JESAYA 45
45
Hompa ta tura po Koresi
1 Hompa kwa horowere Koresi a
kare hompa! Age kwa mu tulire po
a kwate nomuhoko;
ta mu tumu
a guse ohompa nonkondo;
Hompa nga mu zegwilira
marungavero goyitata.
Koresi kwa mu tanterere
Hompa asi:
2“Nyamwange nyame na wapaika
nzira zoge,
kwa yerakanesa nondundu noyindundu.
Ngani tezagura marungavero gongoporo
tani zungurura yizediliso yago
3Ngani ku pa emona
lyomomundema neli
lyomomavega ga horama,
makura yipo ngo divira asi
ame nyame Hompa,
hena asi Karunga gwaIsraeli
ga ku zigida kedina.
4Ame kuna ku tulire po o kwafe
mukereli gwange Israeli,
mbunga ezi na horowora.
Ame kuna ku pe efumano lyenene,
nampili ngomu wa dira kudiva nge.
5Ame nyame Hompa;
kutupu karunga gwapeke.
Ngani ku pa nonkondo edi
ngo hepa,
nampili ngomu wa dira kudiva nge.
6Eyi kuna kuyiruganena asi navenye
kooku wa ka twa uzuni ngava dive
asi ame nyame Hompa,
kutupu karunga gwapeke.
7Nyame na sita uzera nomundema;
ame kureta etungiko nosimpagwa.
Ame Hompa nyame ani yi
rugana nayinye eyi.
8Ngani tuma efundo lyokutunda
keguru ngwendi mvhura;
evhu ngali zahama li li tambure
makura ngali temuna nombya
demanguruko nouhungami.
Ame Hompa, nyame ngani yi
ninka yi horoke eyi.”
Hompa geungo nohistoli
9Kayiga kerova kuvhura
ka tangwise muhongi gwako,
ako nye kayiga‐yiga ngwendi
tukwawo ndi?
Ndi erova kuvhura li pure muhongi
asi yinke ana kurugana ndi?
Ndi kayiga kuvhura ka sivane asi
ogu ga ka honga kapi ga yi diva?
10Pweli ogu a lipepekere kutantera
vakurona vendi asi:
“Yinke mwa ninkira nge
ni fane ngesi?”
11 Hompa Karunga gokupongoka gwaIsraeli,
ogu a paka po yokomeho,
kuna kutanta asi:
“Ove kutupu nonkondo dokupura
nge eyi ya hamena vana vange,
ndi asi o tantere nge eyi
na hepa kurugana!
12Ame nyame na sita uzuni
tani ungu vantu va kare mo.
Mononkondo dange
na zanzumuna eguru;
ame kupangera ezuva nokwedi nonombungururu.
13Nyamwange nyame na katura
Koresi a rugane a sikise mo
sitambo sange a wapeke yininke.
Ame ngani vyukisa nkenye nzira
ezi nga genda.
Nga tungurura sitata sange Jerusarema,
nga mangurura nonkwate dange.
Nagumwe si ogu ga mu hehera
ndi a mu pe mfuto zombumbo
asi a rugane eyi.”
Hompa Munankondo nadinye
ana kuyitanta.
14 Hompa kuna kutantera Israeli asi:
“Ugawo waEgipite naSudani
ngau kara woge,
ano vagara wovare womoSeba
ngava kara vapika woge;
ngava ku kwama awo moyipandeko.
Ngava tongeka nongoro koge,
tava tongonona asi:
‘Karunga noge ga kara,
gelike yige Karunga.
15Karunga gwaIsraeli ogu
a parura mbunga zendi,
Karunga ogu a lihoreke.
16Navenye ava ava rugana vakarunga
woyimpempa ngava fa nomuga;
navenye ngava swauka.
17Nye Israeli Hompa a mu parura,
ano efundo lyendi
ngali kererera narunye;
vantu vendi narumwe si
ngava swauka.’ ”
18 Hompa kwa sita eguru
age yige Karunga!
Yige ga foroma ta siti uzuni —
yige ga u ninka u korerere
dogoro narunye.
Kapi ga u sita u kare ngorooro, siporongwa,
nye kwa tura mo vantu va kare mo.
Age yige ogu ana kutanta asi:
“Ame nyame Hompa,
kutupu karunga gwapeke.
19Kapi na uyunga mokahore‐hore
ndi ni horeke sitambo sange.
Kapi na hepa kombunga zaIsraeli
asi zi papare nge mawoko‐woko.
Ame nyame Hompa,
ame kuuyunga usili;
ame kudivisa eyi ya wapa.”
Hompa gouzuni novakarunga woyimpempa vaBabironi
20 Hompa kuna kutanta asi:
“Pongeni vantu wonomuhoko,
ava mwa hupa mo;
zendeni kompanguro!
Vantu ava ava dwara vakarunga,
woyimpempa woyitji,
tava kanderere vakarunga ava
va hana kuvaparura —
vantu owo nayimwe si va diva!
21Wizeni mu lirete nyaamweni kompanguro;
vapopeli va lipuragere vene‐navene.
Yilye ogu ga divisa kwanare
eyi ngayi horoka?
Nani kapisi nyame, Hompa
Karunga ogu a parura
mbunga zendi?
Kutupu Karunga gwapeke.
22“Tengwireni nye kwange
mu paruke,
one vantu womouzuni mudima!
Nyamelike na kara po.
23Matumbwidiro gange gosili,
kapi ngaga runduruka.
Ame kwa tumbwidira nawa‐nawa
moomu na kerera po asi:
Navenye ngava wiza
tava tongekere nge nongoro
tava ganene nge.
24Awo ngava tanta asi
mwange mwelike yimo
mokugwana efundo nononkondo;
nye navenye ava va nyenga nge
ngava swauka.
25Ame Hompa ngani yoworora
nontekuru daJakopo,
makura awo ngava pandure nge.
Currently Selected:
JESAYA 45: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
