JEREMIYA 27
27
Jeremiya ta likutire ndjoko zonohove
1Josiya zaSedekiya kwa za tupu mouhompa waJuda, makura Hompa ta tantere nge 2ni rugane nyamwange ndjoko noyikandjili yazo ni yi likutire konsingo. 3Makura Hompa ta tantere nge ni tume mbudi kohompa vaEdomu naMowaba naAmoni naTirusi naSidoni zi gendere movakarelipo vawo ava va wizire koJerusarema, va ya tare ko hompa Sedekiya. 4Hompa Munankondo nadinye, Karunga gwaIsraeli, ta tantere nge ni va pangere, ngava ka tantere ohompa eyi ga tanta Hompa asi: 5“Mononkondo daamwange dononene nemepangero lyange na sita uzuni novantu noyinamwenyo nayinye eyi ya kara pevhu; ame kuyipa nkenye ogu na horowora. 6Ame nyame na tura nomuhoko nadinye edi mepangero lyomuntu gwange, hompa Nebukadenesara gwaBabironiya, yiyo na ninka noyikorama yeeyi yi mu ruganene. 7Nomuhoko nadinye ngadi mu ruganena, ngadi ruganena namunwendi namutekurwendi, dogoro siruwo ngasi wize sokugwa muhoko gwamwene. Makura muhoko gwendi ngagu ruganene nomuhoko dononkondo nohompa wovanene.
8“Nye nsene pa kara muhoko ndi sirongo esi sina kudira kuligava mepangero lyendi, ngano ngani si futisa koyita nokonzara nekehamba lyomukagu, dogoro tani sigi Nebukadenesara a si hanagure po nuunu. 9Walye omu purakene kovaporofete veni ndi kwankenye ogu a tanta asi age kuvhura kupumba yokomeho, yi kare yomononzodi ndi mokuzigida vadimu ndi moumpure. Navenye kumutantera asi mu dire kulimburukwa kwahompa gwaBabironiya. 10Awo kuna kumukumbagera tupu, ngava mu hwedese mo mosirongo seni. Ngani mu tjida mo, makura ngava mu hanagure po. 11Nye nsene pa kara muhoko ogu guna kuligava kwahompa gwaBabironiya gu mu ruganene, ngano ngani gu ninka gu kare mosirongo sagwene, ngava lime mapya tava kara mo. Ame Hompa nyame na yi uyunga.”
12NaSedekiya hompa gwaJuda, nage yiyo na mu tanterere asi: “Ligava kwahompa gwaBabironiya. Mu ruganena novantu vendi, makura ngo kare nomwenyo. 13Yinke ngayi ku hwedesera novantu woge, mu fe koyita nokonzara nekehamba? Eyi yiyo ana tanta Hompa asi, yiyo ngayi horokera nkenye muhoko ogu ngagu dira kuligava kwahompa gwaBabironiya. 14Walye omu purakene vaporofete ava ava mu tantere asi mwa ha ligava kwendi. Awo kuna kumukumbagera. 15Hompa mwene kwa tanta asi, kapi ga va tuma, awo nyone tupu vana kukumbagera medina lyendi. Ano age nga mu tjida mo, makura ngava mu dipage, nyamweni novaporofete ava vana kumutantera yimpempa eyi.”
16Makura ame tani tantere vapristeli novantu eyi ana tanta Hompa asi: “Mwa ha purakena vaporofete ava vana kumutantera asi emona lyontembeli ntaantani tupu li tengure ko koBabironiya. Awo kuna kumukumbagera. 17Mwa ha va purakena! Ligaveni kwahompa gwaBabironiya, ngomu kare nomwenyo! Yinke nye ngasi kerera esi sitata ndambo zomarunda? 18Nsene asi vaporofete sili ndi nsene asi nombudi zange sili va kara, va ninkeni va hundire nge, ame Hompa Munankondo nadinye, ngani dire kusiga emona eli lya hupa mo montembeli nomombara, va li tware koBabironiya.”
(19-20Hompa Nebukadenesara apa ga twere Jehoyakini zaJehoyakimu, hompa gwaJuda novagendesi vaJuda naJerusarema, ga sigire ko nongundi nemundimbe lyongoporo notutemba nemona limwe lyontembeli.)
21“Purakeneni kweyi nina kutanta ame Hompa Munankondo nadinye, Karunga gwaIsraeli, yokuhamena emona eli va siga montembeli nomombara zomoJerusarema: 22Ngava yi twara koBabironiya dogoro noku ngani yi diworoka. Makura ntani ngani yi tengwida ni yi rete pevega eli. Ame Hompa, nyame na yi uyunga.”
Currently Selected:
JEREMIYA 27: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
