JEREMIYA 22
22
Mbudi zaJeremiya zokombara zaJuda
1-2 Hompa kwa tanterere nge ni ze kombara zahompa gwaJuda, ntekuru zaNdafita, ni ka tantere hompa nomarenga gendi novantu womoJerusarema eyi ga tente Hompa asi: 3“Ame Hompa kuna kumupangera yoyiwa yokuhungama. Omu popere ogu vana kunyokoma kogu ana kumunyokoma. Vanayirongo nononsigwe ndi vafisavayavawo nokuvarugana si yoyidona ndi asi mu va hepeke; nokudipagera si pevega eli lyokupongoka vantu va hana nzo. 4Nsene nye mu rugana nawa‐nawa moomu na yi mu pangere, ngano nontekuru daNdafita ngadi kara ngorooro ohompa. Vene ko nomarenga gawo novantu vawo, ngano ngava hwililira ngorooro momarungavero gombara ezi, awo moturukara toyita nokononkambe. 5Nye nsene mu dira kulimburukwa konompangera dange, tani mu gana asi, mbara ezi ngali kara erunda. Ame Hompa, nyame na yi uyunga.
6“Kwange ame mbara zaJuda kwa wapa ngwendi sirongo saGiliyata nonondundu daLibanoni; nye ngani zi ninka zi kare mburundu omu ngamu dira kutunga muntu. 7Tani tumu vantu, ngava ya zi hanagure po. Navenye ngava simba nonzimbu dawo tava ya komangere nongundi dazo donongwa dosedeli, makura tava di zugumine momundiro.
8“Konyima vanayirongo wovanzi ava ngava genda po, ngava lipura vene navene asi ame Hompa yinke na ruganena yuma yangoso kositata esi sosinene. 9Awo ngava limburura asi, yeeyi awo kwa teza egwanekero lyaHompa Karunga gwawo, tava tongamene oku tava kerere vakarunga woyimpempa vapeke.”
Mbudi zaJeremiya zokuhamena Jowahasi
10Mbunga ove zaJuda, mwa ha lira hompa Josiya; mwa ha lira nomfa dendi,
Nye lireni unene munwendi Jowahasi;
age ngava mu gusa po
kapi nga tengura hena,
si kare sirongo somvharerwa
kapi nga si mona hena.
11 Hompa ta uyunga yokuhamena Jowahasi, ogu nga pangere pevega lyoguhwe Josiya mouhompa waJuda asi: “Age ga tunda po ga za, kapi nga tengwira ko hena. 12Yeeyi kevega eli va mu twara upika, yiko nga ka fira, sirongo esi kapi nga si mona hena.”
Mbudi zaJeremiya zokuhamena Jehoyakimu
13Ga pwa kupangura mugara ogu
a dikisa embo lyendi youhahungami
makura ta li nenepeke mouhanasili;
ogu a ruganesa vakwawo mawoko‐woko
ga hana kuvafuta.
14Ga pwa kupangura mugara ogu
a uyunga asi:
“Tani litungire nzugo zonene
nononzugo dokulironda dononene.”
Makura ta tungire mo makende
ta ga pangere noyitji yomusedeli
ta kwita ko ndomo zongeha.
15Ove koge asi yi ku puke nye hompa
gomuwa, nsene o litungira nonzugo
doyitji yomusedeli
di wape kupita dovakweni ndi?
Oguhwo kwa va waperere ukaro wawo,
ava ngava rugana yoyiwa youhunga.
Makura yiyo va ragopere
mwanayinye eyi ngava rugana.
16Age nga wapeke mapongo nava woudigu,
makura tayi mu wapere nayinye.
Ano kudiva Hompa, yimo nye
kuna kutanta ngoso.
17Nye ove kulitara
pwaamoge pwelike
to dipaga ava va hana nzo,
to piyaganeke nokuhepeka vantu woge.
Hompa yige ana yi uyunga.
18Yipo nye ana kutantera Hompa,
munwaJosiya hompa
gwaJuda, Jehoyakimu asi:
“Kutupu ogu nga lira nomfa
dendi, ndi a tante asi:
‘Ee, udigu musinke nani
mukwetu, ee, udigu musi!’
Kutupu ogu nga mu lira
ndi a kuge asi:
‘Hompa gwange! Mupangeli gwange!’
19Age ngava mu vhumbika
moomu ava vhumbike
sindongili tava mu koko,
tava ka mu zugumina koure
nomarungavero gaJerusarema.”
Mbudi zaJeremiya zokuhamena sigwana saJerusarema
20Mbunga one zaJerusarema,
zendeni koLibanoni mu zigire,
zendeni kosirongo saBasani
mu kuge
zigireni kutundilira konondundu daMowaba,
yeeyi asi vahameni veni navenye
vana va zonagura po.
21 Hompa kwa mu uyungisire
apa mwa kere nerago
nye one tomu nyoka kupurakena.
Yangesi yiyo wa rugana
moukaro woge naunye,
kapi wa limburukwa rumwe kwaHompa.
22Vagendesi woge
ngali va reragura ekundungu,
vamuholi zoge ngava kara
nonkwate doyita,
sitata seni ngasi swauka tasi fu
nomuga morwayininke nayinye
yoyidona eyi mwa rugana.
23Ove ogu ono kupwizumuka
yoyiwa monosedeli
edi da tunda koLibanoni;
omu ngo rugana ngapi
nsene ngaku ku gwana kukora,
kukora ngwendi komuntu
ana kara koruzega.
Epanguro lyaKarunga kwaJehoyakini
24 Hompa kwa tanterere Jehoyakini munwahompa Jehoyakimu gwaJuda asi: “Yosili nyame ogu Karunga gomwenyo nina kugana asi, nampili ngano kalinga kange kosinongweneso kokorulyo rwange wa kere ove, ngano ngani ku pweza ko 25ni ku gave kovantu ava wa tjira, vantu ava va hara kukudipaga. Ngani ku gava kwahompa Nebukadenesara gwaBabironiya nokovakwayita vendi. 26Ame ngani mu zugumina nonyoko moupika. Ngomu za kosirongo sa hana asi somvharerwa, makura ngomu ka fire kooko mouvali weni. 27Ngomu diworoka kupahukira hena sirongo esi, nye ngomu lifira kutengwira ko hena.”
28Makura ame tani tanta asi: “Age hompa Jehoyakini kuna fana nye ngwendi kavaza kokutavauka va zuguma, aka ga dira kuhepa hena muntu ndi? Yiyo nye yina mu twaresa novana vendi koupika kosirongo esi va dira kudiva ndi?”
29Ani sirongo, sirongo, sirongo!
Purakena eyi ana tanta Hompa asi:
30“Mugara ogu kuna mu tokwere
a zumbanese vana vendi
nga kare mugara ga hana
kuragopa hena nampili kanunu.
Kapi nga paka nontekuru
dukupangura moJuda
ngovakwami vaNdafita.
Ame Hompa nyame na yi uyunga.”
Currently Selected:
JEREMIYA 22: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
