JESAYA 32
32
Hompa gouhungami
1Tara, Hompa nga pangera pauhungami, ano vapangeli ngava rera pauhunga. 2Nkenye ogu powo nga kara ngwendi utjiliro wompepo ndi ngwendi uvando womvhura, ngwendi nomukuro domema mosirongo somburundu, ngwendi mundwire gemanya lyenene lyosirongo senota. 3Meho govanameho kapi ngaga wuvira, ano matwi govanamatwi ngaga zuvha ko. 4Mutjima govapipi ngagu liranga kukoneka neraka lyoyikokoma ngali genderera, tali uyunga yokufwatuka. 5Egova kapi ngava li tumbura hena asi gekuto, gomakoto kapi ngava mu ninka hena asi kwa fumana. 6Yeeyi egova kuuyunga ugova, mutjima gwalyo kuteda yoyidona, alyo kurugana ukorokotji, alyo kuuyunga yemepuko yokuhamena Hompa, age kuzumina gokufa nzara, kapi a pe mema gokufa enota. 7Mukorokotji yikwata yendi yidona, age kugazarera vahepwe yirugana yoyidona a va zonagure pokuvakumbagera, muhepwe nampili kuna mu hundire yomosili. 8Nye munauhunga kurugana youhunga, age kwa sikama mweyi youhunga.
Epanguro newapukururo
9Vakadi one mwa hingira nawa, kapi mwa kara noyinka, purakeneni eyi nina kutanta. 10Ntaantani kuvhura mu yigare, nye posiruwo ngaseesi komumvhogu ngomu limwangara, morwa kapi ngapa kara mandjembere gokunyanga. 11One kwa yigara, kapi mwa paka yinka; nye ntaantani kankameni kowoma! Lihutureni yikoverero yeni mu limange yinyakwi monombunda. 12Likwateni konomurungu mu kare meguwo, morwa mapya gomawa noyikunino yomandjembere yina hanauka po, 13ano yihwa yomega nononhonho dina mene mosirongo sombunga zange. Lireni mambo nagenye omu ngava hafa vantu nositata esi ngasi pembura. 14Nombara zeezi ngava zi zumba, ano sikurutata ngasi kara mburundu. Mambo nonohotepopero edi ngadi va gamene ngadi kara nondambo domarunda dogoro narunye. Yivaradi ngayi komena mo, ano nonzwi ngadi gwana mo mauliro.
15Nye Karunga nga tu tumina hena mpepo zendi. Sirongo sokuhekuka ngasi kara hena sosiwa, ano mapya ngaga zanguka muzangu gomunzi. 16Mosirongo nasinye ngava rugana mo uhungami nousili. 17Morwa navenye ngava rugana youhunga, makura ngamu kara mpora negameno dogoro narunye. 18Vantu vaKarunga kapi ngava kara hena nosinka, mambo gawo ngaga kara nombili negameno. (19Nye kamanya nga rokera mowiza, ano sitata ngasi zunguruka po.) 20Ee, erago musinke eli nga kara nalyo nkenye ogu lyomema gomanzi nonombuto nomaliro gomaporeza goyindongili nonongombe napenye.
Currently Selected:
JESAYA 32: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
