JEREMIYA 16
16
Eharo lyaHompa lyokuhamena ukaro waJeremiya
1 Hompa ta tantere nge hena asi: 2“Wa ha kwara asi o retere vana mevega ngwendi lyeli. 3Tani ku tantere eyi ngayi horokera vana ava va retera omu novakurona vawo. 4Awo ngava fa kehamba lyedona, kutupu ogu nga va lira ndi a va vhumbike. Yimpu yawo ngayi rundama ngwendi nondambo doruhoho pevhu. Ngava va dipagera moyita ndi ngava fa konzara, ano yimpu yawo ngayi kara nondya doyidira noyikasama.
5“Ove nokuhwilira si membo eli lina kara nonkali. Nokuguvira si muntu nampili gumwe. Ame kapi hena ngani tungikisa vantu vange kompora ndi asi ni va hare ndi ni va fire nkenda. 6Ngawo nomuhepwe ngava fa mosirongo esi, nye nagumwe si ogu nga va vhumbika ndi asi a va lire. Nagumwe si nga liteta mwene, ndi a kurure mutwe gwendi asi a likidise ko ruhodi rwendi. 7Nagumwe si nga lya ndi a nwe nomuntu, a mu hengagwide nsene geharo lyendi ana fu. Nagumwe si nga retera mukwawo nkenda, nampili muntu ana fisa guhwe ndi zina.
8“Nokuhwilira si membo eli vana kudana sipito. Nokuhingira si nawo mu lye oku tomu nu. 9To purakene eyi nina kutanta ame Hompa Munankondo nadinye, Karunga gwaIsraeli. Ngani mwenekeda mazwi gehafo nepemburo nomazwi gelilikido goyipito yononkwara. Vantu womu ngava karera po va mone omu yina kuhoroka.
10“Apa ngo va tantera nayinye eyi, ngava ku pura asi, yinke na tokwere kuvafutisa momudona ngoso. Ngava pura asi unzoni musinke ou va zona kwaHompa Karunga gwawo. 11Makura to va tantere asi Hompa kwa tanta asi: ‘Ozinyakurweni kwa tundire kwange, tava tongamene oku tava kerere vakarunga peke. Awo kwa zumbire nge, tava nyoka kulimburukwa komarongo gange. 12Nye one ko kwa rugana yoyidona unene kupitakana ozinyakurweni. Namuvenye kwa runda nomutwe, one vadona, kapi omu limburukwa nge. 13Ano ame ngani mu gusa mo mosirongo esi ni mu zugumine kosirongo peke esi mwa dira kudiva rumwe, nozinyakurweni si nawo. Oko yiko nye ngomu ka ruganena vakarunga peke mutenya nomasiku, ano ame kapi ngani mu fira nkenda.’ ”
Mutengu gokoupika
14 Hompa ta tanta asi: “Siruwo tasi wiza apa ngava dira kugana hena vantu medina lyange asi, Karunga gomwenyo ogu ga gusa mbunga zaIsraeli moEgipite. 15Nani nye ngava gana medina lyange asi Karunga gomwenyo ogu ga gusa mbunga zaIsraeli mosirongo sokoMuzogo nomoyirongo nayinye eyi na va haraganeserere. Ame ngani va tengwida kosirongo savene, kosirongo esi na pere ozinyakurwawo. Ame Hompa, nyame na yi uyunga.”
Efutiso lyokuwiza
16 Hompa ta tanta asi: “Tani tumu vakwati wonomfi wovanzi va wize va ya kwate vantu ava. Makura ntani ngani tuma vakongo wovanzi, va va sane kwankenye ndundu nondundugona nomomakombombo gopokatji komamanya. 17Yininke nayinye eyi ava rugana, tani yi mono. Kutupu esi sa horama nge; nonzo dawo nokuvanda si sipara sange. 18Ngani va ninka va fute pwaruvali morwanzo zawo noudinikarunga vawo, yeeyi vana nyateke sirongo sange novakarunga vawo woyimpempa ava va hana mwenyo ngwendi yimpu, makura vana si zwida vakarunga woyimpempa.”
Ekanderero lyaJeremiya lyehuguvaro mwaHompa
19 Hompa, ove nyove o gamene nge to pe nge nonkondo; ove kukwafa nge moyiruwo youdigu. Nomuhoko ngadi wiza koge, di tunde oku kwa ka twa uzuni di tante asi: “Ozinyakurwetu woowo vakarunga woyimpempa yiwo va kere nawo, kutupu yapeke, nye woowo vakarunga va hana sikwafo. 20Muntu kuvhura nye a rugane vakarunga vamwene ndi? Ano nsene a yi rugana, owo vakarunga kapisi vakarunga wosili.”
21 Hompa ta tanta asi: “Ano ngesi ame kuna hara, ngani ninke nomuhoko ngadi dive nonkondo dange nounene wange; awo ngava diva asi ame nyame Hompa.”
Currently Selected:
JEREMIYA 16: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
