JEREMIYA 33
33
Etumbwidiro hena limwe lyehuguvaro
1Ame simpe morugumbo rodorongo na kara, mbudi zaHompa tazi wiza hena kwange. 2Hompa ogu ga sita evhu, yiyo ga li ninka li kare pevega lyalyo, yige ga uyungisire nge. Ogu gedina asi Hompa kwa tente asi: 3“Zigida nge, makura ngani ku limburure; ame ngani ku tantera yitetu noyininke eyi ya pitakana nondunge eyi wa dira kudiva. 4Ame Hompa, Karunga gwaIsraeli, kuna kutanta asi, nonzugo daJerusarema nombara zaJuda ngava yi zungurura. 5Kutupu sikwafa sokurwisa nondambo dokukundurukida edi va tura po Vababironiya. Eyi ngayi zwidisa tupu sitata yimpu yava ngani toona mehandu lyange lyenene. Kositata esi ame na tundu ko, morwayininke yoyidona eyi ava rugana vantu vamo. 6Nye ngani verura sitata esi, ano vantu vaso ngani va tengwidira ukangure. Ame ngani va pa mpora zonene negameno. 7Ame ngani ragopeka Juda naIsraeli, tani yi tungurura moomu ya kere nare. 8Ngani va kuhura kononzo dawo edi va tura kwange, tani va dongwenene po nonzo dawo netangararo lyawo. 9Jerusarema nga kara ntundiliro zoruhafo nefumadeko nomalitumbadeko kwange; nkenye muhoko konauzuni ngagu tjira tagu kankama, apa ngava zuvha yokuhamena koyininke yoyiwa eyi nina kuruganena vantu womoJerusarema neyi yokuhamena kerago eli nina kuretera sitata.”
10 Hompa ta tanta asi: “Vantu kuna kutanta asi evega eli ngwendi mburundu, morwa kapi lya paka vantu noyinamwenyo. Hawe monzira; yitata yaJuda nononzira daJerusarema mawoko‐woko dina kara; mutupu vantu ndi yinamwenyo. Nye momavega aga ngomu zuvha mo hena 11mazwi goruhafo nepemburo nononkalinkali doyipito yononkwara. Ngomu zuvha vantu tava dimbi pokureta nonzambo dompandu kontembeli zange; awo ngava tanta asi:
‘Pandeni Hompa Munankondo
nadinye, morwa age muwa
ano eharo lyendi lyanarunye.’
Sirongo esi ngani si ninka si ragope moomu mwanare. Ame Hompa, nyame na yi uyunga.”
12 Hompa Munankondo nadinye ta tanta asi: “Mosirongo esi sina fana ngwendi mburundu, muna pili vantu noyinamwenyo, ngamu kara hena maliro omu ngava lisira vasita wononzwi nonzwi dawo. 13Moyitata yosirongo sonondundu, nomonomuramba nomoJuda zokoMbindakano, mosirongo saMbenyameni, monomukunda edi da kundurukida Jerusarema nomoyitata yaJuda, vasita wononzwi yimo ngava varwira hena nonzwi dawo. Ame Hompa, nyame na yi uyunga.”
14 Hompa ta tanta asi: “Siruwo tasi wiza apa ngani sikisa mo etumbwidiro eli na tumbwidira Israeli naJuda. 15Posiruwo oso ngani horowora Hompa, ntekuru zene‐zene zaNdafita. Hompa ogo nga rugana eyi ya wapa ya hungama mosirongo mudima. 16Vantu womoJuda nomoJerusarema ngava yoworoka tava kara nombili. Sitata ngava si tumbura asi: ‘Hompa muparuli gwetu.’ 17Ame Hompa kwa va tumbwidira asi nkenye apa, ogu nga kara hompa ntudi ntekuru zaNdafita ntani 18apo ngapa kara hena nkenye apa vapristeli vezimo lyaRevhi, va karere nge oku tava zamba nonzambo deswakerero nedi donombuto nononzambo.”
19 Hompa ta tanta asi: 20“Na paka po egwanekero nomutenya nomasiku, asi ngayi kare po nkenye apa posiruwo sayo; ano egwanekero olyo nokanunu si kuliteza po. 21Nomukereli gwange Ndafita nage yimo na paka po nendi egwanekero asi nkenye apa ntekuru zendi yizo ngazi kara hompa, ntani egwanekero kumwe novapristeli vemezimo lyaRevhi asi ngava kerere nge nkenye apa; magwanekero ogo narumwe si kugateza po. 22Ame ngani vhukisa sivaro sonontekuru daNdafita nosivaro sovapristeli vemezimo lyaRevhi, asi ngayi va vhure kuvavarura moomu ya va vhura kuvarura nombungururu dekeguru nonondanda domuheke gwekefuta.”
23 Hompa ta tantere nge asi: 24“Ono yi nongonona asi, vantu kuna kutanta asi: ame kuna nyenge Israeli naJuda, mapata gavali aga na horowora ndi? Ano makura yiyo vana kutara vantu vange neswau kapi vana kuvatara hena asi muhoko. 25Nye ame Hompa kwa paka po egwanekero nomutenya nomasiku, yiyo na paka po noveta dokupangera evhu neguru. 26Moomu tupu na yi rugana nawa‐nawa eyi, yimo ngani koreka ngorooro egwanekero lyange nonontekuru daJakopo nomukereli gwange Ndafita. Ngani horowora ntekuru zimwe zaNdafita, ngazi pangere nontekuru daAbirahamu naIsaka naJakopo. Vantu vange ngani va fira nkenda, tani va ragopeke hena.”
Currently Selected:
JEREMIYA 33: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
