JESAYA 35
35
Nzira zoupongoki
1Mburundu ngazi hafa,
ano nombya ngadi temuna mowiza.
2Mburundu ngazi dimba
tazi zigire kehafo;
ngazi wapa ngwendi nondundu
daLibanoni, ngali kara evhu lyewa
ngwendi mapya gaKarumeli naSaroni.
Nkenye ogu nga mona uyerere waHompa,
ta mono unene wendi
nononkondo dendi.
3Nkondopekeni mawoko aga gana gomoka,
one mu koreke nongoro dokutumpauka.
4Tantereni owo wonomutjima
dowoma asi:
“Kwateni nomutjima,
mwa ha tjira!
Karunga gweni ta wiza a ya mu parure,
ta wiza a ya tengwide kuwoko
nonkore deni.”
5Vatwiku ngava vhura kumona ko
noyipurupuru ngayi zuvha ko.
6Yirema yomondambo
ngayi lidinkura tayi dana,
ano yipurupuru ngayi dimba unene.
Nomukuro domema ngadi pupa momburundu;
7muheke goupyu ngagu kara emudiva,
nosirongo somburundu
ngasi zura marunone.
Oku va kara vambanze
ngaku kura wayi nonombu.
8Ako ngaku kara nzira zonkungwasirongo,
ezi ngava tumbura asi:
“Nzira zokupongoka.”
Munanzo nokugenda mo si;
ano egova kapi ngali pukisa ava
ava zi gendi.
9Vanyime kapi ngava kara mo
noyikasama kapi ngayi zi genda.
Ano ava ga parura Hompa
velike yiwo ngava genda mo,
va ze kembo.
10Awo ngava sika koJerusarema nehafo,
tava dimbi nokulilikida nehafo.
Awo ngava hafa narunye‐narunye,
morwakumanguruka narunye
moruhodi nemeguwo.
Currently Selected:
JESAYA 35: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
