JEREMIYA 23
23
Ehuguvaro lyokomeho
1Ee, yireru omu ngali digopa epanguro lyaHompa kovapangeli ava ava hanagura, tava haraganesa vantu vendi! 2Hompa, Karunga kuna kuuyunga yokuhamena vapengeli ava ava kungu vantu vendi asi: “Kapi mwa takamesa vantu vange; kwa va haraganesa yiyo mwa va tjida‐tjida. Ano ngesi tani mu futisa morwaudona ou mwa rugana. 3Ngani pongaika yihupe yovantu vange moyirongo eyi na va haraganesera, makura ngani va tengwide kosirongo savene. Ngava reta vana wovanzi, tava vhuka. 4Ame ngani tura po vapangeli wokuvatakamesa. Kapi ngava kara hena nowoma ndi asi va tukuke, ano ame kapi hena ngani va futisa. Ame Hompa, nyame na yi uyunga.”
5 Hompa ta tanta asi: “Siruwo tasi wiza, apa ngani horowora hompa, ntekuru zaNdafita zouhunga. Hompa ogo nga pangera nounongo ta rugana yoyiwa youhunga mwa za sirongo. 6Apa nga kara hompa, vantu womoJuda ngava wapa, ano ava womoIsraeli ngava kara mompora. Age ngava mu tumbura asi: ‘Hompa Muzowoli gwetu.’ ”
7 Hompa kuna kutanta asi: “Siruwo tasi wiza, apa ngava dira kugana nge asi Karunga gomwenyo ogu ga gusa Vaisraeli mosirongo saEgipite. 8Nye ngava gana nge asi Karunga gomwenyo ogu ga gusa Vaisraeli kosirongo sokoMuzogo nokoyirongo nayinye eyi na va haraganesera. Makura ngava kare mosirongo savene.”
Mbudi zaJeremiya zokuhamena vaporofete
9Mutjima gwange guna tauka,
ame kuna kumengesererera
morwamwaHompa,
morwanonkango dendi dokupongoka,
yiyo na karere
ngwendi muntu ana korwa,
muntu ogu ana lidameke mo movhinyu.
10Sirongo kuna zura vantu wokudira
kulimburukwa kwaHompa;
awo kwa kara noukaro
woudinikarunga, tava ruganesa
nonkondo dawo mepuko.
Morwa efingiliro lyaHompa
yiyo sina kulilira sirongo
nomaliro yiyo gana kukutire.
11 Hompa ta tanta asi:
“Vaporofete novapristeli
va hana karunga;
na va kwata kuna kurugana
udona nomontembeli moomu.
12Nzira ezi vana kukwama
ngazi kara musenete nodovera;
ngani va ninka va punduke
tava gu.
Tani va retere ehudi;
siruwo sefutiso lyawo tasi wiza.
Ame Hompa, nyame na yi uyunga.
13Na mono nzo zovaporofete
vaSamaliya ezi:
awo kuuyunga medina lyaBara,
yiyo ava zapwisisa vantu vange.
14Nye ame na mona vaporofete
womoJerusarema yiwo vana
kurugana po yoyidona nye unene:
awo kuhondera oku tava tanta yimpempa;
awo kukwafa vantu va rugane udona,
makura kutupu hena ogu
a hageke kurugana udona.
Kwange ame, navenye kwa yipa
ngwendi vantu womoSodoma naGomora.
15“Ano ame Hompa Munankondo nadinye kuna kuuyunga yokuhamena vaporofete vaJerusarema asi:
Ngani va pa yimeno youruru
va lye, nouhungu va nwe,
morwa va hanesa udinikarunga
mosirongo mudima.”
16 Hompa Munankondo nadinye kuna kutantera vaJerusarema asi: “Walye omu purakene eyi ava tanta vaporofete; awo kuna kumuzwida tupu ehuguvaro lyoyimpempa. Awo kumutantera eyi ava gazara, kapisi nyame na yi tanta. 17Vantu ava ava nyoka kupurakena eyi ani tanta, awo kuvatantera asi nayinye ngayi va wapa. Awo kutantera nkenye ogu ga runda mutwe asi, simpagwa kapi ngasi mu gwana.”
18Ame tani tanta asi: “Patupu pwava vaporofete ava ogu ga diva magazaro gaHompa gemehoramo. Nagumwe si ga zuvha ndi a kwate egano mbudi zendi, ndi asi a purakene ndi a pakere mbili eyi a tanta. 19Ehandu lyendi kakunguru, emupepo lyedigu eli ngali katuka konomutwe dovadinikarunga, 20alyo kapi ngali litura dogoro noku nga mana kurugana nayinye eyi ga panga. Momazuva ogo gana kuwiza, vantu vendi ngava yi kwata eyi egano nawa‐nawa.”
21 Hompa ta tanta asi: “Vaporofete ava kapi ani va tumu, nampili ngomu ava zi. Kapi na va pa rumwe mbudi, nye awo kuuyunga medina lyange. 22Ngano asi kwa diva magazaro gange gemehoramo, ngano kuzuvhisa mbudi zange kovantu vange, va va ninke va zumbe yikara yoyidona noyininke youdinikarunga eyi ava rugana.
23“Ame nyame Karunga ogu na kara napenye, kapisi pevega limwe tupu. 24Kutupu gokuvhura kuhorama apa nani dira kumumona. Kapi mwa diva asi ame kwa kara napenye nemeguru nepevhu ndi? 25Na diva eyi ava uyunga vaporofete owo ava uyunga yimpempa medina lyange, tava tanta asi nyame ani va pe nombudi dange mononzodi dawo. 26Vaporofete owo dogoro siruwoke ngava zapwisa vantu vange noyimpempa eyi ava gazara? 27Awo kugazara asi nonzodi dawo edi ava uyunga ngadi ninkisa vantu vange va divare nge, moomu va divarere nge ozinyakurwawo va tengwire kwaBara. 28Muporofete ogu ana roto nzodi, a tante asi nzodi tupu, nye muporofete ogu ana zuvhu mbudi zange, a zuvhise mbudi ozo nawa‐nawa. Rwenge nonondanda nye sili yiyo tupu ndi? 29Mbudi zange kwa fana mundiro, ndi ngwendi hamara ezi azi tavagura mamanya. 30Ame tani vyuka vaporofete ava ava gusa nkenye ogu nonkango damukwawo, ta ka di zuvhisa asi mbudi zange. 31Ame kuna kuvyuka hena vaporofete ava ava uyunga yavene, tava tanta asi kwange yina tundu. 32Purakeneni eyi nina kutanta ame Hompa! Ame kuna vyuka vaporofete ava ava zagura nonzodi dawo edi da zura yimpempa. Awo kuzagwira nonzodi edi, va zapwisise vantu vange koyimpempa yawo nokomalinenepeko gawo. Kapi ani va tumu ndi ni va pangere asi va ze, navene kutupu sikwafo nampili kanunu kovantu vange. Ame Hompa, nyame na yi uyunga.”
Mudigo gwaHompa
33 Hompa ta tantere nge asi: “Jeremiya, nsene a ku pura gumwe povantu vange ndi muporofete ndi mupristeli asi: ‘Mbudi zaHompa zipi?’ mu tantera asi: ‘Ove mudigo kwaHompa, ano age ntaantani a ku zugume.’ 34Nsene pa kara muntu gwange gumwe ndi muporofete ndi mupristeli ogu ana kuruganesa nonkango edi asi ‘mudigo kwaHompa’, ngani mu futisa nepata lyendi. 35Ngano nkenye ogu ga fira kupura vakwawo ndi vezimo lyendi asi: ‘Elimbururo musinke ana gava Hompa? Yinke eyi ana tanta Hompa?’ 36Ano va ha ruganesa hena nonkango edi ‘Mudigo gwaHompa,’ morwa nsene nga yi hetekera gumwe, ngano ngani ninka mbudi zange zi kare nawa‐nawa mudigo kwendi. Vantu va pirura nonkango daKarunga gwawo, Karunga gomwenyo, Hompa Munankondo nadinye. 37Jeremiya makura ta pura vaporofete asi: ‘Elimbururo musinke ana mu pe Hompa? Yinke ana tanta Hompa?’ 38Ano nsene va dira kulimburukwa kompangera zange, nye va ruganese nonkango ‘Mudigo gwaHompa’, va tantera asi, 39ngani va damuna sili‐sili tani va zugumine ure name, vene ko nositata esi na va pa nozinyakurwawo. 40Makura ngani va retere nomuga neswau lyanarunye eli ngava dira kudivara nampili kanunu.”
Currently Selected:
JEREMIYA 23: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
