JESAYA 30
30
Malizuvho naEgipite gomawoko‐woko
1-2 Hompa ta tanta asi: “Ava ava pangere Juda va pwa kupangura, morwa awo kuvyuka nge. Awo kukwama magazaro ga hana asi gange, tava paka po malizuvho gokulilimba neharo lyange, va rundaike nonzo kononkwawo. Awo kuza koEgipite va ka papare ekwafo, awo va hana kuhundira epukururo lyange. Awo kwa hara asi Egipite a va popere, makura yiyo nye va huguvara hompa gwaEgipite. 3Nye hompa kapi nga kara nononkondo dokuvakwafa, ano epopero lyaEgipite ngali hagera mezonauko lyenene. 4Nampili ngomu va ka sika nare vakarelipo vawo moyitata yaEgipite yoSowana naHanesi, 5mbunga zaJuda ngazi kara neguwo asi azo kwa huguvara muhoko gwa hana mutompo, muhoko ogu gwa va twara mezome apa va hepere ekwafo.”
6Mbudi zaKarunga zokuhamena yikorama yomomburundu zokoMbindakano zezi: “Vakareli kugendagura mosirongo soyimpagwa, omu mwa kara vanyime nomazoka gouhungu nomakasama aga aga tuka. Awo kutulika nomurongero douhwi wondiro koyindongili nokonongameru dawo di ze komuhoko ogu gwa hana kuvakwafa. 7Ekwafo eli a gava Egipite kutupu sikwafa. Makura ame yiyo na ruka Egipite edina lyokumurundumuna asi: ‘Ekasama lya ha linyunganga.’ ”
Mbunga za hana kulimburukwa
8Karunga kwa tantera nge ni tjange mobuke omu va fana vantu ava, asi ngali kare esanseko lyanarunye lyomu va donapa vantu ava. 9Awo nkenye apa kuvyuka Karunga, nkenye apa kuuyunga yimpempa, nkenye apa kunyoka kupurakena komarongo gaHompa. 10-11Awo kutantera vaporofete, va mwene teete. Awo kutanta asi: “Mwa ha tu tantera eyi ya hungama. Tu tantereni eyi twa hara kuzuvha. Tu sigeni tu kare moyimpempa yetu. Tundeni mo monzira zetu, mwa ha sitika elira lyetu. Ose kapi tuna hara kuzuhva yokuhamena Karunga gokupongoka gwaIsraeli.”
12Nye Karunga gokupongoka gwaIsraeli kuna kutanta asi: “One kunyoka eyi ani mu tantere, yiyo omu huguvara moukorokotji nomoyimpempa. 13One muna kara nounzoni. One kwa fana ekuma lyere eli lya gaguka mufa; ngomu hanauka mohararasi. 14Ngomu haragana ngwendi kayiga kerova, vana bamagura momudona, pa hana nampili kakwangwa kokuzukisa mundiro ndi kokuvhetesa mema mediva.”
15Mupangeli Hompa, Karunga gokupongoka gwaIsraeli kuna kutantera mbunga asi: “Tengureni, mu huguvare mwange nawa‐nawa, makura ngomu nkondope tomu yoworoka.” Nye one muna nyoka! 16Makura yiyo muna kugazara kutjwayuka nonkore deni, mu ronde nonkambe domaguru unene. Hawe, monzira muna kara — kutjwayuka yiko ngaku kara po. One kuna kugazara asi nonkambe deni maguru unene, nye edi ngadi mu konka ado da pikatakana nye momaguru! 17Eyovhi pwaveni ngali duka pokumona mukwayita gumwe gonkore, ano vakwayita vatano ngava mu ninkisa mu duke namuvenye. Povakwayita veni nagumwe si ogu nga hupa po, sitji serembe selike ngasi hupa ko kondungu zondundu! 18Nye Hompa kuna kundindira a mu fire nkenda. Age ana liwapaikire kumuzaverera, morwa age nkenye apa kurugana eyi ya hungama. Verago vaava ava huguvara mwaHompa.
Karunga nga tungika vantu vendi
19One vantu ava mwa kara moJerusarema, kapi ngomu lira hena. Hompa kwa kara nezaverero, ano nsene mu kuga kwendi ekwafo, ta mu limburura. 20Hompa nga mu pitisa mo moyiruwo yoyidigu, nye mwene nga mu ronga, one kapi hena ngomu mu papara. 21Nsene mu zapuka monzira mu vyuke korulyo ndi korumoho, ngomu zuvha ezwi konyima zeni asi: “Nzira zezi. Zi kwameni.” 22Ngomu gusa vakarunga veni woyimpempa ava va gwaveka nosisiliveli nava va vambaika ngorodo, tomu va zugumine kwina ngwendi hando, oku tomu zigire asi: “Piteni kwi!” 23Nkenye apa ngo kuna mbuto zoge, Hompa nga zi rokesera mvhura zi kure, makura ngo kare nomuzangu gomunzi, ano yimuna yoge ngayi kara nomauliro gomanene. 24Nohove noyindongili eyi ayi purura mapya geni ngayi lya yireresozuni. 25Mezuva eli ngava kwata nohotepopero dononkore doge novantu vamo vana va dipaga, nomukuro domema ngadi konkomoka kwankenye ndundu nondundugona. 26Uzera wokwedi ngau fana wezuva, ano ezuva ngali zera pwarutano‐naruvali kupitakana pwanare, ngwendi uzera womazuva gatano‐nagavali. Nayinye eyi ngayi horoka apa nga manga Hompa oku ta verura yironda yombunga zendi.
Karunga nga futisa Asiliya
27Nonkondo nouyerere waHompa kuyimonena ure. Mundiro nomusi yiyo ayi likida ehandu lyendi. Age kuuyunga, ano nonkango dendi kutwera ngwendi mundiro. 28Age kutuma mpepo komeho zendi ngwendi ruhanzo oru aru yerura nayinye. Aro kukombera nomuhoko kezonauko, a haraganese po yigazo yawo yoyidona. 29Nye one vantu vaKarunga, ngomu hafa tomu dimbi, moomu omu yi rugana momasiku gosipito sokupongoka. Ngomu hafa ngwendi vava vana kugenda oku tava siki nonsiva va ze kontembeli zaHompa, mugameni gwaIsraeli.
30 Hompa nga ninka navenye va zuvhe ezwi lyendi lyosiuhompa oku tava mono kuwiza kwehandu lyendi. Ngapa kara mundiro gokutwera nakakunguru nakamanya nomvhura zondigu. 31Vaasiliya ngava kara nowoma apa ngava zuvha ezwi lyaHompa nokumona kuwiza kwehandu lyendi. 32Hompa apa nga va toonanga, mbunga zendi azo tazi gwana siruwo sokusika nongoma noyiumba. Karunga mwene yige nga rwisa Vaasiliya. 33Evega nare lya pwa kuliwapaika eli ngagu vevekera mundiro gomunene hompa gwaAsiliya. Alyo kwa li sima lya pita alyo enene, yiyo va li rundaika yitare.
Currently Selected:
JESAYA 30: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
