JEREMIYA 17
17
Nzo nefutiso lyaJuda
1 Hompa ta tanta asi: “Vantu vaJuda, nzo zeni kwa zi tjanga nositjangeso sosivera; azo kwa zi tjokwera monomutjima deni nokomakovhu goyizambero yeni nondungu zokawe. 2Vantu woge kutongamena koyizambero nokomafano, aga va tulira po karunga gomukadi Asera mwankenye sitji sositarara nokonondungu donondundugona 3nokonondundu domosanzara. Ame ngani ninka nonkore doge di tware ugawo woge nemona lyoge, morwanonzo edi mwa tura omo mwa za sirongo seni. 4Ngomu gava sirongo esi na mu pa, makura ngani mu ninke ngomu ruganene nonkore deni mosirongo esi mwa dira kudiva, morwa ehandu lyange kwa fana mundiro, alyo ngali twera dogoro narunye.”
Mauyungo peke‐peke
5 Hompa ta tanta asi:
“Ame ngani tokora muntu ogu
gokutunda pwange
a huguvare momuntu mukwawo
mononkondo domuntu ogu a fu.
6Age kwa fana sihwa somomburundu,
esi asi kuru mevhu lyekukutu,
mevhu lyomungwa
omu amu dili kumena yuma.
Kutupu uwa ou au mu horokere.
7“Nye ame ngani tungika muntu
ogu a huguvara mwange.
8Age kwa fana sitji esi sa kara
popepi nomukuro esi asi
twara nondandani daso komema.
Kapi asi tjira nsene mpepo
zoupyu tazi wiza,
morwa yihako yaso nkenye apa yitarara;
kutupu sinka nsene mvhura kutupu;
aso kuyima ngorooro yiyimwa.
9“Yilye gokuvhura kukwata
egano mutjima gomuntu?
Kutupu yapeke eyi ya pitakana po moyimpempa;
gwa vera unene, kwa tjinda kuveruka.
10Ame Hompa kukonakona magazaro
tani heteke nomutjima dovantu.
Ame kurugana nkenye ogu
mokuliza noyikara yendi,
mokuliza neyi a rugana.”
11Ogu a gwana yimaliva mouhanasili
kwa lifana nosidira sokukonkora
mauta aga sa dira kuutira.
Nga zumbanesa ugawo wendi
age yipo ana kuza mo moukaro,
makura pehagero egova nye lyomawoko‐woko.
12Ntembeli zetu kwa fana nkata
zouhompa zefumano,
kwa sikama kondundu zonde
kutunda ketameko.
13 Hompa, ove ehuguvaro lyaIsraeli;
navenye ava ava ku zumbu
ngava fa nomuga.
Awo ngava dongonoka po
ngwendi madina
aga va tjangera pevhu,
morwa va ku zumba,
ove Hompa,
runone romema gomawa.
Jeremiya ta hundire ekwafo lyaHompa
14 Hompa, verura nge ni waperere; yoworora nge ni yoworokerere. Ove nyove po ani panda!
15Vantu tava tantere nge asi: “Malipiko aga ga tu lipika Hompa yigo gapigo nye? Mu ninka sa nye a ga sikise mo no!”
16Nye Hompa, ame kapi na ku tumangeda rumwe asi o va retere simpagwa; kapi na va harera siruwo soudigu. Hompa, wa yi diva eyi; wa diva eyi na tanta. 17Wa ha kara situkukiso kwange; ove nyove evega lyange lyouhungami, nsene udigu una wiza. 18Fisa nomuga ava vana kutjida‐tjida nge, o sige nge po, Hompa. Va zwida woma, nye ame wa ha tjilisa nge. Va retera simpagwa o va tetagure ununu‐ununu.
Kupongora ezuva lyEsabata
19 Hompa ta tantere nge asi: “Jeremiya, zende o ka zuvhise mbudi zange pEvero lyoMbunga, eli ava hwililire neli ava pwagere ohompa vaJuda mositata; makura ntani no ka za komarungavero nagenye gaJerusarema. 20Ka tantere ohompa novantu womoJuda navenye ava va kara moJerusarema, ava ava hwililire momarungavero aga, va purakene eyi na tanta. 21Ka va tantere asi: nsene va hara nomwenyo dawo, walye ava simbi murongero mEsabata; nokusimba si yuma va hwililire momarungavero gaJerusarema 22ndi va pwagese yuma yomomambo gawo mEsabata. Walye ava rugana mEsabata; ava li tare asi ezuva lyokupongoka, moomu tupu na yi pangerere ozinyakurwawo. 23Ozinyakurwawo kapi ngava purakene nge ndi asi va yi pakere mbili. Nye awo ngava rundu nomutwe; kapi ngava limburukwa nge ndi asi va lironge kwange.
24“Tantera vantu ava asi ava limburukwe konompangera dange nadinye. Walye ava simbi murongero, va hwililire momarungavero gositata mEsabata. Ava tare Esabata asi ezuva lyokupongoka, nokurugana si yuma nampili kanunu. 25Makura ngano ohompa vawo nohompagona ngava hwililira momarungavero gaJerusarema nononkondo dosiuhompa deedi ga kere nado Ndafita. Kumwe novantu vaJuda naJerusarema, ngano ngava ronda moturukara toyita nokononkambe, ano sitata saJerusarema ngano ngasi zura nkenye apa vantu. 26Vantu ngava tunda koyitata yaJuda nokonomukunda edi da kundurukida Jerusarema; ngava tunda kosirongo saMbenyameni noponondundugona nokonondundu nokoJuda zokoMbindakano. Awo ngava reta kontembeli zange nonzambo deswakerero nononzambo, nonzambo donondya nedi domanganganga dedumba lyewa nononzambo dompandu. 27Nye ava limburukwe tava li tara Esabata asi ezuva lyokupongoka. Nokusimba mo si murongero va hwililire momarungavero gaJerusarema mezuva olyo, morwa nsene va yi rugana, ngano ngani hwika marungavero gaJerusarema mundiro. Mundiro ngano ngagu hwika nombara daJerusarema, kutupu ogu nga vhura kugudimisa.”
Currently Selected:
JEREMIYA 17: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
