusa nongomagona, tomu dana muna hafa unene. 5One ngomu lima hena yikunino konondundu daSamaliya. Ano ava ngava tapeka, yiwo ngava lya eyi ngayi yima ko. 6Nhi, ruveze taru wiza, apa ngava zigilira vanomeni konondundu daEfurayimi asi: ‘Tu kandukeni koSiyoni kwaHompa Karunga gwetu.’ ”
7 Hompa ta tanta asi:
“Dimbireni Israeli nehafo,
munene gonomuhoko.
Dimbeni rusumo rwehamberero,
‘Hompa ana parura vantu vendi;
age ana yoworora navenye ava
va hupire po.’
8Ame ngani va gusa koMuzogo
ngani va pongaika, tani va gusa
koyiha nayinye youzuni.
Awo ngava wiza kumwe novatwiku
novakadi womarutu gavali
nava vana kerere pokuhampuruka.
Awo ngava tengura muhoko gomunene.
9Vantu vange, ngava tengura
oku tava lili,
oku tava kanderere siruwo esi
ngani va gendesa.
Ame ngani va twara
konomukuro domema,
konzira zongwa oku ngava dira kupunduka.
Ame kwa fana guhyaIsraeli,
ano Efurayimi mbeli zange zongara.”
10 Hompa ta tanta asi:
“Nomuhoko, purakeneni nge,
diviseni nonkango dange koyirongo
yokonontere yokoure.
Ame kwa haraganesa vantu
vange, nye ngani va pongaika hena,
ngwendi musita gononzwi
ana kupitisira siunda sononzwi dendi.
11Ame na mangurura vantu Vaisraeli,
ngani va parura komuhoko gononkondo.
12Awo ngava wiza tava dimbi
nehafo kondundu zaSiyoni,
ngava hafera yigava yange
yigava yorukokotwa novhinyu
nomagadi gononzwe,
yigava yononzwi nonongombe.
Awo ngava fana ngwendi
sikunino sa duvara nawa,
ngava kara nankenye eyi
ngava hepa.
13Makura vakadona ngava dana
tava hafa,
vagara novadinkantu
novakurupe ngava hafa.
Ame ngani va hengagwida
tani situnukisa nonkali dawo
noruhodi rwawo ehafo.
14Vapristeli ngani va yigika
nonondya nombunga zange
nazinye ngani zi kutika.
Ame Hompa, nyame na yi uyunga.”
Hompa ta fire nkenda Israeli
15 Hompa ta tanta asi:
“Ezwi kuna kuzuvhika moRama
ezwi lyokulira kokunene.
Rakera kuna kulilira vana vendi,
awo vana fu, ano age
ana nyoka kumuhengagwida.
16Hageka kulira koge
o likokote mahodi goge.
Nayinye eyi wa ruganena vana woge,
kapi ngayi kara ya hana kuyifuta;
awo ngava tunda ko kosirongo sovanankore.
17Endindiro lyoge lyokomeho kolili,
vana woge ngava tengwira kembo.
Ame Hompa, nyame na yi uyunga.
18“Ame kuna kuzuvha mbunga
zaIsraeli zina kuuyunga
neguwo asi:
‘Hompa, ose kwa fene ngwendi
simuna va dira kudeura
nye ove to tu rongo kulimburukwa.
Tu tengwida;
ose nare tuna liwapaike
kutengwira koge,
Hompa Karunga gwetu.
19Ose kwa ku zumba,
nye tuna hara tu tengwire
usimbu koge.
Apa wa tu futisire, ose kwa
nyongwere nomutwe detu keguwo.
Ose kwa fire nomuga tatu swauka,
yeeyi twa zona
apa twa kere simpe vadinkantu.’
20“Israeli, ove munwange
gomugara ogu na tokomena,
ove muna ogu na hara unene.
Nsene tani tumbura edina lyoge,
ame kukugazara neharo,
mutjima gwange
tagu ku zegurukire;
ame tani ku fire nkenda.
21Tura po yidiviso o didilike nzira,
papara hena nzira zoge
ezi wa gendere.
Tengura mbunga ove zaIsraeli,
o wize kembo koyitata eyi
wa tundire.
22Dogoro ezuvake ngo lirangaranga,
mbunga ove wa hana epuro?
Ame na sita yininke yoyipe
yokudira kulifana,
ayo kapi ya lifana, moomu a
gamene mukadi mugara.”
Erago lyokomeho lyovantu vaKarunga
23 Hompa Munankondo nadinye, Karunga gwaIsraeli ta tanta asi: “Apa ngani tengwida vantu kosirongo sawo, awo ngava uyunga hena mosirongo saJuda nomoyitata yaso asi:
‘Hompa ngano a tungike ndundu
zokupongoka zaJerusarema,
evega lyokupongoka eli ga tungika.’
24Vantu ngava tunga moJuda nomoyitata yamo nayinye. Ako ngaku kara hena mapya novasita kumwe noyiunda yawo. 25Ame ngani ka tendeka ava vana kara moudigu, ngani kutika ava zina tongeke nzara. 26Ano vantu ngava uyunga asi: ‘Ame kani rara, yiyo nina pinduka nina ndjanga.’
27“Ame Hompa kuna kuuyunga asi, ruveze runa siki mo rokuzwida sirongo saIsraeli naJuda novantu noyimuna. 28Nawa‐nawa, moomu na kara nosinka sokudura nokuzuguma nokuharaganesa nokuvazonagura po, na kara hena nosinka sokuvatapeka nokuvatunga. 29Ruveze rwangoso nsene ngaru sika mo, vantu ngava uyunga hena asi:
‘Vakurona kwa lire
mandjembere gosikandi, nye
vanona kuzuwha uhahu wago.’
30Ano nye nkenye ogu nga lya komandjembere gosikandi, mazego gendi ngaga zuvha uhe, nkenye ogu nga fira nonzo dendi.”
31 Hompa ta tanta asi: “Siruwo tasi wiza, apa ngani paka po egwanekero lyepe nombunga zaIsraeli novantu vaJuda. 32Alyo kapi ngali kara ngwendi lyeli na tulire po nozinyakurwawo, apa na va kwete kokuwoko ni va guse moEgipite. Nye ame kwa kere ngwendi mugara gwawo, nampili kapi va damekere egwanekero olyo. 33Egwanekero lyepe eli ngani paka po nombunga zaIsraeli lyeli: Ame ngani tura Veta zange mwawo, tani zi tjangere monomutjima dawo. Ame ngani kara Karunga gwawo, awo tava kara vantu vange. 34Nagumwe si gomokatji kawo nga ronga mukwawo kudiva Hompa, yeeyi asi navenye ngava diva nge, kutunda komunona dogoro komukurona. Ame ngani dongonona po nonzo dawo, kapi ngani diworoka hena mausima gawo. Ame Hompa, nyame na yi uyunga.”
35 Hompa kugava uzera wezuva
u minikire mutenya,
nokwedi nonombungururu
yi minikire masiku.
Age kugumagwisa efuta
li ndundume;
edina lyendi Hompa
Munankondo nadinye
36Age kutumbwidira asi, siruwo
esi una dili kuhaga ukaro ou
wa kara po,
muhoko gwaIsraeli ngorooro
ngagu kara po.
37Eguru nsene kuvhura kuliheteka
ezuva limwe tupu
nomatateko gevhu va ga konakone,
name ntudi ntani ni zumba
mbunga zaIsraeli,
morwanayinye eyi va rugana.
Hompa yimo ana uyunga.
38 Hompa ta tanta asi: “Siruwo tasi wiza apa ngava tungurura Jerusarema namunye a kare sitata sange, kutunda koRuhungu rwaHananeli koUtokero dogoro kErungavero lyemEkovhu. 39Nzira zomururani, ngazi twikira kutunda korwaUtokero zi vyuke kondundu zaGarebu, makura tazi kunduruka zi vyuke koGowa. 40Muramba nagunye ogu va vhumbika vafe, nomu va kombera hando nomapya nagenye aga ga kara mesinya mwina lyomukuro gwaKidironi dogoro kerungavero lyononkambe koUtokero, ngali pongokera nge. Sitata kapi ngava si zungurura po ndi asi va si haraganese po hena nampili kanunu.”
Currently Selected:
JEREMIYA 31: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
