JESAYA 29
29
Sigwana saJerusarema
1Sizambero saKarunga, Jerusarema mwene, vana si pangura! Sitata esi nga tomeke Ndafita notenta dendi vana si pangura! Gwederereni ko mumvho komumvho nkwawo nokoyipito yago. 2Makura Karunga nga reta yimpagwa kositata esi ava tumbura asi “Sizambero saKarunga.” Mositata omo ngamu kara siliro nekwenauko. Ano sitata nasinye ngasi fana ngwendi sizambero vana kudumike honde. 3Karunga nga di sara sitata ta si umbilikida a mu sitikire mo. 4Jerusarema nga fana ngwendi mpepo zina kundundana zi uyungire konhi zevhu. Ezwi lyokusiva ngali tundilira mevhu.
5Jerusarema, vanayirongo navenye ava ava ku rwisa, ngava va pepura po ngwendi mbundu. Ano vakwayita vawo wokutjilisa, ngava rerauka ngwendi rwenge. Usimbu‐usimbu wa hana kuyindindira, 6Hompa gonombunga dovakwayita nga ku wizira nepiyagano lyemupepo lyokakundungu nemekankamo lyevhu. Age nga tuma hena maraka gomundiro aga aga twera taga rungwinisa. 7Ano vakwayita navenye wonomuhoko ava ava rwisa sitata sosizambero saKarunga noyirwiso yawo nayinye noyiruganeso — nkenye eyi ngayi haragana po ngwendi nzodi, ngwendi yuma eyi vana lifanekere masiku. 8Nomuhoko nadinye edi adi lipongaike tadi rwisa Jerusarema, ngadi fana ngwendi muntu zina kwata nzara ogu a roto asi age kuna kulya, nye eyi na pinduka haga fira nzara, ndi kwa fana ngwendi muntu ana kufa enota ogu ana kurota asi kuna kunwa mema, nye eyi na pinduka, muliu gwendi hagwa kukutira.
Esenso lyomarondoro
9Twikireni mu kare mavaya! Twikireni mu kare vatwiku! Korweni nampili kutupu vhinyu! Pundaukeni nampili kapi muna nu yuma! 10Hompa ana mu ninki mu fuse po, nye pepi?-?pepi muna kerere mu ponyokerere. Vaporofete yawo ngano meho gombunga, nye Karunga ana va ninki va kare vatwiku. 11Efatururo lyankenye emoneko lyomuporofete ngava li ku horeka. Alyo ngali fana ngwendi etjangwa eli va hota. Nsene o li gusa, makura o tware kogu ga yi diva kuresa, o mu hundire a ku resere mo, age ngano nga ku limburura asi: “Kapi tani yi vhuru, yeeyi kwa li hota.” 12Nye nsene ngano o li gava kogu ga dira kudiva kuresa, makura o mu hundire a ku resere mo, age ngano nga ku limburura asi: “Kapi nani diva asi ngapi omu nani resa mo.”
13 Hompa ta tanta asi: “Vantu ava kuuyunga asi awo kukerera nge, nye nonkango dawo kutupu mulyo, ano nomutjima dawo, ure name da kara. Ukereli wawo neisi kwa kara tupu panompangera dopasiuntu nopaupingwakoro, ou ava diworoka tupu. 14Ame tani ka monekesa simpe vantu ava yiruganatetukiso yina kulisikagura awo va hana kuyindindira. Ano vanongo tava ka kara magova novanandunge vawo ngava kara va hana sirugana.”
Endindiro lyokomeho
15Ano ava ava kambadara kuhoreka Hompa magazaro gawo, ngava va pangura! Awo kusikisa mo magazaro gawo mehoramo, makura tava gazara asi nagumwe si ana va mono a dive eyi vana kurugana. 16Nayinye awo kuyilipika. Eyi ya fumana po nani yinke, muhongi ndi erova? Muntu nani kuvhura si mu tantere esi ga honga asi: “Kapisi nyove wa honga nge ndi?” Ndi kuvhura si mu tantere asi: “Ove kapi wa diva eyi ono kurugana”?
17Sisewe simwe kuuyunga asi, kapisi siruwo sosire sina hupu ko musitu tagu kara epya, ano epya ngali kara hena musitu.
18Ezuva olyo apa ngali sika mo, sipurupuru ngasi vhura kuzuvha ko apa ngava resa buke nezwi lyenene, ano vatwiku ava va kara modovera, meho gawo ngaga mahuka, makura tava mono ko. 19Nohepere novantu wokulinunupika, ngava tengwira simpe mehafo eli nga va pa Hompa, Karunga Mupongoki gwaIsraeli. 20Eli yilyo ngali kara nye ehagero lyava ava hepeke vakwaawo nokusensa Karunga. Nkenye munanzo nga haga po. 21Karunga nga haraganesa po ava ava rundire vakwaawo, tava popere epanguro lyovanzoni, tava tanta yimpempa va limbike vahungami va tunde mousili.
22Ano nye Hompa Karunga gwaIsraeli ogu ga parwire Abirahamu moudigu kuna kuuyunga asi: “Vantu vange kapi ngava va swaura hena, ano yipara yawo kapi ngayi kara hena noruhodi rorunene. 23Apa ngo mona vanona ava ngani ku pa, yipo nye poopo ngo yi divira asi, nyame Karunga, Mupongoki gwaIsraeli. Ove ngo fumadeka nge, to kara nowoma name. 24Vantu wovagova ngava lironga tava yi kwata egano, nava navenye ava tanguna, ngava tambura erongo.”
Currently Selected:
JESAYA 29: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
