JESAYA 48
48
Karunga Hompa gweyi yokomeho
1Purakeneni kweyi one mbunga zaIsraeli,
one ava mwa tundilira mwaJuda:
One kwa gene edina lyaHompa
tomu tanta asi ngomu kerera
Karunga gwaIsraeli —
nye nani kapi mwa gazarere eyi
muna kuuyunga.
2Ano napaapa ngesi simpe muna
kulinenepeka tomu tanta asi,
ose vanasitata sokupongoka,
hena asi one kwa huguvara
mwaKarunga gwaIsraeli,
gedina asi Hompa
Munankondo nadinye.
3 Hompa ta tantere Israeli asi:
“Nare‐nare na divisa eyi ngayi
kara po;
makura tani yi ninki yi horoke usimbu‐simbu.
4Na yi divire asi ove kwa runda mutwe,
o mukukutu ngwendi sivera
nosivera songoporo.
5Yipo nye na divisa nare meho zoge,
na zuvhisa yitetu ayo ya hana
kukara po simpe,
ngayi ku limbe kutanta asi
vakarunga woge woyimpempa
noupure woge yiwo
wa yi ninkisa yi horoke po.
6“Nayinye eyi na pumba
yina horoka nye;
wa hepa kupura asi madiviso
gange gosili.
Apa ngesi tani ku tantere ko hena
yimwe yapeke eyi yina kuwiza,
yihoramo eyi na dira kuhorora rumwe.
7Paapa ngesi yipo nani yi ninka
yi horoke;
patupu esi sa horoka kwanare,
ngano asi kwa horoka, ngano
kuvhura o tante asi nayinye eyi
nare na yi diva.
8Na yi diva asi ove
kapi ava ku huguvara,
hena asi ove kwa divikwa
nkenye apa asi o munzoni.
Yipo nye wa dira kuyizuvha eyi
nampili kanunu,
yiyo ka dilira kugwira mo nampili
kankango kamwe momatwi goge.
9“Mokonda zokufumadekera po
vantu edina lyange,
yiyo ngali litulira ehandu lyange;
ame ngani li kava, kapi ngani
mu hanagura po.
10Ame kwa ku heteka momundiro goruhepo,
moomu ava hemuna sisiliveli mediko.
Nye na ku mona asi ove kutupu sikwafa.
11Eyi nina kurugana kuna kuyirugana
mwaamwange — kapi ngani
tarerera asi edina lyange li swauke
ndi asi ni pe nagepeke efumano lyange,
eli lya fira kukara lyaamwange —
mwange makura.”
Koresi, mugendesi ga horowora Hompa
12 Hompa ta tanta asi:
“Purakena nge, Israeli,
mbunga ezi na zigida!
Ame nyame Karunga gomuhowo
nouhura, anihuru Karunga!
13Mawoko gange yigo ga rugana
matateko gouzuni
yiyo ga zanzumuna eguru.
Nsene ni zigida evhu neguru,
tayi wiza yene yi ya sikame.
14Yo mu ponge namuvenye,
mu purakene!
Kutupu vakarunga ava va divisa asi
mugara ogu na horowora
nga wiza a ya rwise Babironi;
age nga rugana eyi na mu harera
asi yiyo nga rugana.
15Ame nyame na uyunga
ni mu zigide;
ame kwa mu pwagesa mo
ni mu pe erago.
16Ano ntaantani hedeni kwange
mu purakene eyi nina kutanta.
Kutunda ketameko
ame kwa uyunga yokudukura,
nonkango dange nadinye kudininka
nkenye apa di sike mo.”
(Ntaantani Mupangeli Hompa
ana pe nge nonkondo dendi
yiyo ana tumu nge.)
Egazaro lyaHompa kombunga zendi
17Karunga gokupongoka gwaIsraeli,
Hompa ogu a ku parura ta tanta asi:
“Ame nyame Hompa Karunga goge,
ogu ga hara kukuronga
morwauwa waamoge
a ku likide nzira ezi no genda.
18“Ani ngano nye ngo purakene
konompangera dangiee!
Matungiko ngano ngaga ku
powomokera ngwendi
mukuro ogu agu dili kupwira!
Efundo ngano lya ku gwana
ngwendi mankupi aga
aga yeraukire konontere defuta.
19Nontekuru doge ngano da vhuka
unene ngwendi nondanda domuheke,
ano ame ngano kapi ngani va
hanagura po nampili nakauke.”
20Tundeni mo moBabironi,
dukeni mo!
Zigireni mbudi nehafo;
zi diviseni napenye asi:
“Hompa ana parura mukereli
gwendi Israeli!”
21Apa ga gendesere Hompa vantu
vendi momburundu zonkukutu,
kapi ngava hepa kenota.
Age kwa va pere mema
gokutunda memanya;
age kwa tawire emanya;
makura mema taga powomoka mo.
22 Hompa kuna kutanta asi:
“Vananzo kapi ava kara nombili.”
Currently Selected:
JESAYA 48: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
