JESAYA 10
10
1One muna pu kumupangura! One kuna kurugana noveta da hana kuzira mo, edi dina kuhepeka vantu vange. 2Ngoso yimo nye omu silike vahepwe kweyi ya va hamena noku kweyi ya hungama. Ngoso yimo nye omu gusa emona eli lya hamena kovafisavaya nokononsigwe. 3Omu ngomu rugana, nsene nga mu futisa Karunga ngapi? Ngapi omu ngomu rugana, nsene nga mu retera yihuna yokutundilira kosirongo saure? Oku ngomu dukira mu ka gwane ekwafo kupi? Emona lyeni kupi ngomu li pungura? 4Ngava mu dipagera moyita, tava mu purututa mu kare nonkwate. Nye nampili ngoso, ehandu lyaHompa nokulitura si; kuwoko kwendi ngaku gonoka ngorooro ku futise.
Hompa gwaAsiliya ngosiruganeso saKarunga
5 Hompa ta tanta asi: “Asiliya! Tani ruganesa Asiliya ngwendi mbunga zokufutisisa ava na handukira. 6Tani tumu Asiliya a ka homone muhoko gwa hana Karunga, mbunga ezi za handukisa nge. Ngani va tuma va ka hakane nokuvaka oku tava lyatagura vantu ngwendi mbundu mononzira.”
7Nye hompa gwaAsiliya kwa kara noyipanga yamwene youkorokotji momagazaro. Age kwa tokora kuhanagura nomuhoko dononzi. 8Age kuna kulikanganga asi: “Nkenye mupangeli gwange nage hompa! 9Ame kwa kwata yitata yoKalino naKarekemisi, yitata yoHamati naArupadi. Ame kwa kwata Samaliya naDamasikusi. 10Ame kwa gonona kuwoko kwange ni futise yirongo eyi ayi tongamene vakarunga woyimpempa, vakarunga woyimpempa wovanzi unene kupitakana vaJerusarema naSamaliya. 11Ame kwa hanagura Samaliya novakarunga vendi woyimpempa, ano naJerusarema nage yimo ngani mu rugana ngorooro nomafano aga ava tongamene mo.”
12Nye Hompa ta tanta asi: “Nsene ngani mana nye eyi nina kurugana kondundu zaSiyoni nomoJerusarema, ntani nye ngani futisa hompa gwaAsiliya komalikangango gendi nagenye nokomalitumbo gendi nagenye.”
13Hompa gwaAsiliya kuna kulikanganga asi: “Nayinye nyamwange na yi rugana. Ame nonkondo ame ni munongo ame nondunge. Ame kwa dongonona nomururani dopokatji konomuhoko, yiyo na gusa maugawo aga va pungura. Ava va hingilire koyipundi yepangero na va kandwira pevhu, moomu azi tu ntwedu. 14Nomuhoko domouzuni kwa kere ngwendi sikorogo sosidira, makura ame yiyo ya rerupa nge kupongaika ugawo wawo ngwendi nyame ogu nina kupongaika mauta. Nye nasimwe si esi sa ligumagwire evava; ndi asi si zahame kokana ndi asi si sive kwange!”
15Nye Hompa ta tanta asi: “Nzimbu kuvhura zi tante asi azo nene za pitakana ogu a zi ruganesa ndi? Ndi sitjaha yiso nye somulyo po kupitakana ogu a si tjahesa? Mburo kapi azi zerura muntu; muntu yige a zerura mburo.”
16 Hompa Munankondo nadinye nga tuma ehamba lyomukagu, nga futise ava vana nete ntaantani. Momarutu gawo ngamu kara mundiro ogu agu twera tagu zi. 17Karunga, uzera waIsraeli, nga kara mundiro. Karunga gokupongoka gwaIsraeli nga kara maraka gomundiro, ogu ngagu veveka po nayinye mezuva limwe tupu, noyihwa yomega yeeyi nononhonho deedi. 18Ewapo lyowiza nevhu lyewa lyomapya ngayi zonauka nuunu, moomu tupu au zonagura uvera woudona muntu. 19Ngapa hupa yitji yoyisesu unene, nomunona googu kuvhura kuyivarura.
Vasesu ngava tengura
20Siruwo ngasi wiza apa ngazi dira hena kuhuguvara mbunga zaIsraeli ezi za hupa po komuhoko ogu nkare gu va mane po. Awo ngava huguvara nawa‐nawa mwaHompa, Karunga gokupongoka gwaIsraeli. 21Vasesu womombunga zaIsraeli ava ngava tengura kwaKarunga gwawo gononkondo. 22Nampili ngomu vana kara Vaisraeli vanzi ngwendi muheke gokonontere defuta, vasesu tupu ngava tengura ko. Ehanauko kuna li pungwire vantu, nye kwa li liruganena nawa‐nawa. 23Nhi, Mupangeli, Hompa Munankondo nadinye nga reta ehanauko mosirongo mudima, moomu ga yi tanta asi yimo nga rugana.
Hompa nga futisa Asiliya
24Mupangeli, Hompa Munankondo nadinye ta tantere mbunga zendi ezi za kara moSiyoni asi: “Mwa ha va tjira Vaasiliya, nampili ngomu vana kumuhepeka moomu ngava yi rugana Vaegipite. 25Karuwogona tupu kana hupu ko ni mane kumufutisa, makura ntani nye ngani va hanagura po. 26Ame Hompa Munankondo nadinye, ngani va sepura nongora zange moomu na toonene Vamidiyani pEmanya lyaOrebu. Ngani futisa Asiliya moomu na futisire Egipite. 27Apa ngasi sika mo siruwo, ngani mu mangurara kononkondo daAsiliya, ano ndjoko zawo kapi ngazi mu remenena hena kononsingo deni.”
Ehomono lyomosirongo
28Vakwayita wononkore vana kwata sitata saAi! Vana taura Migironi! Murongero gwawo vana gu sigi moMikimasi! 29Awo kwa vindakanene nzira, makura tava ka rara moGeba! Vantu womositata saRama tava kara nowoma, ano vantu womoGibeya, sitata sahompa Sauru, tava tjwayuka. 30Kugeni, one vantu womoGalimu! Purakeneni, one vantu womoRaisa! Limburureni, one vantu womoAnatoti! 31Vantu womoMadimena naGebimu tava duka va parure nomwenyo dawo. 32Naina moveli mositata saNobo, ako yiko vana kugumagura nonyongo dawo kondundu zaSiyoni, kositata saJerusarema.
33 Hompa Munankondo nadinye nga va rwapeka ngwendi nomutayi edi vana tete kositji. Valitumbi unene novanene mo ngava va teta tava supipa. 34Hompa nga va teta moomu ava tete yitji momusitu nekuva, moomu ayi gu yitji yoyiwa po yaLibanoni.
Currently Selected:
JESAYA 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
