JESAYA 47
47
Epanguro lyaBabironi
1 Hompa kuna kutanta asi:
“Babironi, tunda ko kosipundi
soge souhompa,
o hingire pevhu mombundu.
Pwarumwe ove kwa kere
o mukadona, sitata esi
va hana kukwata,
nye kapi hena ngo kara
mudinkantu ndi o muwa!
Ove ntaantani o mupika nye!
2Gusa munhwi o twe usura!
Gusa ko kosipara soge ewiwili!
Lihutura yikovererero yoge yoyiwa!
Tonya nohurukweva doge
o zauke mukuro!
3Vantu ngava ku mona muhere‐here;
nomuga doge ngadi moneka.
Ame ngani handuka, nye kutupu
ogu nga kava nge.”
4Karunga gokupongoka
gwaIsraeli ta tu mangurura —
edina lyendi yige Hompa
Munankondo nadinye.
5 Hompa ta tantere Babironi asi:
“Hingira melimweneneno nomomundema;
kapi ngava ku tumbura hena
asi mupangeli gonomuhoko!
6Ame kwa handukilire mbunga zange;
tani zi rugana ngwendi kapisi zange:
Ame kwa va tulire mepangero lyoge,
nye ove nokuvafira si nkenda;
novakurupe vaava ove ngo va
rugana momudona.
7Ove kwa gazara asi ngo kara
ngorooro mupangeli,
makura yiyo wa dira kuyipaka
komutjima yininke eyi,
ndi o gazare asi ngapi omu
ngayi haga nayinye.
8“Purakena kweyi,
ove wa hara yoyiwa,
ogu o gazara asi kapi wa paka sinka.
Ove kwa limona unene
ngwendi Karunga —
asi patupu hena ogu
ga ku fana.
Ove kwa gazara asi
kapi ngo kara rumwe mufisayendi
ngo zumbanese vana woge.
9Yininke eyi mouvali wayo,
ngayi ku horokera pwarumwe
tupu; mezuva limwe tupu.
Nampili ngomu o ruganesa
maumpure nagenye,
nyove tupu kuzumbanesa yoge
novana woge.
10“Ove kwa huguvarere
moudona woge;
to gazara asi nagumwe si
ana kukumona.
Unongo woge nediwo lyoge
ya ku pempukisa,
makura yiyo wa litantera
nyaamoge asi:
‘Nyame Karunga —
kutupu ogu ga fana nge.’
11Simpagwa ngasi ku gwana,
patupu kaumpure koge aka
ngaka si kandana.
Ehanauko ngali ku gwana hararasi —
ehanauko eli wa dira kurota rumwe!
12Kondja ngorooro noumpure
woge nounganga;
ove kwa yi ruganesa
kutunda unona woge.
Pamwe kuvhura ngayi ku kwafe kanunu;
pamwe kuvhura o tjilise nonkore doge.
13Ove ga ku rorora mapukururo
nagenye aga o gwana.
Vanambungururu woge
va patukire po sa nye no
va ku kwafe — ava
ava konakona nombungururu,
tava faneke mauhura geguru,
makura tava ku tantere kokana
nokana eyi ngayi ku horokera.
14“Awo ngava fana ngwendi
rwenge rokutekauka,
ano mundiro ngagu va veveka po!
Nampili vene ko kapi ngava
vhura kuliparura —
maraka gomundiro ngaga kara
goupyu unene kwawo,
kapisi mundiro gomakara
gokulidurura awo.
15Auhuru yiwo uwa woowo
ngava ku ruganena —
vanambungururu ava o
pura‐pura moukaro woge naunye.
Navenye ngava ku zumba
tava livyukire koudona wawo,
nagumwe si ogu nga hupa po
a ku parure.”
Currently Selected:
JESAYA 47: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
