JEREMIYA 29
29
Mbilivhe zaJeremiya koVajuda womoBabironiya
1Ame kwa tjangerere mbilivhe vapristeli novaporofete novagendesi wombunga, nanavenye ava ga gusire Nebukadenesara moJerusarema a va tware nonkwate koBabironiya. 2Konyima zokutwara koupika hompa Jehoyakini nozina nomarenga gombara novagendesi vaJuda nava vaJerusarema novahambuli nononkurungu, yipo na zi tjenge ozo mbilivhe. 3Ame kwa zi pere Erasa zaSafani naGemaliya zaHilikiya, ava ga tumine hompa Sedekiya gwaJuda kwahompa Nebukadenesara gwaBabironiya. Ano kwa tjenge mo asi:
4“Hompa Munankondo nadinye, Karunga gwaIsraeli, ta tantere vantu navenye, ava ga siga a va guse Nebukadenesara moJerusarema a va tware koBabironiya nonkwate asi: 5‘Tungeni mambo mu kare mo. Limeni yikunino mu lye eyi yina kuyima mo. 6Kwareni mu rete vana. Vana veni nawo va sigeni va kware, nkumwe ngava rete nawo vana. Livhareni mu vhuke, mwa ha sesupa. 7Ruganeneni kwange morwayo, morwa nsene yi wapa, none tomu wapa. 8Ame Hompa, Karunga gwaIsraeli, tani mu rondora asi, walye omu litarerere va mu kumbagere vaporofete ava va kara mokatji keni ndi vapeke ava ava tanta asi awo kupumba yokomeho. Mwa ha pakera mbili nonzodi dawo. 9Awo kumutantera yimpempa medina lyange. Kapisi nyame na va tuma. Ame Hompa, nyame na yi uyunga.’
10“Hompa ta tanta asi: ‘Nomvhura nomurongo ntano nambali nsene dina pu, ngani mu diworoka, makura ngani sikise mo etumbwidiro lyange lyokumutengwida kweni. 11Nyamelike na diva magazaro aga na kara nago gokumuhamena, magazaro gokumuretera erago kapisi simpagwa, magazaro gokuhamena yokomeho eyi muna ndindire. 12Makura ngomu zigida nge, ngomu wiza tomu ya kanderere nge, ano ame tani mu limburura. 13Ngomu papara nge, tomu gwana nge, morwa ngomu papara nge nonomutjima nadinye. 14Hawe yimo na kutanta, ngomu gwana nge, makura ame ngani mu tengwidire kosirongo seni. Ngani mu kongorora ko koyirongo nayinye nokomavega nagenye aga na mu haraganeserere, ngani mu tengwide kosirongo esi na mu gusire ni mu tware koupika. Ame Hompa nyame na yi uyunga.’
15“One kutanta asi Hompa ga mu pa vaporofete moBabironiya. 16Purakeneni eyi ana kutanta Hompa yokuhamena hompa ogu ana kupangera sirongo esi nga pangere Ndafita, neyi yokuhamena kovantu womositata esi, kuninka asi vekoro lyeni ava va dira kuza kumwe none mounkwate. 17Hompa Munankondo nadinye ta tanta asi: ‘Tani va retere yita nonzara nehamba, ano ame ngani va ninka va fane ekuzu lyokuwora unene lyokudira kuwapera kulya. 18Ngani va kwama noyita nonzara nehamba, ano nomuhoko nadinye domouzuni ngadi tukuka kweyi ngadi mona. Nkenye oku ngani va haraganesera, vantu ngava tukuka tagu va pwaga kweyi ngayi va horokera. Vantu ngava va zora, edina lyawo tava li ruganesa ngefingiliro. 19Eyi ngayi va horokerera, morwa kapi va limburukwa kombudi ezi ani va tuma‐tumine zi gendere movakereli vange vaporofete. Va nyoka kuzuvha. 20Namuvenye ava na tuma koupika koBabironiya, purakeneni eyi nina kuuyunga ame Hompa.’
21“Hompa Munankondo nadinye, Karunga gwaIsraeli, ga mana kuuyunga yombinga zaAhaba zaKoraya naSedekiya zaMaseya, ava ava mu tantere yimpempa medina lyendi. Age kwa tanta asi nga va gava momawoko gahompa Nebukadenesara gwaBabironiya, ogu nga va dipaga one kuna kutara. 22Ava vantu va tundire koJerusarema va va tware nonkwate koBabironiya, nsene ngava fingilira muntu, ngava tanta asi: ‘Hompa ngano ta ku rugana ngwendi Sedekiya naAhaba, ava ga hwikire hompa gwaBabironiya uzuni!’ 23Esi yiso ngasi kara sigwana sawo morwa va tura nzo zondigu unene — awo kwa rugana yoruhonda, yiyo va uyunga yimpempa medina lyaHompa. Eyi kapi ya liza neharo lyaHompa; ga diva eyi va rugana, ano age yige mbangi zawo. Hompa yige ana yi tanta.”
Mbilivhe zaSemaya
24-25 Hompa Munankondo nadinye, Karunga gwaIsraeli kwa pere nge mbudi zakwaSemaya gomoNeheramu, ogu ga tumine mbilivhe medina lyamwene kovantu navenye womoJerusarema nokomupristeli Sefaniya zaSemaya nokovapristeli navenye. Mombilivhe ezi, Semaya kwa tjangerere Sefaniya asi: 26“Hompa kwa ku tura moupristeli mevega lyaJehoyada, ano ove ntaantani nyove erenga lyenene lyomontembeli. Sirugana soge sesi sokutara asi, nkenye muntu gomudona ogu ana kulipaka kouporofete, mu tura mokakunzu o mu mange elyenge monsingo. 27Yinke nye eyi wa tarererera Jeremiya gomoAnatoti, ogu a uyungire vantu ngwendi muporofete? 28Va yi mu nyokere, morwa age kwa tantera vantu ava va kara moBabironiya asi va kare mounkwate siruwo sosire, asi va tunge mambo va kare mo, va kune yikunino va lye eyi yina kuyima mo.”
29Sefaniya makura ta zi resere nge ozo mbilivhe, 30ano Hompa ta tantere nge 31-32ni tumine nonkwate nadinye domoBabironiya mbudi ezi zokuhamena Semaya asi: “Ame Hompa ngani futisa Semaya noruvharo rwendi narunye. Kapi na mu tuma, nye makura yiyo ga mu uyungira ngwendi muporofete, yiyo ga mu ninkisa mu pure yimpempa. Age kapi nga kara nonontekuru mokatji keni. Kapi nga mona yoyiwa eyi ngani ruganena vantu vange, morwa ga va tantera va vyuke nge. Ame Hompa nyame na yi uyunga.”
Currently Selected:
JEREMIYA 29: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
