JEREMIYA 20
20
Ekondjo lyaJeremiya nomupristeli Pasihuru
1Ano mupristeli Pasihuru zaImere, ogu ga kere erenga lyenene lyoNtembeli, apa ga zuvhire tani uyunga yininke eyi, 2ta panga asi va toone nge, makura va mangerere nge pepi nErungavero lyaMbenyameni lyekeguru montembeli. 3Eyi kwa sa, Pasihuru a diture nge monomango, tani mu tantere asi: “Hompa kapi ana kukutumbura Pasihuru. Edina eli ana ku ruku yilyo ‘Utjirwe napenye’. 4-5Hompa mwene kuna tanta asi: ‘Tani ku ninki o kare utjirwe kwaamoge nokovakweni, hena ngo mona navenye tava fu konomfuro dononkore dawo. Vantu navenye womoJuda tani va tura konhi zepangero lyahompa gwaBabironiya; vamwe nga va twara nonkwate kosirongo sendi, ano ava vamwe nga va dipaga. 6Ano ove, Pasihuru, ngava ku kwata kumwe nepata lyoge nalinye, makura ngava mu tware koBabironiya. Oko yiko ngo ka fira, tava ka ku vhumbika kooko, nzega novakweni navenye ava wa tantera yimpempa.’ ”
Jeremiya ta pe Hompa usima
7 Hompa, nyove wa gombeka nge,
ame yiyo na gomoka.
Ove nonkondo wa pitakana nge,
yiyo wa funda nge.
Nkenye ogu kuna kuzora nge sirungu,
awo kuna kuswaura nge ezuva nalinye.
8Yeeyi nkenye apa nina kuuyunga,
nyame kutakuma tani zigire asi:
“Epiyagano! Ehanaguro!”
Hompa, ame nina kara yizoresa
nokuswaura nge nkenye siruwo
yeeyi nina kuudisa mbudi zoge.
9Ano nsene ni tanta asi:
“Kapi ngani diworoka hena Hompa
ndi asi ni uyunge hena medina lyendi,
makura mbudi zoge tazi fana
ngwendi mundiro
guna kutwera mwange.
Ame kukambadara ni zi mine,
nye nokuvhura si hena kuzilipakera.
10Ame kuna kuzuvha nkenye ogu
kuna kuwowota asi:
“Simpagwa sina lihanene
nkenye apa!
Tu ka yi heteni kovapangeli!”
Novakwetu vaava woponyonga
kuna ndindire
kugwa kwange, tava tanta asi:
“Nampo na lihweda, makura
ngatu mu vhulilire po,
ngatu mu rugwidire kuwoko.”
11Nye ove Hompa, kwa hama
kwange Munankondo gomunene,
ano ava ava hepeke nge ngava gwa.
Nomuga ngadi va kwata narunye,
morwa kapi ngayi va tompoka.
Nomuga dawo danarunye
da hasi kudivara.
12Nye Hompa Munankondo nadinye,
ove kukonakona vantu pauhungami;
ove wa diva yonomutjima dawo
nomatedo gawo.
Siga nge ngani yi tare omu ngo
va rugwida kuwoko,
yeeyi nonkango dange dompanguro
koge nina di gava.
13Dimbireni Hompa
Hamberereni Hompa!
yeeyi age kuyoworora ava
ava hepeke
kononkondo dovantu wovadona.
14Fingilira ezuva lyehampuruko lyange!
Ove o divare ezuva eli
va hampuruka nge onane!
15Va mu fingilire ogu ga ya hafesere
otate, a ya va tantere mbudi asi:
“Vana ku hampurukire muna gomugara!”
16Ngano ta kara ngwendi yitata
eyi ga hanagwire Hompa
ga hana nkenda.
Age ngano a zuvhe nkugo
zokanyando ngurangura
noyita yopomutwekatji,
17morwa age kapi ga dipagera nge
mezimo lyonane
asi va kare ntoko zange.
18Yinke na tundira mezimo lyonane
ni ya mone udigu neguwo,
makura mazuva gange ngaga
hagere meswawu?
Currently Selected:
JEREMIYA 20: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
