JESAYA 37
37
Hompa ta pura kwaJesaya epukururo
(2 Vahompa 19:1-7)
1Ano hompa Hisikiya tupu ga yi zuvha, ta taura yikovero yendi, ta dwara yikovero yononkali, makura ta zi montembeli zaHompa. 2Kutunda opo makura ta tumu Eliyakimu, erenga lyenene lyombara, nahamutjanga Sebuna novapristeli wovanene, awo kuna dwara yikoverero yononkali asi va ze komuporofete Jesaya zaAmosa. 3Eraka eli ga va tanterere va ka li gave kwaJesaya lyeli asi: “Naina ezuva lyoruhepo nehandukiro neswau. Ose kuna fana mukadi ana siki mo mokuhampuruka, nye age kutupu nonkondo dokuyirugana. 4Hompa gwaAsiliya kuna tumu erenga lyendi lyenene li ya swaure Karunga gomwenyo. Hompa Karunga goge ngano ta zuvhu eswau eli, a futise ava vana yi uyunga. Ano ove kandererera mbunga zetu ezi zina hupu po kwaKarunga.”
5Ano Jesaya apa ga zuvhire mbudi zahompa Hisikiya, 6makura ta tumu mbudi ezi kwahompa Hisikiya asi: “Hompa kuna kukutantera asi neisi no tjilira Vaasiliya nonkango dawo dokuuyunga asi Hompa kapi nga mu parura. 7Hompa nga tuma mpepo kwahompa, apa nga zuvha mutoto, makura nga tengura kosirongo sawo, oku nga ka mu dipagesera Hompa.”
Vaasiliya tava litjokagwisa tupu hena
(2 Vahompa 19:8-19)
8Erenga lyenene makura tali zuvhu asi hompa ana tundu mo moRakisi, kuna kurwa nositata sopopepi naLibuna, ta zi ko a ka mu divise. 9Nkango za ka gwene Vaasiliya asi vakwayita woVaegipite, ava ana kupitisira hompa Tirehaka gwaSudani, tava wiza va ya va rwise. Ano ogu hompa gwaAsiliya apa ga yi zuvhire, ta tumu mbilivhe kwahompa gwaJuda Hisikiya 10ta mu tantere asi: “Karunga ogu wa huguvara kwa ku tanterere asi kapi ngo za momawoko gange, nye yangoso ya ha ku govareka. 11Nyamoge amesi wa zuvha tupu asi ohompa vaAsiliya ngapi omu va rugana yirongo nayinye mokuyihanagura po. Ove nyove nye ngo paruka ndi? 12Vakarunga woyimpempa ava va hanagwire yitata eyi yozinyakurwawo, Gosani naHarani naResefu nokudipaga vantu ava va kere moBete‐Edeni nomoTerasara va mu parura ndi? 13Vahompa woyitata yaHamati naArupadi naSefaravayimu naHena naIvha kupi vana kara?”
14Hompa Hisikiya ta gusa mbilivhe konontumi ta zi resa. Makura ta zi kontembeli, ta tura ozo mbilivhe komeho zaHompa, 15ta kanderere asi: 16“Hompa Munankondo nadinye, Karunga gwaIsraeli, ogu wa hingira posipundi soge souhompa kontunda zomavava govakerubi, ohuru nyovelike Karunga, ogu o pangere yirongo nayinye yomouzuni. Ove kwa sita eguru nevhu. 17Ano ntaantani Hompa, tu zuvha ove o tare eyi yina kutuhorokera. Purakena nayinye eyi ana kutanta Senakelibu yokukuswaura ove Karunga gomwenyo. 18Hompa, natuvenye twa diva asi ohompa vaAsiliya va hanagura nomuhoko dononzi, yirongo yawo yiyo va yi paka mapuku, 19vakarunga vawo yiyo va va hwika — nye kapisi vakarunga sili, mafano tupu goyitji naga gomamanya aga va rugana vantu. 20Ano ntaantani Hompa Karunga gwetu, tu yoworora koVaasiliya, makura nomuhoko nadinye domouzuni ngadi divire po asi ohuru nyovelike Karunga.”
Mbudi zaJesaya kwahompa
(2 Vahompa 19:20-37)
21Makura Jesaya ta tumu mbudi zokusanseka yokuhamena kelimbururo lyekandererero lyakwahompa, 22ezi ga tente Hompa asi: “Sitata saJerusarema kuna kukuzora oku tasi ku swaura ove Senakelibu. 23Ogu ono sense oku to mu swaura, ove koge asi yilye? Kapi ono fumadeke nge ame Karunga gokupongoka gwaIsraeli. 24Ove kwa tuma nontumi doge di ya likangangere nge asi ove kwa kwata nondundu dononde po unene daLibanoni noturukara toge toyita natunye. Ove kwa likanganga asi ove kwa teta yitji yoyire unene yosedeli neyi yoyiwa yosiperesi, makura yiyo wa ka sika pokatjitji kowiza. 25Ove kulikanganga asi wa sima nondjombo moyirongo yapeke, hena asi nompadi dovakwayita woge da pwilika mukuro gwaNili gu kukute.
26“Kapi nye wa yi zuvha rumwe asi nayinye eyi nare na yi panga ndi? Apa ngesi kuna kuyisikisa mo nye. Nyame na ku pa nonkondo dokuninka yitata yomakuma yi kare nondambo dohando. 27Vantu ava va kere mo kapi va peke nonkondo; awo kwa va pwagere, tagu va tororoka. Awo kwa kere ngwendi yihaperera yomosanzara ndi ngwendi wayi wokumena pondundu, ou azi reragura mpepo zompyu zokoUpumezuva.
28“Nye nayinye eyi ya ku hamena na yi diva, eyi o rugana noku o zi. Na yi diva omu o katukire nge. 29Na gwana etjangwa lyomakatukiro ogo nomalitumbadeko goge. Ano ntaantani ame kuna hara ni ku hake erowo mezuru lyoge nositoma mokana koge, makura ngani ku tengwide monzira ezi wa tundilira.”
30Makura Jesaya ta tantere hompa Hisikiya asi: “Esi yiso sidiviso seyi ngayi horoka. Namumvho nokomumvhogu ngo lya ndiyandiye zelike, ano ezi ngazi kwama ko, ntani ngo vhura kukuna rukokotwa roge to zangura, to tapeke yindjembere yoge ngo lye mandjembere. 31Ava va hupa mo moJuda ngava kuyumuka ngwendi yimeno yonondandani edi da simbama mevhu eyi ayi yimi mbuto. 32MoJerusarema nokondundu zaSiyoni ngaku hupa vantu, morwa Hompa munankondo nadinye yige ga yi tokora asi ngayi horoke eyi.
33“Eyi ga tanta Hompa yokuhamena mupangeli gwaAsiliya yeyi asi: ‘Kapi nga hwilira mo mositata esi ndi asi a ponye ko nampili sikutji simwe. Va kare vakwayita woyilikandwiso kapi ngava heda pepi nositata, ndi asi va tungire ko ekuma lyokusikundurukida. 34Nga tengura nzira zeezi ga tundilira age ga hana kuhwilira mositata esi. Ame Hompa nyame nina yi uyunga. 35Ngani popera sitata esi tani si gamene, nye medina lyefumano lyaamwange nemedina lyetumbwidiro eli na tumbwidilire mukereli gwange Ndafita.’ ”
36Muengeli gwaHompa makura ta zi kokamba zoVaasiliya, ta dipaga vakwayita 185 000. Ngurangura eyi kwa sa, navenye vava kuna rwapama vana fu! 37Makura Senakelibu, hompa gwaAsiliya, ta katuka a tengure koNinivhe. 38Ezuva limwe apa ga tongamenene karunga gwendi Nisiroko montembeli, makura vana vendi vavali wovagara tava mu dipaga nonomfuro, makura tava dukire kosirongo saArarati. Munwendi gumwe gomugara Asarahadoni, ta mu kwama mouhompa.
Currently Selected:
JESAYA 37: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
