JESAYA 46
46
1“Eli yilyo ehagero lyovakarunga vaBabironi!
Beli naNebo ngava va tongamene,
nye ntaantani kuna va rongere koyindongili,
mudigo konomugongo doyimuna yokuroroka.
2Vakarunga woyimpempa
kapi ava liparura vene,
awo kwa va kwata, yiyo va va twara.
Eli yilyo ehagero
lyovakarunga vaBabironi!
3“Purakeneni nge,
one nontekuru daJokopo,
namuvenye ava mwa hupa mo
mombunga zange.
Ame kwa ku pakera mbili
kutunda kehampuruko lyoge.
4Ame nyame ni Karunga goge,
ano ame ngani mu pakera mbili;
ame ngani mu kwafa
tani mu yoworora.
5“Ogu muna hara kuheteka name
yilye nani no?”
Yimo ana kutanta Hompa.
“Nye sili pweli ogu ga fana nge ndi?
6Vantu kupaturura nondjato dawo
tava tjokomona mo ngorodo;
awo kuheteka sisiliveli koyiviha.
Awo kuhehera muhambuli
gongorodo a hambure karunga;
makura tava tu nongoro va mu tongamene!
7Awo kuyisimba pomapepe;
tava va tura pevega, makura
tava kara poopo,
va hana kuligumagura.
Nsene a mu kanderera muntu,
nokulimburura si
ndi asi a mu parure moudigu.
8“Diworokeni eyi one vananzo
lipureni eyi na rugana.
9Diworokeni eyi ya horoka kwanare;
yi kwateni egano asi ame
nyamelike Karunga
kutupu hena ogu ga fana nge.
10Kutunda ketameko ame kwa
horora eyi ngayi wiza;
kwanare na pumba eyi ngayi horoka.
Ame kwa tanta asi magazaro
gange kapi ngaga lilimba,
ngani rugana nkenye eyi
na panga kurugana.
11Ame tani zigida mugara ogu
nga tundilira koUpumezuva;
age nga nkweura ngwendi ekuvi
a sikise mo eyi na gazara.
Nyame na yi uyunga,
nye yiyo kusika mo.
12“Purakena nge, ove mbunga
za runda mutwe,
ogu o gazara asi efundo
ure lina kara.
13Ame kuna kuhedesa ezuva
lyefundo pepi —
kapisi ure lina kara.
Ekandanga lyange kapi nali kara ko.
Ame ngani parura Jerusarema,
makura nga fumanene mo Israeli.”
Currently Selected:
JESAYA 46: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
