JESAYA 38
38
Uvera wahompa Hisikiya neveruko lyendi
(2 Vahompa 20:1-11; 2 Hist 32:24-26)
1Pomazuva tupu googo hompa Hisikiya kwa verere unene‐nene, pokufa ga kererere. Makura muporofete Jesaya zaAmosa ta zi kwendi ta mu tantere asi: “Hompa kuna kukutantera asi, wapaika yininke yoge nayinye, yeeyi asi kapi ngo veruka. Liwapaika, to fu.”
2Hisikiya ta pirukire kekuma ta kanderere asi: 3“Ani Hompa, diworoka omu na ku ruganena noulimburukwi nomutjima nagunye, nomu ngani kambadara narunye kurugana eyi wa harera nge asi ni yi sikise mo.” Makura Hisikiya ta tameke kulira unene‐nene.
4Makura Hompa ta pangere Jesaya 5a tengure kwaHisikiya a ka mu tantere asi: “Ame Hompa, Karunga gonyokokuru Ndafita na zuvhu ekanderero lyoge, nomahodi goge nago na ga mono; ame ngani ku ninka hena o kare nomwenyo nomumvho murongo nantano. 6Ame ngani ku parura nositata esi saJerusarema kwahompa gwaAsiliya, ano ame ngani popera ngorooro sitata esi.”
7Jesaya ta limburura asi: “Hompa nga ku pa sidiviso sokulikida asi age nga sikisa mo etumbwidiro lyendi. 8Ponzira zoyirondero ezi ga tungire hompa Ahasi, Hompa nga ninka mundwire gu tengure nontambo murongo.” Makura mundwire tagu tengura nontambo murongo.
9Apa ga verukire Hisikiya kouvera wendi, yipo ga tjangere rusumo oru rompandu asi:
10Ame kwa gazarere asi yipo
nina kuhara nye kuhingira,
makura ni ze nye mosirongo sovafe,
ngani dire hena kukara nomwenyo.
11Ame kwa gazarere asi mouzuni
ou wovanamwenyo
kapi ngani mona hena Hompa
ndi muntu gomwenyo.
12Ukaro wange kwa u
ndembekedere u hage po,
moomu azi kara tenta
ezi vana zungurura,
ngwendi ekehe eli vana tete
kongodi zokutungisa.
Ame kwa gazarere asi Karunga
ta hagesa po ukaro wange.
13Masiku mudima ngani takuma kokukora,
ngwendi nyime ana kutavagura
yisupa yange.
Ame kwa gazarere asi Karunga
ta hagesa po ukaro wange.
14Ezwi lyange kwa sitire,
tani takuma ngwendi nkutji.
Meho gange taga roroka
mokutara keguru.
Hompa, yoworora nge moudigu
ou naunye.
15Yinke eyi nani vhura kutanta?
Hompa yige ga yi rugana eyi.
Mutjima gwange kuna kukora,
kapi nina kuponyoka.
16 Hompa, ame nyove ngani
kerera, nyovelike makura;
verura nge ni kare nomwenyo.
17Udigu wange ngau lisinta
u lisitunuke mpora.
Ove kwa parura mwenyo gwange
moyimpangwa nayinye;
Ove kwa dongonona po nonzo
dange nadinye.
18Mosirongo sovafe mutupu ogu
a ku pandura;
vafe kapi ava huguvara
moulimburukwi woge.
19Vanamwenyo yiwo ava ku pandura
moomu nina kukupandura ame ngesi.
Oguhya kusansekera vana
ulimburukwi woge.
20 Hompa, ono verura nge.
Ngatu sika yiumba
tatu ku dimbire yompandu,
tu dimbe yompandu montembeli
zoge moukaro wetu naunye.
21Jesaya ta tantere hompa a ture evanda lyekuzu lyoupyu posidunda sendi, makura ta veruka. 22Hompa Hisikiya ta pura asi: “Sidiviso musinke esi nasi likida asi ngani vhura kuza kontembeli?”
Currently Selected:
JESAYA 38: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
