JESAYA 6
6
Karunga ta zigida Jesaya a kare Muporofete
1Ame kwa mwene Hompa momvhura ezi ga fire hompa Usiya. Age kwa hingilire kosipundi sendi souhompa, ana zeruka vana mu tumbu, ano erwakani lyendi kuna zwida ntembeli nazinye. 2Vaserafi kuna sikama va mu kundurukide. Nkenye ogu kwa kere nomavava gatano‐nalimwe. Nkenye muserafi kwa mu kudumikire mavava gavali kosipara sendi, ano aga makwawo gavali korutu rwendi, makwawo hena gavali gokutukisa. 3Awo kwa lizigilire vene navene asi:
“Mupongoki, Mupongoki, Mupongoki!
Hompa Munankondo nadinye Mupongoki!
Efumano lyendi kwa zwida uzuni.”
4Muhagaro gomazwi gawo, kwa nkankamesere etateko lyontembeli, ano ntembeli zene ko tazi zura musi.
5Ame tani tanta asi: “Kutupu hena endindiro lyange! Ame kuna fingi nge, yeeyi nkenye nkango azi pwaga mokana kange kwa nyata. Ame kwa tunga novantu wononkango da nyata. Nye nampili ngesi, meho gange gana mono Mupangeli, Hompa Munankondo nadinye!”
6Ano gumwe govaserafi ta wiza kwange, age kuna kutuka, ana kwaterere ekara lyomundiro alyo kuna kutwera eli ga gusire kosizambero nonompamateso. 7Ta gumu nomurungu dange nekara lyomundiro lina kutwera, ta tantere nge asi: “Ekara eli lina gumu nomurungu doge, ntaantani mausima goge gana tundu po nye, ano nonzo doge nado kuna di dongonona po.”
8Ame makura tani zuvhu Hompa ana kupura asi: “Ogu nani tuma hena yilye? Yilye na kara ntumi zetu?”
Ame tani mu limburura asi: “Nyame ogu, tuma nge!”
9Makura ta tantere nge ni ze, ni twarere vantu mbudi ezi asi: “Nampili mu purakene sokuhura kupi, kapi ngomu yi kwata egano. Ndi mu tare makurutara, kapi ngomu diva eyi yina kuhoroka.” 10Age makura ta tantere nge asi: “Govapeka magazaro govantu ava, ove o va ninke yipurupuru novatwiku, yipo va dire kumona ko nokuzuvha ko nokuyikwata egano. Awo va dire kulitezurura, ni va verure.”
11Ame tani pura asi: “Hompa, yene oyo nani siruwoke ngayi kara ngoso?”
Age ta limburura nge asi: “Dogoro paapa ngayi kara yitata mapuku — nononzugo nsene kapi ngamu kara vantu — nosirongo nsene sina kara mawoko‐woko. 12Ame ngani tuma vantu koure, ano sirongo sawo ngasi kara mapuku. 13Nampili pa ka hupe gumwe gomomurongo mosirongo, nage yige kumuharagenesa po. Age nga fana edi lyositji sounyandi ou va teta.”
(Edi lyositji sifanekeso sevareko lyepe lyombunga zaKarunga.)
Currently Selected:
JESAYA 6: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
