JEREMIYA 14
14
Ruteni rorunene
1 Hompa kwa tanterere nge yokuhamena koruteni asi:
2“Juda momalirankali ana kara;
yitata yendi kuna kufa,
vantu vendi kuna rara pevhu keguwo,
ano Jerusarema kuna kukuga ekwafo.
3Vanangawo kuna kutuma vantu
vawo komema;
tava zi komatope,
nye mema nokugagwana si;
tava tengura notuvaza tomawoko‐woko.
Vana rengwa oku vana fu nomuga,
makura tava horeke yipara yawo.
4Morwa mvhura kutupu ko
ano evhu lina kukuta,
nondimi dina dombo nomutjima;
tadi horeke yipara yado.
5Horongo zonkadi kuna kuzumba
munwazo gomukembe mezana
morwa wayi kutupu ko.
6Yivaradi kuna sikama kondungu
zonondundu oku tayi hesangana
ngwendi vambanze;
meho gayo gana wuvire
morwa nondya kutupu.
7Vantu vange kuna kukuga kwange asi:
‘Nampili ngomu tuna kara
vasima morwanonzo detu,
tu kwafa, Hompa moomu tupu
wa yi tumbwidira.
Ose kwa tunda ko yiruwo
yoyinzi koge;
ose kwa zona koge.
8Ove nyovelike endindiro lyaIsraeli;
nyovelike o tu parura kosimpagwa.
Yinke ono kerere ngwendi
munayirongo mosirongo setu,
ndi ngwendi mugendi gokurara mo
ezuva limwe tupu?
9Yinke ono kerere
ngwendi mugara ana tukuka,
ngwendi mukwayita dina pili
nonkondo dokukwafa?
Yosili, ove Hompa, nose wa kara!
Ose vantu woge;
wa ha tu zumba.’ ”
10Makura Hompa ta tanta yokuhamena vantu asi: “Awo kwa hara kuduka po pwange, nye kapi ngava lipangera vene. Ano ame yipo nye na dilira kuvahafera. Ngani diworoka mausima gawo aga va rugana, ngani va futise morwanonzo dawo.”
11 Hompa ta tantere nge asi “Wa ha hundira nge asi ni kwafe vantu ava. 12Nampili va dilire, ame kapi ngani purakena konkugo zawo zekwafo; ndi ngava zambere nge nonzambo deswakerero nedi donondya, kapi ngani di hafera. Nye ngani va dipagesesa koyita nokonzara nekehamba lyomukagu.”
13Makura ame tani tanta asi: “Hompa, Mupangeli, wa diva asi vaporofete kuna kutanta asi kapi ngaku kara yita ndi nzara. Morwa awo kuna kutanta asi ove kwa tu tumbwidira asi mosirongo setu ngamu kara mpora.”
14Nye Hompa ta limburura asi: “Vaporofete kuna kuuyunga yimpempa medina lyange; kapisi nyame na va tuma, hena kapi na va pa nompangera ndi asi ni uyunge nawo nkango zimwe. Mamoneko aga ava uyunga kapisi kwange aga tundu; maudiso gawo kutupu ko mulyo, gavene tupu. 15Ame Hompa, tani ku tantere eyi ngani rugana vaporofete owo na dira kutuma, nye yiyo ava uyunga medina lyange asi yita nonzara kapi ngayi gwana sirongo — ame ngani va dipagesesa koyita nonzara. 16Ano vantu ava va yi tantera nawo yiyo ngayi va lya yooyo. Yimpu yawo ngava yi zugumina mononzira daJerusarema, nagumwe si ogu nga va vhumbika. Eyi ngayi horokera navenye — rambangako novakadi vawo novana vawo wogagara nava wovakadi. Ngani va futisisa moudinikarunga wawo.”
17 Hompa makura ta pangere nge ni tantere vantu yombinga zeguwo lyange asi:
“Meho gange kuna kupupa
mahodi mutenya nomasiku,
ame ngorooro nye yimo nani lira,
morwa vantu vange vana remana unene
kuna rwarwa momudona.
18Nsene ni pwaga ni ze momazana,
tani mono yimpu yovagara
vana fire moyita;
ano ni ze moyitata, tani mono
vantu vana kufa konzara.
Vaporofete novapristeli
kuna kutwikira yirugana yawo,
nye kapi vana diva
eyi vana kurugana.”
Vantu tava likwambere kwaHompa
19 Hompa, ove kuna zumbilire nye
nuunu Juda ndi?
Kuna nyenge nye vantu
vaSiyoni ndi?
Yinke ono tu rwadekere
momudona, ngatu dire kuveruka?
Ose kuna kupapara mpora,
nye nedumba si;
kuna huguvara everuko,
nye yihuna yelike yina kuwiza
pevega lyalyo.
20Ose kwa zona koge Hompa;
tatu tongonona nonzo danyamwetu
nedi dozinyakurwetu.
21Diworoka matumbwidiro goge,
wa ha tu swaura;
wa ha retera Jerusarema nomuga,
evega lyosipundiuhompa soge sefumano.
Wa ha teza po egwanekero eli
wa paka po kumwe nose.
22Kutupu movakarunga
woyimpempa wonomuhoko
ogu a vhuru kutuma mvhura;
eguru mwalyene ko
kapi ali rokesa mvhura.
Ose moge twa huguvara ove
Hompa Karunga gwetu,
morwa nyove o rugana yininke eyi.
Currently Selected:
JEREMIYA 14: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
