JEREMIYA 15
15
Epanguro lyovantu vaJuda
1Makura Hompa ta tantere nge asi: “Nampili ngano oMosesa naSamwere vana sikama po apa va likwambere nge, ngano kapi nani fira nkenda vantu ava. Va ninka va ze va tunde po pwange. 2Nsene va ku pura asi kupi nava za, to va tantere asi ame kuna tanta asi:
Vamwe kuna va tokwere nomfa dehamba lyomukagu —
oko yiko ngava za!
Vamwe kuna va tokwere nomfa domoyita —
oko yiko ngava za!
Vamwe kuna va tokwere nomfa donzara —
oko yiko ngava za!
Vamwe kuna va tokwere kuvatwara nonkwatwe —
oko yiko ngava za!
3Ame Hompa na tokora asi yininke eyi yoyidona yine ngayi va horokera: ngava va dipagera moyita; ano yimpu yawo ngadi yi koka‐koka nombwa; yidira ngayi va lya, ano yikasama tayi ya hekurura eyi yina kuhupa po. 4Ngani ninka vantu navenye womouzuni va va tukuke, morweyi ga rugana Manase zaHisikiya moJerusarema, apa ga kere hompa gwaJuda.”
5 Hompa ta tanta asi:
“Yilye nga mu retera nkenda
one Vajerusarema,
nogu nga guva mwarweni yilye?
Ogu nga wiza a ya ku tare
omu ono kerere yilye?
6One kwa zumba nge;
one kwa tungwira ko kwange nomugongo.
Yipo nye na gonwene kuwoko
kwange, ni mu hanagure po
morwa na roroka kunyikida
ehandu lyange.
7Mwankenye sitata mosirongo
tani mu zuguma kompepo
ngwendi rwenge.
Tani mu hanagura,
one vantu vange,
tani dipaga vana veni
morwa kapi mwa hageka
nonzira deni donondona.
8Mosirongo kuna zura vafisavaya
vawo, kupitakana
nondanda domuheke gekefuta.
Tani dipaga madikaini govadinkantugara,
makura ngani ninke ozinyawo
va hepe.
Ngani va gandera mohararasi
woma netjiro.
9Zinya ogu ana kuzumbanesa
vana vendi vatano‐navavali,
tadi mu pili nonkondo,
nokuhesera nokuvhura si.
Uzera wendi womutenya
una lipirura mundema;
ana swauka, ano mutjima
guna dombo.
Ame ngani ninka nonkore doge
di dipage ava vana hupu po
simpe nomwenyo.
Ame Hompa, nyame na yi uyunga.”
Jeremiya ta pe Hompa usima
10Ee, mugara musinke ame, na hana ehafo! Onane yinke va reterere nge mouzuni? Ni kare nonompata nokulitangwisa nankenye ogu mosirongo. Ame kapi na gusa makongo ndi asi ni hehere yimaliva yomuntu, nye nkenye ogu kuna kufinga nge. 11Hompa, efingo lyawo ngano li hungame, nsene asi ame kapi na kuruganena nawa nokukulikwambera, morwa nonkore dange apa da kere moudigu nomoruhodi. 12(Kutupu ogu a vhuru kutezagura yivera, unene po yivera yokorwaMuzogo eyi va vhonga‐vhonga noyivera yetasu.)
13 Hompa ta tantere nge asi: “Ame tani tumu nonkore di ka simbe ko emona nougawo wovantu vange, morwakuvapangwira nonzo edi va rugana mosirongo nasinye. 14Ame ngani va ninka va ka ruganene nonkore dawo mosirongo esi va dira kudiva rumwe, yeeyi ehandu lyange kuna fana ngwendi mundiro, ogu ngagu twera narunye.”
15Makura ame tani tanta asi: “Hompa, nani ono yi zuvhu. Diworoka nge, ove o kwafe nge. Ninka nge ni tengwide kuwoko ava ava hepeke nge. Wa ha va tarerera asi yi va tompoke yokudipaga nge. Diworoka asi mwaroge vana kusensa nge. 16Ove kuna uyungisa nge, nye ame nina purakene nkenye nkango. Ame koge na hama, ove Hompa Karunga Munankondo. Ano nonkango doge kuna zwida mutjima gwange epemburo nehafo. 17Ame kapi na hepekere ruveze rwange mokuzoragana novakwetu nokudjobwana nawo. Ame kuna kara pwarwange nina u furu, morwakulimburukwa konompangera doge. 18Eyi nani hepera simpe nani yinke? Yironda yange eyi yina kudodomena simpe nani yinke? Yisinke yina kudira kuveruka? Ove kuna hara o guvise nge ngwendi mukuro ogu agu pwire pokurombo ndi?”
19 Hompa ta mu limburura asi: “Ove nsene to tengura, tani ya ku tambura o ya kare hena mukereli gwange. Ano nsene ngo udisa mbudi zomulyo kapisi zoyimpempa, ngo kara muporofete gwange hena. Vantu yiwo ngava tengwira koge, kapisi nyove gokuza kwawo. 20Ame ngani ku ninka o kare ngwendi ekuma lyosivera sa kora. Awo ngava ku rwisa, nye kapi ngava ku funda. Ame ngani kara poge ni ku gamene ni ku yoworore. 21Ame ngani ku popera kononkondo dovadinikarunga nokovantu woyitjakangana. Ame Hompa, nyame na yi uyunga.”
Currently Selected:
JEREMIYA 15: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
