JEREMIYA 19
19
Kavaza kokutauka
1 Hompa kwa tanterere nge ni ka rande kavaza kerova. Age ta tantere nge hena asi ni piture ko masimbi gamwe gombunga novapristeli vamwe wovanene, 2tu pwagere merungavero lyoyikwangwa tu ze koMuramba gwaHinomu. Oko yiko nani ka udisira mbudi ezi na ka tantera nge. 3Hompa ta tantere nge ni ka tante asi: “One ohompa vaJuda novantu ava mwa kara moJerusarema, purakeneni kweyi nina kutanta ame Hompa Munankondo nadinye, Karunga gwaIsraeli. Evega eli tani li retere udona. Ano nkenye ogu nga yi zuvha, matwi gendi ngaga hagara asi ndjee. 4Eyi ngani yi ruganena, morwa vantu va zumba nge yiyo va nyateka evega eli pokuzamberera nonzambo apa kovakarunga vapeke, vakarunga ava va dira kudiva rumwe, nozinyakurwawo si nohompa si vaJuda. Awo kwa zwida evega eli honde zovantu va hana nzo, 5makura yiyo va tungira Bara yizambero va swakererere po vana vawo asi yizo nzambo. Ame kapi na yi va pangera rumwe asi va yi rugane eyi; nayene kapi ya wiza ko rumwe komutjima gwange. 6Ano siruwo tasi wiza apa ngava dira kulitumbura hena evega eli asi Tofeti ndi asi Muramba gwaHinomu. Nye ngava li tumbura asi Muramba goMadipagero. 7Mevega eli yimo ngani zonagwilira magazaro gaJuda naJerusarema. Ame ngani ninka nonkore dawo di va funde, makura ngadi va dipagere moyirwa. Yimpu yawo ngani yi gava yi kare nondya doyidira noyikasama. 8Ngani retera ezonauko lyenene sitata esi asi nkenye ogu nga pita po nga tetuka tagu mu pwaga. 9Nonkore ngadi kundurukida sitata, tava kambadara kudipaga vantu vamo. Ekundurukido ngali kara lyedigu, makura vantu womositata ngava lilyaalye vene navene, novana vawo vaava yiwo ngava lya.”
10 Hompa kwa tanterere nge asi ni dipagere kavaza komeho zava va zire name 11oku tani va tantere asi, Hompa Munankondo nadinye ta tanta asi: “Ngani tavagura vantu ava nositata esi, ngasi kare ngwendi kavaza kokutavauka kokudira kuvhura kuwapukurura. Vantu ngava vhumbika vafe vawo nomoTofeti moomu, morwa kutupu evega lyokuvavhumbika. 12Tani tumbwidire asi sitata esi novantu vamo ngani va ninka va fane ngwendi Tofeti. 13Nonzugo daJerusarema nononzugo dohompa vaJuda nononzugo nadinye donondunda edi ngava swakererere manganganga gedumba lyewa nombungururu noku ngava tjisire vhinyu zi kare nzambo zovakarunga peke — nadinye ngadi nyata ngwendi Tofeti.”
14Makura tani tundu mo moTofeti, omu ga tumine nge Hompa ni ka zuvhise mbudi zendi. Tani zi ni ka sikame morugumbo roNtembeli, ni tantere vantu navenye 15asi Hompa Munankondo nadinye, Karunga gwaIsraeli, kuna kutanta asi: “Tani retere sitata esi noyitata nayinye yopopepi mafutiso nagenye aga na tanta asi ngani ga rugana, morwa one kwa runda nomutwe, kapi omu zuvhu eyi ani tanta.”
Currently Selected:
JEREMIYA 19: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
