JESAYA 9

Hompa gokomeho

1Sirongo somazimo gaSeburoni naNafitali kwa swaukire po, nye komeho ngasi gwana sirongo esi efumano, kutundilira kEfuta lyoPokatji kuvyuka korwaUpumezuva kosirongo semesinya mwina lyaJorodana, dogoro koGalireya mwene, oku va kara vanayirongo.

2Mbunga ezi azi gendagura momundema,

ngazi mona uzera wounene.

Ava va kara mosirongo

somundundumba gonomfa,

yiwo ngau minikira uzera.

3Ove kwa va pa ruhafo rorunene, Hompa;

kwa va ninka va hafe.

Awo ngava pembura kosipara soge,

ngwendi gogu a pembura

posiruwo setezo,

moomu a hafa muntu,

ntene tava ligavere eyi

vana ka kwata koyita.

4Morwa ove kwa teza ndjoko ezi

za va remenena, nosiuro esi

asi va kwata ponomugongo.

Ove kwa funda muhoko ogu

agu hepeke mbunga zoge,

moomu tupu wa fundire

vakwayita vaMidiyani nare.

5Nkenye rukaku romukwayita,

oru ngaru lyata ngwendi ru

tomone evhu,

noyikoverero eyi va galinga

mohonde, ngayi pya,

nondya domundiro ngadi kara.

6Munona kuna mu tu hampurukire!

Munona gomugara kuna mu tu pe!

Age yige nga kara mupanguli gwetu.

Age ngava mu tumbura asi:

“Mutetuli, Mupukuruli,”

“Karunga Munankondo,”

“Guhya Gwanarunye,”

“Hompa gombili.”

7Nonkondo depangero lyendi

ngadi kura ngorooro;

ano untungi wepangero lyendi

ngau kara nkenye apa mompora.

Age nga pangera ngomukwami

gwahompa Ndafita,

nonkondo dendi nga di ruganesa

pauhunga nopausili,

kutunda pwantaantani dogoro narunye.

Hompa Munankondo nadinye

yige ga tokora kurugana

nayinye eyi.

Hompa nga futisa Israeli

8 Hompa ta zuvhisa epanguro kosirongo saIsraeli nokonontekuru daJakopo. 9Mbunga nazinye zaIsraeli, nkenye ogu ga kara mositata saSamaliya, nga diva asi yige ga yi rugana eyi. Ntaantani awo kuna linenepeke oku vana litumbu. Awo kuna kutanta asi: 10“Nonzugo donodopi da gwa, nye ose ngatu tungira po domamanya. Maukuzu va ga teta po, nye ose ngatu tapeka po yitji yonosedeli dene‐dene.”

11 Hompa ana pindura nonkore dawo di va homone. 12Siliya koUpumezuva naFilisitiya koUtokero kuna zahama tuna twawo va papagure Israeli. Nye nampili ngoso, ehandu lyaHompa kapi lina litura; kuwoko kwendi hakwa gonokera mokufutisa.

13Mbunga zaIsraeli kapi za litezurura; nampili ngomu ga va futisa Hompa Munankondo nadinye, kapi va tengwira kwendi. 14Mezuva limwe tupu nga futisa Hompa vagendesi vaIsraeli nombunga zawo; nga va teta mutwe nomusira. 15Masimbi nava womadina yigo mutwe — ano musira vaporofete womarongo goyimpempa! 16Ava ava gendesa vantu ava, va va pukisa yiyo va va twaredera monzira zepuko. 17Ano Hompa kapi nga tarerera asi nampili mudinkantu gumwe nga yoworoke, age kapi nga fira nkenda nampili mufisayendi gumwe ndi nsigwe, morwa vantu navenye va hana Karunga novadinikarunga, ano nayinye eyi ava tanta yoyidona yelike. Nye nampili ngoso, ehandu lyaHompa kapi ngali litura, kuwoko kwendi ngaku gonoka ngorooro ku futise.

18Udinikarunga wombunga kuna kutwera ngwendi mundiro ogu agu veveke yihwa yomega nononhonho. Awo kutwera ngwendi mpire zomowiza ezi azi twara musi peguru. 19MorwaHompa Munankondo nadinye ana handuka, efutiso lyendi yiyo lina kutwera ngwendi mundiro omo mwa za sirongo li zonagure vantu, nkenye muntu pwarwendi. 20Nkenye oku mosirongo vantu kuna kuhopera va lye nkenye eyi vana gwana, nye nokanunu si asi nzara zawo zi va pwe. Awo kuna kulya novana vawo vaava! 21Mbunga zaManase nezi zaEfurayimi kuna kulirwanesa, makura tava lipakerere hena va rwanese Juda. Nampili ngomu ngoso, ehandu lyaHompa nokulitura si; kuwoko kwendi hakwa gonokera ku futise.

Currently Selected:

JESAYA 9: KWN

Highlight

Compare

Copy