JEREMIYA 28
28
Jeremiya nomuporofete Hananiya
1Momumvho googo, mokwedi kwautano komvhura zaune zaSedekiya mouhompa, makura Hananiya zaAsuru, muporofete gokositata saNgibiyoni, ta uyungire nge montembeli. Komeho zovapristeli nombunga ta tantere nge 2asi Hompa Munankondo nadinye, Karunga gwaIsraeli, kwa tanta asi: “Na tezagura nonkondo dahompa gwaBabironia. 3Moure wonomvhura mbali ngani tengwida pevega eli emona nalinye lyontembeli eli ga twara hompa Nebukadenesara koBabironiya. 4Ngani tengwida hena Hompa gwaJuda, Jehoyakini zaJehoyakimu, kumwe novantu navenye vaJuda ava va zire koupika koBabironiya. Nhi, ngani teza nonkondo dahompa gwaBabironiya. Ame Hompa nyame na yi uyunga.”
5Makura ame tani tantere Hananiya komeho zovapristeli novantu navenye ava va sikeme montembeli asi: 6“Yitetu yange ame! Na huguvara asi Hompa nga yi rugana eyi! Na yi huguvara nawa asi, nga ninka uporofete woge u sike mo, makura nga guse koBabironiya emona nalinye lyontembeli novantu navenye ava va twara upika. 7Nye purakana eyi nina kukutantera ove novantu. 8Vaporofete ava ngava uyunga kwanare, ame simpe patupu, nove si, ngava zuvhisa yita nonzara nehamba asi ngali wiza konomuhoko dononzi nokoyirongo, yononkondo. 9Nye muporofete ogu a zuvhisa mpora kumudimbwilira asi, muporofete sili ogu ga tuma Hompa, nsene asi ezuvhiso lyomuporofete lina siki mo.”
10Makura Hananiya ta gusa ko ndjoko konsingo zange, ta zi tezagura, 11ta tanta komeho zovantu navenye asi: “Hompa kuna tanta asi ngesi yimo nga teza ndjoko ezi ga tura hompa Nebukadenesara konomuhoko nadinye; eyi nga yi rugana monomvhura mbali.” Makura ame tani tundu po.
12Eyi pwa pita karuwo Hompa ta tantere nge 13ni ze kwaHananiya ni ka mu tantere asi: “Hompa kuna tanta asi, ove kuvhura o tezagure ndjoko zositji, nye age nga pinganesera po zosivera. 14Hompa Munankondo nadinye, Karunga gwaIsraeli, kuna tanta asi, nga tura ndjoko zosivera konomuhoko nadinye edi, makura ngadi ruganene hompa Nebukadenesara gwaBabironiya. Hompa kuna tanta asi noyikorama yeeyi nga yi ninka yi ruganene Nebukadenesara.”
15Makura tani tantere Hananiya eyi, tani gweda ko asi: “Purakena, Hananiya! Hompa kapi ana ku tumu, ove kuna kuninkisa tupu vantu va pure yimpempa. 16Ano Hompa mwene kuna kutanta asi ta ku gusa ko oku konauzuni. Mvhura ezi za hana kupwa to fu, morwa wa tantera vantu va vyuke Hompa.”
17Mvhura zoozo mokwedi kwautano‐nauvali Hananiya ta fu.
Currently Selected:
JEREMIYA 28: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
