JEREMIYA 18
18
Jeremiya ponzugo zomuhongi goyipako yerova
1 Hompa kwa tanterere nge asi: 2“Gurumuka o ze kembo lyomuhongi goyipako yerova, yiko nani ka ku tanterera nonkango dange.” 3Ame makura tani gurumuka kembo lyomuhongi goyipako, tani ka mu gwana, age kuna kuhonga apa a hongere. 4Ano sipako apa sa zonaukire, age makura ta gusa erova ta li hongorora sipako sapeke.
5 Hompa ta tantere nge hena asi: 6“Mbunga ove zaIsraeli, sili nye ame kapi ya fira nge yokukurugana ngwendi gogu muhongi goyipako yerova ndi? Tara, moomu ono kumona erova momawoko gomuhongi goyipako, nove momawoko gange ngorooro yimo ngo kara mo. 7Nsene asi ame nkenye ruveze ngani uyunga asi, tani zi ni ka dure nokutezagura po ndi kuharaganesa po nkenye muhoko ndi sirongo, 8makura muhoko ogo gu litezurure koudona wago, makura ngano ngani gu fira nkenda, ni dire kuguruganena eyi nkare ni gu ruganene. 9Ano kombinga zimwe, nsene ame tani zi ni ka gu tapeke ndi ni ka tunge nkenye muhoko ndi sirongo, 10makura muhoko ogu gu dire kulimburukwa kwange gu rugane yoyidona, makura kapi ngani sikisa mo eyi nkare ni rugane. 11Ano nye ntaantani, tantera mbunga zomoJuda nezi zomoJerusarema asi, ame kuna va gazarere kuvavyuka oku na liwapaikire kuvafutisa. Va tantera va hageke nonzira dawo dononzo noyirugana yawo yoyidona.
12Nye awo tava tanta asi: ‘Oyo ose nayimwe si, ose tatu rundu ngorooro nomutwe nokusikisa mo maudona getu.’ ”
Mbunga tazi nyoka Hompa
13 Hompa ta tanta asi:
“Pureni nkenye muhoko,
nsene sininke sokufana ngesi
sa horoka rumwe.
Mbunga zaIsraeli kuna rugana
sininke sosidona unene!
14Nani nondungu daLibanoni
kukara da hana yiterengenze?
Nomukuro dendi donontenda
dokonondundu nani kapi adi pwire.
15Mbunga zange zina divara nge;
azo kuna kuswakererera nonzambo
vakarunga woyimpempa.
Awo vana zapuka monzira,
ezi va hepa kugenda.
Awo kapi hena vana kukwama
nonzira danare,
nye kuna kugenda mononzira
edi va dira kudidilika.
16Awo kuna ninki sirongo esi
si kare siponga
va si swaure dogoro narunye.
Navenye ava ngava genda po
ngayi va tetura eyi ngava mona.
Awo ngava puka‐puka nomutwe
dawo mokutetuka.
17Ame ngani haraganesa vantu vange
komeho zononkore dawo,
ngwendi mbundu zompepo zokoUpumezuva.
Ame ngani va pa nyima;
kapi ngani va kwafa
apa ngau va gwana udigu.”
Ekanderero lyaJeremiya
18Mbunga tazi tanta asi: “Tu ruganeni po yuma yokuhamena Jeremiya! Vapristeli wokuturonga narunye poveli pwetu. Ano vagara wonondunge wokutupukurura nawo poveli pwetu, rambangako novaporofete wokuudisa mbudi zaKarunga. Tu mu pangureni, ose tu hageke kupurakena eyi a uyunga.”
19Ame kuna kukanderera asi: “Hompa, zuvha eyi nina kukanderera, ove o purakene kweyi dina kuuyunga nonkore dange yokuhamena nge. 20Nani udona mfuto zeyi yoyiwa ndi? Awo kuna simine nge ekero asi ni fe mo. Diworoka apa na wizire koge ni ya uyunge pevega lyawo, asi o dire kuvahandukira. 21Ano nye ntaantani Hompa, ninka vana vawo va fe konzara, ove o va dipagere moyita. Ninka vakadi va zumbanese vagara vawo novana vawo. Ninka vagara va fe kehamba novadinkantu va fire moyita. 22Tuma mbunga zi ka homone mambo gawo, awo mokapukuru kawo va kugagane moudigu wawo. Awo kuna simine nge ekero ni fe mo, yiyo vana tege nge yiraha yi kwate nge. 23Hompa ove wa diva magazaro gawo gokudipaga nge. Wa ha va dongwenena po udona wawo, ndi asi o zuvhire nkenda nonzo dawo. Va zugumina kwina, ove o va pangwise siruwo esi ono handuka.”
Currently Selected:
JEREMIYA 18: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
