JESAYA 34
34
Karunga nga pangura nonkore dendi
1Wizeni, one nombunga donomuhoko nadinye! Lipongaikeni mu purakene. Uzuni mudima nava navenye va kara mo, va wize oku va ya purakene. 2Hompa kuna handukire nomuhoko nadinye novakwayita vado navenye. Age kuna di pangere ehanauko. 3Yimpu yawo kapi ngava yi vhumbika, ngayi kudumana ngorooro, tayi woro edumba nsweenswe, ano nondundu ngadi geha honde. 4Ezuva nokwedi nonombungururu ngayi vhugunyuka tayi kara mbundu. Eguru ngava li ganga ngwendi buke zegango, ano nombungururu ngadi gwa moomu ayi kukumuka yihako yosindjembere noukuzu.
5 Hompa ga wapaika rufuro rwendi meguru, ano ntaantani ta kamuna nye Edomu, vantu ava ga tokwera ezonauko. 6Rufuro rwendi ngaru geha honde taru gemuka magadi, ngwendi honde nomagadi gononzwigona noyikombo eyi ava zamba nonzambo. Hompa nga zambera nzambo ezi mositata saBosera; edipago lyenene eli nga li ruganena mosirongo saEdomu. 7Vantu ngava gwa moomu adi gu nompuru nonontwedugona, ano uzuni ngau geha honde tau zura magadi. 8Esi yiso siruwo esi nga yoworora Hompa Siyoni a karere nonkore dendi nkoko.
9Nomukuro daEdomu ngadi lisitunuka teya, ano evhu lyewa ngali kara mamanya gomundiro. Sirongo mudima ngasi twera ngwendi teya. 10Ngasi twera mutenya nomasiku, ano musi ngagu kasumuka mo narunye‐narunye. Sirongo ngasi kara mapuku nomvhura nonomvhura, amo nagumwe si hena ogu nga genda mo. 11Vakakuru nomakorova yiyo ngayi gusa sirongo. Hompa nga si paka mapuku si kare ngorooro, moomu ya kere alyo esito simpe. 12Kapi ngamu kara hompa gokupangera sirongo, ano vagendesi navenye ngava pwa mo. 13Yihwa yomega nononhonho ngayi mena monombara nadinye nomoyitata yomakuma, ano vambanze novakakuru yiwo ngava tunga mo. 14Yikasama yomowiza yimo ngayi ka gonena, nompepo donondona kuna kulizigida. Ekasama lyomasiku yimo ngali wiza li papare evaga lyokupwizumukira. 15Vakakuru ngava tunga yikorogo yawo, tava utire mauta, tava konkora vana vawo, tava va rerere mo. Yiyimbi ngayi ya ponga gumwe nagumwe.
16Papara mobuke zaHompa zoyinamwenyo o rese eyi azi tanta. Pweyi yinamwenyo patupu esi ngasi zumbana, ako hena kutupu esi ngasi dira kukara nosikwawo. Hompa yige nga yi panga asi yimo ngayi kara; age mwene yige nga yi pongaika. 17Hompa yige nga yi gawinina sirongo, nkenye esi ta si pe ko. Ayo ngayi kara mosirongo nomvhura nonomvhura, makura ngasi kare sayo dogoro narunye.
Currently Selected:
JESAYA 34: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
