JEREMIYA 25
25
Nkore zokoMuzogo
1Momumvho gwaune ogu ga kere Jehoyakimu zaJosiya mouhompa, yimo na gwene mbudi zokutunda kwaHompa zokuhamena kovantu navenye vaJuda. (Ezi yizo mvhura zokuhova zaNebukadenesara mouhompa waBabironiya.) 2Ame kwa tanterere vantu navenye vaJuda naJerusarema asi: 3“Kutunda komumvho gomurongo nantatu ogu ga kere Josiya zaAmoni mouhompa waJuda, dogoro naina ngesi, ano nomvhura nomurongo mbali nye nantatu dina piti po, Hompa kwa uyungisa nge. Ano ame kapi na nyoka rumwe kumutantera eyi ga tanta. Nye one nokuyipakera si mbili. 4Kapi ngomu purakene ndi mu yi pakere mbili, mpili ngomu nga tuma‐tuma Hompa vakereli vendi vaporofete. 5Awo kwa mu tantera mu zumbe nzira zeni zoyikara youdinikarunga noyininke yoyidona eyi omu rugana, makura ngano ngomu karerere mosirongo esi ga mu pa nozinyakurweni asi ngasi kare seni sanarunye. 6Awo ngava mu tantere asi walye omu tongamene, tomu karere vakarunga peke. Hena asi mwa ha handukisa Hompa mokutongamena kweni vakarunga woyimpempa ava mwa rugana. Ngano asi kwa limburukwire kwaHompa, ngano age kapi ga mu futisa. 7Nye Hompa mwene kuna kuuyunga asi, one kwa nyoka kumupurakena. Makura yiyo mwa mu handukisa novakarunga veni woyimpempa, mu likokere nyamweni efutiso lyendi.
8“Ano moomu nye mwa dira kumupurakena, Hompa Munankondo nadinye ta tanta asi: 9‘Tani tumu vantu navenye, va tunde koMuzogo nomukereli gwange Nebukadenesara, hompa gwaBabironiya. Ngani va reta va ya rwise Juda nava va kara mo nokuyarwisa hena nomuhoko nadinye domaparambo. Tani hanagura po muhoko ogu novamaparambo vago, ngani va sige monondambo domarunda dogoro narunye, yimoneka yoyidona yokutukukisa. Ame Hompa nyame na yi uyunga. 10Ame ngani mwenekeda nonkaruko dawo dehafo nepemburo nononkalinkali dawo doyipito yononkwara. Kapi ngava paka mawoli gonoramba dawo, ano mahangu nago ngaga pira po. 11Sirongo nasinye esi ngasi kara nondambo domarunda, ngasi kara yimoneka yokutukukisa, ano nomuhoko domaparambo nga di ruganesa hompa gwaBabironiya nomvhura nomurongo ntano‐nambali. 12Konyima zeyi ntani ngani futisa Babironiya nahompa gwamo morwanzo zawo. Ngani hanagura po sirongo oso, tani si sigi monondambo domarunda dogoro narunye. 13Ame ngani futisa Babironiya noyimpagwa nayinye eyi na lipika asi ngani retera nomuhoko apa na uyungira mwaJeremiya — yimpagwa nayinye eyi va tjanga moBuke ezi. 14Vababironiya ngani va tengwidira kuwoko mweyi va rugana. Nomuhoko dononzi nohompa wovanene ngava va ninka va kare vapika vawo.’ ”
Epanguro lyaKarunga konomuhoko
15 Hompa, Karunga gwaIsraeli, kwa tanterere nge asi: “Ezi nkinda zovhinyu zina zura ehandu lyange. Zi twara konomuhoko nadinye oku na kukutuma, o ka di ninke di ka nwe mo. 16Nsene ngadi nwa mo, ngadi pundauka tadi piyagana, morwayita eyi ngani va tumina.”
17Makura tani gusa ozo nkinda mokuwoko kwaHompa, tani zi pe nomuhoko nadinye oku ga tumine nge, tani di ninki di nwe mo. 18Jerusarema noyitata nayinye yaJuda, kumwe nohompa vamo novagendesi, kwa va ninkire va nwe mo, asi ngava kare mburundu, yimoneka yoyidona yokutukukisa, hena asi vantu ngava ruganese edina lyawo ngefingiliro — moomu tupu ava yi rugana.
19-26Elikwamo lyanavenye ava ngava nwa mo nawo monkinda lyeli:
hompa gwaEgipite nomarenga gendi novagendesi vendi
Vaegipite navenye novanayirongo navenye womoEgipite;
ohompa navenye womosirongo saUsi;
ohompa navenye womoyitata yaFilisiti eyi:
Asikeroni, Gasa, Ekironi nava va hupa moAsidodo;
vantu navenye womoEdomu, Mowaba naAmoni;
ohompa navenye vaTirusi naSidoni;
ohompa navenye woyirongo yopokatji;
yitata yaDedani naTema naBusi;
vantu navenye ava ava tete nohuki dawo;
ohompa navenye vaArabiya;
ohompa navenye womazimo gomomburundu;
ohompa navenye vaSimuli naEramu naMediya;
ohompa navenye wokoMuzogo, wokoure nava wopopepi,
tunda gumwe zende mukwawo.
Nkenye muhoko konauzuni oku yiwo kunwa mo. Mokuhulilira hompa gwaBabironiya nage ta nu mo.
27Makura Hompa ta tantere nge asi: “Tantera vantu asi, ame Hompa Munankondo nadinye, Karunga gwaIsraeli nyame na kuvapangera va nwe dogoro tava korwa va ruse, dogoro tava gu nokuvhura si kukatuka, morwa yita eyi ngani tuma yi va rwise. 28Nsene va nyoka kugusa nkinda mokuwoko koge va nwe mo, to va tantere asi, Hompa Munankondo nadinye kwa tanta asi, yiwo tupu hena kunwa mo. 29Yirugana yange yehanaguro ngani yi tamekera mositata samwange. Awo kuna kugazara asi ngava litundire po nye va hana kuvafutisa ndi? Ani hawe, yiwo kuvafutisa, morwa tani tumu yita kovantu navenye vepevhu. Ame Hompa Munankondo nadinye, nyame na yi uyunga.
30“Ove ko Jeremiya, zuvhisa
nayinye eyi na tanta.
Tantera vantu ava asi:
‘Hompa nga ndunduma keguru
ta tendaukire meguru‐guru.
Nga ndundumina vantu vendi;
nga zigira ngwendi mugara
ana kulyata mandjembere.
Navenye vepevhu ngava mu zuvha,
31ezwi ngali ka liveta kooku
wa ka twa uzuni.
Hompa kuna kara noyuma
yokuvyuka nomuhoko
Nga reta vantu navenye kompanguro,
ano vadinikarunga nga va dipaga.
Hompa ana yi uyunga.’ ”
32 Hompa Munankondo nadinye ta tanta asi: Simpagwa kuna kuwiza konomuhoko tunda ogu zende ogu, ano kakunguru gomunene kuna kumupongaika oku wa ka twa uzuni. 33Mezuva olyo yimpu eyi nga dipaga Hompa, ngayi lihana kutunda kouhura ou wouzuni dogoro koukwawo. Nagumwe si ogu nga va lira, hena kapi ngava va damuna po asi va ka va vhumbike, ngava rara pevhu ngwendi nondambo doruhoho.
34Lireni, one vagendesi, one vasita wovantu vange, lireni unene! Lireni mu ligarumune mombundu. Siruwo seni sokumudipaga sina siki, one ngava mu toma ngwendi nonzwi. 35Kapi ngomu gwana evega lyokusiuka. 36-37Tomu takuma oku tomu lili keguwo, morwa Hompa mehandu lyendi ana hanagura muhoko gweni, yiyo ana sigi sirongo seni sompora monondambo domarunda. 38Hompa ana zumbu vantu vendi ngwendi nyime ana sigi munwendi. Udona woyita nehandu lyenene lyaHompa lina pirura sirongo si kare mburundu.
Currently Selected:
JEREMIYA 25: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
