JESAYA 31
31
Karunga nga popera Jerusarema
1Ava ava zi koEgipite va ka papare ekwafo va pwa kupangura! Awo kwa huguvara vakwayita woVaegipite wounene wononkondo — nonkambe noturukara toyita novakwayita. Nye awo kapi va huguvara Hompa, Karunga gokupongoka gwaIsraeli, ndi asi va mu hundire ekwafo. 2Age ga diva eyi a rugana! Ta tumu simpagwa. Age kusikisa mo yirugana yendi, ta futisa vantu wovadona nava ava va popere. 3Vaegipite kapisi vakarunga — vantu tupu. Nonkambe dawo nyama, kapisi mpepo. Hompa nsene a rugana, muhoko gononkondo tagu punduka, ano muhoko gwa hana nonkondo ogu a gu kwafa tagu gu. Nadinye ngadi zonauka po.
4 Hompa kwa tantera nge asi: “Nyime ana kara perambo, vasita nampili va zigire oku tava kugu, age nombili si, name Hompa Munankondo nadinye name ngosikwawo, kutupu ogu gokukerera nge kokupopera ndundu zaSiyoni. 5Moomu asi teremba sidira kosikorogo saso si popere vana vaso, name Hompa Munankondo nadinye, name yimo ngani popera Jerusarema, tani mu gamene.”
6 Hompa ta tanta asi: “Ove mbunga zaIsraeli, ove kwa zona kwange, yiyo wa lilimba name. Ano ntaantani tengwira nye kwange! 7Siruwo ngasi wiza apa ngomu zuguma namuvenye vakarunga woyimpempa wononzo ava mwa rugana‐rugana wosisiliveli nongorodo. 8Asiliya ngazi hanauka po koyita, nye kapisi kononkondo dosintu. Vaasiliya ngava duka ko koyita, ano vamati vawo ngava va paka upika. 9Mupangeli gwawo nga duka kowoma, ano marenga ngaga kankama unene, taga zumbire mo marembe goyita.” Hompa yige ana yi tanta — Hompa ogu ava tongamene moJerusarema, nogu gomundiro ogu agu swakerere nonzambo.
Currently Selected:
JESAYA 31: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
