JESAYA 36
36
Vaasiliya tava kundurukida Jerusarema
(2 Vahompa 18:13-27; 2 Hist 32:1-19)
1Ano momumvho gomurongo nane gwahompa gwaJuda Hisikiya, hompa gwaAsiliya Senakelibu ta katuka a ka rwise yitata yomakumapopero yaJuda, makura ta yi kwata. 2Age makura ta tantere erenga lyendi lyekurona li ze koJerusarema li tunde moRakisi kumwe nombunga zonene zovakwayita asi va ka umbilikide hompa Hisikiya. Awo kwa tulire ponzira ezi ngava ruganene vatungi woyikoverero apa aga pupu mema. 3Vajuda vatatu makura tava zi va ka gwanekere nendi; erenga lyekurona lyomombara Eliyakimu zaHilikiya naSebuna hamutjanga gomombara naJowa zaAsafa, hamutjanga goyitjangwa yepangero. 4Erenga lyaAsiliya, makura ta va tantere asi hompa gwaAsiliya kuna hara kudiva eyi yina ninkisa hompa Hisikiya a kare nomatangano. 5Age ta pura asi: “Ove kuna kugazara asi nonkango domokana kuvhura di guse po nondunge nononkondo dovakwayita ndi? Ogu ono kugazara gokukukwafa ove kurwisa Vaasiliya nani yilye? 6Ove kuna kundindira asi Egipite nga ku kwafe, nye ayo ngayi lifana nogu ana rukisa ruwu asi mpango — nye apa ngaru teka, taru mu tjopora kokuwoko. Ano nahompa gwaEgipite yimo nga fana nage ngorooro kwankenye ogu ga mu huguvara.”
7Erenga lyokoAsiliya tali twikire ko hena asi: “Ndi one kuna hara mu tantere nge asi one kuna huguvara Hompa Karunga gweni? Nani Hisikiya kapisi yige ga hanagura po mavega gokupongoka noyizambero, makura ta tantere vantu womoJuda naJerusarema asi va tongamene kosizambero simwe tupu? 8Ame tani limbetja nove medina lyahompa. Ame ngani ku pa nonkambe mayovhi gavali, nsene ngo vhura kugwana varondi wovanzi wokudironda. 9Ngapi omu no vhura nye kukandura po ehomokero lyomupitisili gumwe po govakwayita wovakareli vahekurwange? Ove yiyo ono huguvara Egipite morwamatemba novarondi wononkambe. 10Ove kuna kugazara asi, ame kwa rwisa sirongo soge ni si hanagure po na hana ekwafo lyaHompa ndi? Hompa mwene yige ana yi rawire nge ni si rwise ni si haraganese po.”
11Eliyakimu naSebuna naJowa tava tantere erenga olyo asi: “Uyunga moRuarameya, yeeyi asi ose kuruzuvha. Wa ha uyunga Ruhebeli nose, neisi nava zuvha ko navenye ava vana kara kekuma.”
12Erenga tali limburura asi: “Ove kuna gazara asi, kweni kwelike nahekuroge ana tumu nge hompa asi ni ya mu tantere yininke eyi nayinye ndi? Hawe, ame kuna kutantera hena vantu owo vana hingire kekuma, ava ngava lya nze zawo nokunwa masitamo gavene kumwe nove.”
13Erenga lyekurona makura tali sikama, tali zigire unene moRuhebeli asi: “Purakeneni eyi ana kumutantera hompa gwaAsiliya. 14Age kuna kumurondora asi mwa ha pulisira Hisikiya a mu kumbagere. Hisikiya kapi nga vhura kumuparura. 15Ga ha mu zedagwira asi mu huguvare Hompa. Mwa ha gazara asi Hompa nga mu parura nga kondere vakwayita vaAsiliya va dire kuumbilikida sitata seni. 16Mwa ha purakena Hisikiya! Hompa gwaAsiliya kuna kumutantera mu tunde mo mositata mu ligave. Namuvenye ngava mu pulisira kulya mandjembere gokoyindjembere yeni nekuzu lyokomaukuzu geni koyitji yaamweni. One hena ngomu nwa mema gomomatope geni — 17dogoro hompa nga mu hingidike mosirongo esi sa lifana nesi seni, omu mwa kara yikunino yoyindjembere eyi ayi yimi mandjembere norukokotwa rokuninka nomboroto. 18Mwa ha pulisira Hisikiya a mu kumbagere, mu gazare asi Hompa nga mu parura. Ee, vakarunga woyimpempa wonomuhoko nye va parura tupu yirongo yawo kwahompa gwaAsiliya ndi? 19Oku vana kara ntaantani kupi nye, vakarunga woyimpempa vaHamati naArupadi? Vakarunga woyimpempa vaSefaravayimu kupi ko vana kara? Pweli gumwe mpamwe ogu ga parura Samaliya ndi? 20Ezuvake va parura vakarunga woyimpempa yirongo yawo nayinye eyi kwahompa gwetu? Eyi yina kumugazaresa asi Hompa nga vhura kuparura Jerusarema nani yinke?”
21Vantu awo pore zawo, moomu ga va tanterere hompa Hisikiya. Awo kapi va kumbwilire ko nampili nkango zimwe. 22Makura Eliyakimu naSebuna naJowa tava taura yikoverero yawo, tava zi kwaHisikiya tava ka mu sansekera eyi lya uyungire erenga lyekurona lyaAsiliya.
Currently Selected:
JESAYA 36: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
