JEREMIYA 26
26
Jeremiya tava mu twara kompanguro
1Jehoyakimu zaJosiya kwa za tupu mouhompa, 2Hompa ta tantere nge asi: “Ka sikame morugumbo rontembeli o ka zuvhise nayinye eyi na ku pangera asi, o ka yi tantere vantu ava vana kutunda koyitata yaJuda va ka tongamene ko. Nokusiga ko si nampili kamwe. 3Vantu mpamwe nava purakena, va hageke nonzira dawo donondona. Nsene ngava yi rugana, ngano ame ngani rundurura magazaro gange gokuhamena kezonauko eli na va gazarera, morwa yirugana yawo nayinye yoyidona.”
4 Hompa ta tantere nge ni tantere vantu asi: “Ame Hompa nyame na yi uyunga asi, nyone kulimburukwa kwange mokukwama erongo eli na mu pe, 5mokupakera mbili nonkango dovakereli vange vaporofete, ava ani tuma‐tuma kweni. One kapi mwa limburukwa rumwe kononkango dawo edi ava mu tantere. 6Nye nsene tomu kara ngorooro mouhalimburukwi, ame ngani ruganena ntembeli ezi moomu na rugene Siro, ano nomuhoko nadinye douzuni ngadi ruganesa edina lyositata esi ngefingo.”
7Vapristeli novaporofete novantu navenye va zuvhire ko, apa na uyungire yininke eyi montembeli. 8Nye tupu na mene kuuyunga nayinye eyi ga pangerere nge Hompa, awo makura tava kwata nge tava zigere asi: “Ove ono fire kufira sininke esi! 9Yinke ono uyungire medina lyaHompa asi ntembeli ezi ngazi fana ngwendi Siro, ano nositata esi ngava si haraganesa po, kutupu ogu nga tunga mo?” Mbunga makura tazi umbilikida nge.
10Ano vagendesi vaJuda apa va zuvhire eyi ya horokere po, makura tava genderere kutunda ko kombara, va ze kontembeli tava ya hingire pomavango gawo pErungavero lyEpe. 11Vapristeli novagendesi tava tantere vantu asi: “Muntu ogu, kuna liruganene etokoro lyonomfa, yeeyi ana uyunga yokukondjesa sitata setu. One muna lizuvhire ko nyaamweni.”
12Ame makura tani uyunga asi: “Hompa yige ga tuma nge ni ya divise nkenye eyi muna kuzuvha nina kuuyunga yokukondjesa ntembeli ezi nositata esi. 13Rundurureni yikara yeni noyininke eyi muna kurugana, makura mu limburukwe kwaHompa Karunga gweni. Nsene mu yi rugana, nage ngano nga rundurura egazaro lyendi lyokuhamena ehanauko eli ga tanta asi nga li mu retera. 14Kombinga zange ko nye, ame momawoko geni na kara! Kurugana nge tupu moomu yina mu wapere nomu yina mu hungamene. 15Nye eyi nomu diva yeyi asi: nsene tomu dipaga nge, makura none vantu womositata esi ngomu kara nonzo zokudipaga muntu ga hana nzo, morwa Hompa yige ga tuma nge ni ya mu pe erondoro eli.”
16Makura vagendesi novantu tava tantere vapristeli novaporofete asi: “Mugara ogu kuna kutuuyungira medina lyaHompa Karunga gwetu; nokuwapa si kumudipaga.”
17Ya pwa oyo, masimbi gamwe taga katuka ga tantere vantu ava va pongere asi: 18“Apa ga kere Hisikiya hompa gwaJuda, muporofete Mika gomoMoresete kwa tanterere vantu navenye asi Hompa kuna kutanta asi:
‘Siyoni ngava mu purura
ngwendi epya,
Jerusarema nga kara ndambo zomarunda,
ano ntembeli ngazi kara musitu.’
19Hompa Hisikiya novantu womoJuda kapi va ninkire asi va dipage Mika. Nye Hisikiya kwa tjilire Hompa, ta kambadara kumutezagura. Makura Hompa ta rundurura egazaro lyendi lyokuhamena kosimpagwa esi ga tanta asi nga si va retera. Apa ngesi ose kuna hara tupu kuliretera nyamwetu simpagwa sosidona.”
20(Pwa kere hena mugara gumwe, Uliya zaSemaya gomoKiliyata‐Jeyalimu, ogu ga uuyungire medina lyaHompa a vyuke sitata esi nomuhoko moomu tupu ana yi rugana Jeremiya. 21Ano hompa Jehoyakimu novakwayita vendi nomarenga gendi apa va yi zuvhire, hompa ta kambadara kumudipagesa. Nye Uliya ta yi zuvhu; makura ta duka noutjirwe a ka vande koEgipte. 22Ano hompa Jehoyakimu ta tumu Eliyatani zaAkiboro novagara vamwe koEgipte va ka gwane Uliya. 23Tava ka mu reta kwahompa Jehoyakimu, ta ya mu dipagesa, makura tava mu horeke momayendo govantuuntu tupu.)
24Nye morwa ame Jeremiya kuna kwafa nge Ahikamu zaSafani, yiyo vana dilire kugava nge kovantu va dipage nge.
Currently Selected:
JEREMIYA 26: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
