JESAYA 7

Mbudi kwahompa Ahasi

1Ano pomazuva gaAhasi, munwaJotamu zaUsiya, hompa gwaJuda, yipo va katukire oResini, hompa gwaSiliya kumwe naPeka zaRemaliya, hompa gwaIsraeli, va ze koJerusarema va ka mu homone, nye ya va vhulire kusigusa.

2Mbudi apa za sikire kwahompa gwaJuda asi, nonkore daSiliya dina siki nare mosirongo soVaisraeli, makura vantu vendi tava tjira unene tava kankama, moomu azi nyunganga mpepo yitji.

3 Hompa makura ta tantere Jesaya asi: “Pwaga o ze o ka gwanekere naAhasi, nyaamoge namunoge gomugara Seyare‐Jasubu. Ove to ka mu gwana konzira oku a ruganene murugani goyikoverero kouhura womuporombomba gondama ezi za kara keguru, 4mu tantera asi a takamese a liture ga ha tjira a dombe mutjima. Ehandu lyahompa Resini noVasiliya vendi neli lyahompa Peka kapi hena lina kara nosimpagwa li pite poyitare yivali yina kututuma musi. 5Siliya kumwe naIsraeli nahompa gwawo vana ku tokwere udona. 6Awo kuna kukambadara asi va rwise Juda, va tjilise vantu vamo va hame kwawo, makura va ture munwaTabeli gomugara mouhompa.

7“Nye ame Hompa, yiyo nina tanta asi, yangesi kapi ngayi horoka nampili nakauke. 8Yinke mpamwe? Yeeyi Siliya kapi sina kara hena nononkondo si pitakane Damasikusi nombara zaso. Ano naDamasikusi nage kapi ana kara nononkondo a pitakane hompa Resini. Ano nsene pana piti nomvhura nomurongo ntano‐nazimwe nantano, Israeli makura ngasi teka po kapi hena ngasi kara muhoko. 9Israeli kapi ana kara nononkondo a pitakane Samaliya nombara zendi. Ano Samaliya nage kapi ana kara nononkondo a pite hompa Peka.

“Nsene kapi muna kulididimika mepuro, kapi ngomu funda.”

Sidiviso saImanuere

10 Hompa ta tumu hena mbudi zapeke kwaAhasi asi: 11“Hundira sidiviso kwaHompa Karunga goge. Kuvhura si kare sirongo sokonhi sovafe ndi semeguru mwi.”

12Nye Ahasi ta limburura asi: “Ame kapi nani si hundira. Na nyoka kuheteka Hompa.”

13Jesaya ta di limburura asi: “Ano nye ntaantani ove ezimo lyahompa Ndafita, purakena! Ee, nani yinunu eyi omu rorora vantu, eyi muna hara mu rorore naKarunga googu? 14Ano nye Hompa mwene yige nga mu pa sidiviso esi: mukadona nga kara marutu gavali, makura nga hampuruke mumati, ogu nga ruka Imanuere. (Kutanta asi Karunga kumwe nose.) 15Ano apa nga kura a sike poruveze rokutokora mwene, vantu ngava nwa masini tava li usi. 16Ruveze oro nampili kapi runa siki mo, yirongo oyo yohompa vavali, eyi yina kumutjilisa, ngayi kara mburundu.

17“Hompa ta ku retere, nombunga zoge, nepata lyoge mudima lyosiuhompa, mazuva goudigu aga ga dira kukara po rumwe apa wa tunda ko untungi waIsraeli kwaJuda — age ta reta hompa gwaAsiliya.

18“Apa ngasi sika mo siruwo, Hompa nga siva, ngasi kare sidiviso soVaegipite ngava wize ngwendi nondi va tunde konohuro domukuro gwaNili, ano Vaasiliya ngava tunde kosirongo sawo ngwendi nonyiki. 19Awo ngava liumba‐umba monomuramba nomomakombombo gomamanya, tava mamene koyihwa nayinye yomega nokomaulisiro nagenye.

20“Apa ngasi sika mo siruwo, Hompa nga hehera mukuruli gononzwedu a tundilire mesinya mwina lyaEufurata — hompa gwaAsiliya! — makura nga ya mu kurure nonzwedu deni nonohuki dokonomutwe nokomarutu geni.

21“Apa ngasi sika mo siruwo, munafarama nampili kuna tupura ko tupu ndema zimwe noyikombo yivali, 22ngayi kanda masini gomanzi, ta gwana nayinye eyi ga hepa. Wovasesu ava ngava yoworoka va hupe mo mosirongo ngava kara nomasini nousi wokulya.

23“Apa ngasi sika mo siruwo oso, yikunino yoyindjembere yoyiwa po, nkenye esi soyindjembere eyovhi somulyo goyimaliva yosisiliveli eyovhi, ngayi mena moyihwa yomega nononhonho. 24Vantu yimo ngava ka sana nomauta gononkanza. Hawe, sirongo mudima ngasi zura nonhonho noyihwa yomega. 25Konondundu nadinye oku aku yimi nombuto ngaku zura yihwa yomega, nokuwapa si kuza ko muntu. Ngali kara evega lyokulya nongombe nononzwi.”

Currently Selected:

JESAYA 7: KWN

Highlight

Compare

Copy