JEREMIYA 30
30
Matumbwidiro gaHompa kombunga zendi
1 Hompa, Karunga gwaIsraeli, 2kwa tanterere nge asi: “Tjanga mobuke nayinye eyi na ku tantera, 3morwa siruwo tasi wiza, apa ngani wapeka mbunga zange zaIsraeli nezi zaJuda. Ngani va tengwida kosirongo esi na pere ozinyakurwawo, makura ngasi kare hena sawo. Ame Hompa nyame na yi uyunga.”
4 Hompa ta tantere mbunga zaIsraeli nezi zaJuda asi:
5“Tani zuvhu nkugo zoutjirwe,
nkugo zowoma, kapisi zompora.
6Ntaantani hagekeni, mu gazare!
Mugara kuvhura a hampuruke
mukeke ndi?
Yinke nye eyi na kumonena
nkenye mugara kuna
likwaterere mawoko pezimo
ngwendi mukadi ogu ana kara koruzega?
Yinke vana kisumukire navenye?
7Ezuva lyedigu tali wiza;
kutupu ezuva eli lyokuheteka polyo —
siruwo seguwo kovantu vange,
nye ngava hupa po.”
8 Hompa Munankondo nadinye ta tanta asi: “Ezuva olyo apa ngali wiza, ngani teza ndjoko ezi za kara kononsingo dawo, tani va ditura mo momalyenge, makura kapi ngava kara hena vapika wovanayirongo.
9“Nye nani ngava ruganena nge, ame Hompa Karunga gwawo, nontekuru zaNdafita ezi ngani tumba zi kare hompa.
10“Mbunga zange, mwa ha tjira;
mbunga zaIsraeli,
va ha ku tjilisa.
Ame ngani ku yoworora ko
oko kosirongo saure,
kosirongo esi muna ka kara nonkwate.
Ngomu tengura kweni
tomu kara mompora;
ngadi mu dama, kutupu gokumutjilisa.
11Ame ngani wiza kweni
ni mu parure.
Ngani hanagura nomuhoko nadinye
doku na mu haraganeserera,
nye one ko kapi ngani mu
hanagura po.
Kapi ngani mu siga na hana kumufutisa;
nye apa ngani mu futisa,
ngani kara mouhunga.
Ame Hompa, nyame na yi uyunga.”
12Makura Hompa ta tantere vantu
vendi asi:
“Yironda yeni kapi ngayi veruka
urema weni ngorooro
ngau dodoma.
13Kutupu gokukupakera mbili
kutupu yihakwiso yomasina goge,
kutupu ehuguvaro lyeveruko lyoge.
14Ava va ku hara navenye
vana ku divara;
kapi vana kukupakera hena mbili.
Ame kwa ku rwisa,
ngwendi nkore;
efutiso lyoge edigu,
morwa nonzo doge nonzi
ano udinikarunga woge nawo unene.
15Mwa ha sivana hena
yokuhamena maurema geni;
kutupu yiverwiso yeni.
Ame kuna kumufutisa mwangesi
morwa nonzo deni nonzi
udinikarunga weni unene.
16Nye ntaantani, ava vana kumulipapagwira,
ngava va lipapagwira,
nonkore deni nadinye
ngava di twara mounkwate.
Navenye ava vana kumuhepeka,
ngava va hepeka,
navenye ava vana kukmhakana,
ngava va hakana.
17Ame ngani mu wapeka hena;
ngani verura yironda yeni,
nampili ngomu dina kutanta
nonkore deni asi,
‘Siyoni va mu zumba;
nagumwe si ana kumupakera mbili.’
Ame Hompa, nyame na yi uyunga.”
18 Hompa ta tanta asi:
“Ngani tengwidira vantu vange
kosirongo sawo
tani fire nkenda nkenye epata;
Jerusarema ngava mu tungurura,
ano mbara zendi tava zi wapukurura.
19Vantu ava va kara mo
ngava dimba ehamberero;
ngava zigira kehafo.
Etungiko lyange yilyo ngali va
livharesa va vhuke;
etungiko lyange ngali va retera efumano.
20Ame ngani tengwida nonkondo
domuhoko gozinyakurwawo
ngani gu ninka gu kare hena
guna korerere.
Ano ava ngava va hepeka
ngani va pangura.
21-22Mupangeli gwawo nga tunda
momuhoko gwavene,
nahompa gwawo gomukadi
nage nga tunda mombunga zavene.
Age nga heda kwange
apa ngani mu zigida.
Yilye ogu nga lipepekera kuwiza
kwange, va hana kumuzigida?
Awo ngava kara vantu vange
ame tani kara Karunga gwawo.
Ame Hompa, nyame na yi uyunga.”
23-24Ehandu lyaHompa, ekundungu, emupepo eli lina handuka tali kundungire pomutwe gomudinikarunga. Alyo kapi ngali mwena dogoro ngali sikise mo eyi ga panga a yi rugane. Vantu vendi ngava kwata egano eyi nawa‐nawa, komazuva gokomeho oko.
Currently Selected:
JEREMIYA 30: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
