JESAYA 33
33
Ekanderero lyekwafo
1Nonkore detu vana di pangura! Ado kuna di hakana nokudipukisa, nampili patupu muntu ogu ana di hokora nokudipukisa. Nye ruveze rwawo rokuhokora nokupukisa, ngaru haga po. Awo vene ngava hepa, morwaehakano nekumbagero.
2 Hompa, tu fira nkenda. Ove nyove tuna huguvara. Tu popera nkenye ezuva, o tu parure pomaruveze gomaudigu. 3Apa o tu rwire, nomuhoko kuduka kendundumo lyoyita. 4Ano emona lyawo tava li toragura, tava li twara.
5Ee, yireru Hompa omu ga nenepa! Age mupangeli gwanayinye. Age nga zwida Jerusarema usili nouhungami, 6ta koreke muhoko. Age kupopera narunye vantu vendi, ta va pe mayere nonondunge. Ugawo wawo wounene wokufumadeka Hompa.
7Vagara womapenda tava kugu ekwafo. Vatumwa ava ava kambadara kuretesa po mbili kuna kulira unene. 8Nonzira donkungwasirongo, dina yipa unene, nomuntu si googu ana kudigenda. Egwanekero lina teka po nomalizuvho gana piyagana. Nagumwe si hena ogu vana kufumadeka. 9Sirongo sina kara momalirankali sina notwera. Wiza waLibanoni una kukuta. Ano muramba gondombe gwaSaroni kuna fana mburundu. MoBasani nokondundu zaKarumeli, yihako kuna kuragumuka koyitji.
Hompa ta rondora nonkore dendi
10 Hompa ta tantere nomuhoko asi: “Ntaantani ame tani rugana. Ame kuna hara ni mu likide nonkondo dange apa da hura. 11Magazaro geni kutupu ko mulyo. Nkenye eyi omu rugana kutupu ko sirugana. Mpepo zange kwa fana ngwendi mundiro ogu ngagu mu hanagura po. 12One ngomu myoka ngwendi mamanya vana kuswakerera ga kare mpezo, ngwendi mega vana kuwhika ga kare enoto. 13Nkenye ogu ana kara pepi ndi ure a zuvhe ko eyi nina kurugana a dimburure nonkondo dange.”
14Vantu wononzo womoSiyoni, kuna kumenga, una va kwata woma. Awo kuna kutanta asi: “Epanguro lyaKarunga kwa fana ngwendi mundiro ogu agu twera narunye. Pweli ogu a vhuru kuparuka komundiro gokufana ngesi?” 15Nhi, ove kuvhura o paruke, nsene to uyunga nokurugana eyi yina wapa. Walye o ruganesa nonkondo doge mokuninkilira mo nohepwe. Walye o tambura nomfuto dombumbo. Walye o likara sinanga novantu ava ava gazara kudipaga ndi kurugana yirugana yapeke yoyidona. 16Ove ngava ku yoworora, to kara megameno ngwendi gogu ono kara mepoperonzugo lya kora. Ove ngo kara nonondya dokulya nomema gokunwa.
Efumano lyokomeho
17Meho goge ngaga ka mona hompa ana kupangera mewapo lyendi sirongo sosinene sa za omo. 18Woma woge wanare wokutjira vafutisi womutero wovanayirongo nonondadi ngayi kara tupu ediworoko. 19Kapi ngo mona hena vanayirongo wovapote ava ava uyunga eraka wa hana kuzuvha. 20Tara koSiyoni, sitata omu atu danene yipito yetu yopaKarunga. Tara kwaJerusarema! Ee, evega musi lyeyoworokero lya wapera kukara! Alyo ngali kara ngwendi tenta ezi ngava dira kuzungurura. Ano nontungo dazo, kapi ngava di dura mo. Nongodi dazo nado kapi ngava di ndembura. 21Hompa nga tu likida efumano lyendi. Ose ngatu ka tunga konontere donomukuro dononene, nye yikepa yononkore kapi ngava yi duga mo. 22-23Yitungiso nayinye yoyikepa ngayi kara yomawoko‐woko. Rugendo royikepa ngaru haga po. Ose ngatu ka gusa maugawo nagenye govakwayita wononkore. Awo ngau kara wounzi unene ou ngava gwana novantu woyirema vaava. Hompa mwene yige nga kara mupangeli gwetu, ogu nga tu pangera, ta tu gamene. 24Nagumwe si gomosirongo esi twa kara nga sivana asi ta vere, ano nonzo nadinye ngava di dongonona po.
Currently Selected:
JESAYA 33: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
