JEREMIYA 21
21
Ehanaguro lyaJerusarema tava li divisa
1Hompa Sedekiya gwaJuda kwa tumine Pasihuru zaMarakiya nomupristeli Sefanya zaMaseya kwange nonkango ezi asi: 2“Na kanderere, tu uyungira kwaHompa, yeeyi asi hompa Nebukadenesara gwaBabironiya kumwe novakwayita vendi, vana umbilikida sitata. Hompa mpamwe na tu ruganena po sitetu, Nebukadenesera makura a tu sige.”
3 Hompa ta tantere nge, makura ame tani tantere vagara ava va tumine 4va ka tantere Sedekiya asi Hompa, Karunga gwaIsraeli kuna tanta asi: “Sedekiya, ame tani zi ni ka hanagure vakwayita woge ava vana kurwisa hompa gwaBabironiya novakwayita vendi. Yirwiso yovakwayita woge, ngani ka yi pongaika pokatji kositata. 5Ano ame ngani ku rwisa paapa da hulira nonkondo dange nokuwoko kwange kononkondo nehandu lyokuhwama ngomundiro. 6Ame ngani dipaga nkenye ogu ga kara mositata esi, vantu rambangako noyimuna. Ayo ngayi fa kehamba lyedigu lyomukagu. 7Nye ove ko nomarenga goge novantu ava vana paruka moyita nekerumbu nekehamba komukagu — namuvenye ngani mu siga a mu kwate hompa Nebukadenesara kumwe novakwayita vendi, ava vana hara kumudipaga. Nebukadenesara nga mu dipaga. Nagumwe si gomumweni nga hupisa po ndi asi a mu fire nkenda nokumuzaverera. Ame Hompa, nyame na yi uyunga.”
8 Hompa makura ta yi tantere nge, ni yi tantere vantu asi: “Purakeneni! Ame Hompa kuna kumutantera, mu horowore pokatji konzira ezi azi vyuka komwenyo nezi azi vyuka konomfa. 9Nkenye ogu nga hupa mo mositata nga fira moyita ndi kerumbu ndi kehamba. Nye ogu nga tunda mo a ze a ka di sare Vababironiya ava vana kurwisa ntaantani sitata, kapi nga fa. Age nga parura mwenyo gwendi. 10Ame nina rundurura magazaro gange asi, sitata esi, kapi ngani si tara eho, nye ngani si hanagura po. Aso ngava si gava kwahompa gwaBabironiya, makura nga si swakerere po. Ame Hompa, nyame na yi uyunga.”
Epanguro kombara zaJuda
11-12 Hompa kuna tantere nge ni gave mbudi ezi kombara zaJuda, nontekuru daNdafita asi: “Purakeneni kweyi ana kutanta Hompa. Omu takamese asi uhungami va u rugane nkenye ezuva. Muntu ogu vana kunyokoma, tomu mu popere kogu ana kumunyokoma. Nsene mu dira kuyirugana eyi, ou udona muna kurugana ngano ngau ninkisa ehandu lyange, li hwame ngwendi mundiro gokudira kuvhura kudimisa. 13Ove Jerusarema kwa kara keguru lyonomuramba, ngwendi emumanya lina tuntuka mezana. Nye ame ngani ku rwisa. One kutanta asi nagumwe si gokuvhura kuturwisa ndi asi a teze mambo getu. 14Nye ame ngani mu futisa kweyi mwa rugana. Mbara zeni ngani zi hwika, ano mundiro ngagu veveka nayinye eyi ya zi kundurukida. Ame Hompa, nyame na yi uyunga.”
Currently Selected:
JEREMIYA 21: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
