JEREMIYA 24
24
Yikumba yivali yekuzu
1 Hompa kwa likidire nge yikumba yivali yekuzu eyi va tulire komeho zontembeli. (Eyi kwa kere po, apa ga ninkire Hompa Nebukadenesara gwaBabironiya a guse munwaJehoyakimu, hompa Jehoyakini gwaJuda moJerusarema a mu tware koupika koBabironiya, kumwe novagendesi vaJuda novahambuli nononkurungu.) 2Mosikumba somuhowo kwa kere mo ekuzu lyewa, eli ali howo kupya; ano mwesi sikwawo kwa kere mo ekuzu lyedona unene kapi lya wapera kulya. 3Makura Hompa ta tantere nge asi: “Yinke ono kumona?”
Ame tani limburura asi: “Ekuzu. Lyewa po ewa unene, ano eli lyedona edona unene, kapi lya wapera kulilya.”
4Makura Hompa ta tantere nge asi: 5“Ame Hompa, Karunga gwaIsraeli, kuna kuyitara asi vantu ava va twara koBabironiya yilyo ekuzu lyewa, ano awo ngani va tekura nonkenda. 6Ngani va takamesa, tani va tengwida kosirongo esi. Ngani va tunga, kapi ngani va zungurura; ngani va tapeka, kapi ngani va dura. 7Ngani va pa eharo lyokudiva nge asi nyame Hompa. Makura ngava kare vantu vange, ano ame ngani kare Hompa gwawo, morwa ngava tengwira kwange nonomutjima dawo nadinye.
8“Ano ogu ko hompa Sedikiya gwaJuda novanapolitika ava va mu kundurukida noyihupe yoVajerusarema ava va kara mosirongo esi nava va za koEgipite — ame Hompa ngani va rugana navenye ngwendi ekuzu eli lyedona unene, eli lya dira kuwapera kulya. 9Ngani va retera simpagwa sangesi asi, nomuhoko nadinye domouzuni ngadi kare noutjirwe. Vantu ngava va zora, tava va kehagura, tava va swaura oku tava va fingilire nakunye oku na va haraganesera. 10Ngani va retera yita nerumbu nehamba dogoro navenye tava pu mo mosirongo esi na va pere nozinyakurwawo.”
Currently Selected:
JEREMIYA 24: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
