JEREMIYA 13
13
Nokotje dolina
1 Hompa ta tantere nge asi ni ze ni ka lirandere nokotje dimwe ni dware; nye ta tantere nge hena asi nokuditura si momema. 2Makura tani di randa tani dwara. 3Ano Hompa ta tantere nge hena asi: 4“Zende komukuro gwaEufurata o ka di horeke odo nokotje mekero lyomamanya.” 5Makura tani zi ni ka di horeke popepi naEufurata.
6Eyi pwa pita mazuva, Hompa ta tantere nge asi ni rugwire ko koEufurata ni ka di hare odo nokotje. 7Makura tani tengwire ko, ano apa na gwene evega eli na di horekere, kwa di gwene ado dina zonauka, kutupu hena sirugana.
8Makura Hompa ta uyungisa nge hena. Ta tanta asi: 9“Ngesi yimo nye ngani haraganesa po malinenepeko gaJuda nomalinenepeko gomanene gaJerusarema. 10Vantu ava wovadona va nyoka kulimburukwa nge. Vana rundu nye unene mutwe, yiyo vana kara vadinikarunga kupitakana pwanare, makura yiyo ava tongamene tava kerere vakarunga peke. Ano nawo ngava fana ngwendi dedi nokotje edi dina pili sirugana. 11Moomu tupu adi kwata nokotje mombunda, name yimo na harere vantu vange vaIsraeli naJuda va likwaterere kwange. Ame eyi kwa yi rugana asi ngava kare vantu vange wokupanda oku tava fumadeke edina lyange; nye awo nokulimburukwa si kwange.”
Sipako sovhinyu
12 Hompa Karunga ta tantere nge asi: “Tantera Vaisraeli asi nkenye sipako sovhinyu va si zwide vhinyu. Awo ngava ku limburura asi nkenye sipako sovhinyu twa yi diva asi kusizwida vhinyu. 13Makura ove va tantera asi, ame Hompa, tani zwida vantu womosirongo esi dogoro tava korwa; ohompa, nontekuru daNdafita, vapristeli, vaporofete novantu navenye womoJerusarema. 14Makura ngani va tavagure moomu ayi tavauka yipako yerova vana kumbwandakana, va kare vakurona ndi vanona. Ezaverero nedongwenenopo ndi nkenda kapi ngayi kandana nge kokuvadipaga po.”
Jeremiya ta rondora yokuhamena malinenepeko
15One mbunga zaIsraeli, Hompa
ana mana kuuyunga!
Linunupikeni mu mu purakene.
16Fumadekeni Hompa, Karunga gweni,
paapa ana dili kureta mundema,
ngomu lipume monondundu;
paapa ana dili kupirura uzera
ou mwa huguvara
u kare ekurundema.
17Nsene kapi ngomu purakena,
ame ngani lira mokahorehore,
morwamalinenepeko geni;
ngani lira unene, mahodi gange
ngaga pupa
morwa vantu vaHompa vana va
twara moupika.
18 Hompa ta tantere nge asi: “Tantera hompa nozina va tunde ko koyipundi yawo youhompa, yeeyi nonkata dawo donongwa dina gu ko konomutwe dawo. 19Yitata yaJuda yokoMbindakano kuna yi kundurukida; nagumwe si gokuvhura kuhwilira mo. Vantu vaJuda navenye vana va twara koupika.”
20Jerusarema, tara! Nonkore doge kuna kutundilira koMuzogo! Vantu ava wa geve moutakamesi woge, ava ngo linenepekere, vapi? 21Ngapi omu ngo tanta, nsene asi vantu ava ngo gazara asi vakweni ngava ku kwata va ku pangere? Ngo kara mokukora ngwendi mukadi ogu ana kuhampuruka. 22Nsene ngo pura asi yinke yina ku horaukilire nayinye eyi — asi yinke vana tavagwire yikoverero yetu va tu hondere kononkondo — morwanonzo deni donondona. 23Muntu gomusovagani kuvhura a rundurere sipapa sendi, ndi? Ndi ngwe a liguse mavara gendi ndi? Nsene asi kuvhura, none ava omu rugana udona welike, ngano mwa lironga kurugana uwa. 24Hompa nga mu haraganesa po moomu azi haraganesa po mpepo zokomburundu rwenge. 25Age kwa tanta asi; eyi yiyo ngayi kara ruha rweni. Eyi yiyo ga tokora a yi mu ruganene, morwa mwa mu divara yiyo mwa huguvara vakarunga woyimpempa. 26Hompa mwene yige nga mu hutura yikoverero, makura nomuga deni ngadi kare poruzera. 27Age ana mu mono asi one kuna kurugana yininke eyi ga nyenga. Age ga mu mona asi one kukwama vakarunga wosipagani konondundu nomomazana, ngwendi mugara ana kukurakura mukadamukwawo ndi ngwendi nkambe zontwedu zina kukwama‐kwama nkambe zonkadi. Vantu one womoJerusarema, muna pu kumupangura! Ayo nani siruwoke ngomu kuhuka ko?
Currently Selected:
JEREMIYA 13: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
