JESAYA 28
28
Erondoro lyokountungi wokoMuzogo
1Untungi waIsraeli vana u pangura! Efumano lyawo lina rembuka moomu da kara nonkata donombya konomutwe dovagendesi vawo wononkorwe. Nomutwe dawo dokundjangarara, kwa di gwaveka murora, nye wowo nye vana rara, unkorwe sa nomfa tupu. 2Hompa ga kara nagumwe gononkondo ga pama ga liwapikira kuvarwisa, gumwe ogu nga wiza ngwendi mvhura zakamanya, ngwendi mvhura zomudumbi, ngwendi mema gokukonkomoka goruhanzo rononkondo, oru ngaru kudumika sirongo. 3Malinenepeko govagendesi wononkorwe ngava ga lyatera konhi zonompadi. 4Efumano lyokurembuka lyowo vagendesi ngali dongonoka po ngwendi ekuzu lyoyipere, eli ava nyanga tava li sinene lina pi.
5Ezuva tali wiza apa nga kara Hompa Munankondo nadinye ngwendi nkata zouyerere zonombya kovantu vendi ava va hupa po. 6Age nga gava magano gouhunga kovapanguli, ta korangeda ava ava gamene marungavero gositata kehomono.
Jesaya novaporofete wononkorwe womoJuda
7Ano vaporofete novapristeli vana korwa kuna kupundauka. Awo kuna nu unene vhinyu noyikorwesa yononkondo, yiyo yina va vhundakanesa. Vaporofete vana korwa unene, kapi tava zuvhu ko mamoneko aga ga tuma Karunga. Ano vapristeli nawo vana korwa unene, tava pukisa kutokora nonkango edi vana va retere. 8Yitafura eyi vana hingire, nayinye kuna yi kudumike yirusi. Kutupu ko nampili evega limwe lina zere.
9Awo kupa nge usima pokutanta asi: “Mugara ogu omu ana kugazara asi yige ana kuronga? Ogu ana hepa nonkango dendi hena yilye? Yangesi kuna wapere tupu vakeke wokutova! 10Age kuna kukambadara kuturonga pandanda nopamukweyo nopasirongwa.”
11Nsene kapi nomu purakena dange, Karunga ngano nga ruganesa vanayirongo ava ngava uyunga eraka lyovanayirongo pokumuronga sirongwa. 12Age ta ka mu pwizumukisa nokumutendeka namuvenye, nye one muna nyoka. 13Karunga, yiyo nye nga mu rongera yooyo pandanda nopamukweyo nopasirongwa. One ngomu punduka nkenye ntambo ezi ngomu tampura. One ngava mu remeka tava mu lyatanga nokumutwara modorongo.
Emanya lyemekovhu lyaSiyoni
14Ano nye ntaantani vagara one wokulitumba omu pangere mbunga ezi moJerusarema, purakeneni Hompa omu ana kutanta. 15One kulikanganga asi mwa likwata ukwawo kumwe nonomfa, yiyo mwa lizuvha nosirongo sovafe. One kwa huguvara asi simpagwa nampili ngasi wize, ngomu paruka, yeeyi one kwa vanda moyimpempa nemekotokero asi ngapi mu yoworoka. 16Ntaantani Hompa gombunga zovakwayita kuna kutanta asi: “Ame ngani ninka etateko lyaSiyoni li pame tali korerere. Ame ngani tura mo emanya lya kora lyekovhu eli va tjanga nonkango edi asi: ‘Epuro eli lya kora kapi ngali kara hena nowoma.’ 17Uhungami yiwo ngau kara sihetekesongodi, ano uvyuki sihetekeso.”
Mvhura zakamanya ngazi rerura po yimpempa nayinye eyi wa huguvara. Ano ruhanzo, ngaru haraganesa po egameno lyoge. 18Epingido lyeni eli mwa lizuvha nonomfa ngava li zonagura po, nelizuvho lyeni nosirongo sovafe ngava li gusa po kosimpagwa apa ngasi sika ngasi mu sambanga. 19Aso ngasi ka mu sara nkenye apa, ngurangura nongurova. Udigu owo ngomu u simba ngorooro mutenya nomasiku. Nkenye mbudi zompe zaKarunga ngazi mu retera utjirwe woupe! 20One ngomu fana ngwendi muntu ogu va uyunga moyisewe, ogu ga kambadarere kurara pouro wousupi wokudira kuwapa kutandaveka, nonguwo zonunu zokudira kumugwaneka pokuzilikudumika. 21Hompa nga rwa moomu ga ninkire kondundu zaPerasimu nomomuramba gwaNgibiyoni, morwakusikisa mo eyi ga here kurugana — sirugana sendi nampili si dire kuzuvhika. Age nga sikisa mo sirugana sendi, sirugana sendi semehoramo.
22Mwa ha zora erondoro eli nina kumutantera! Nsene tomu yi rugana, ngayi mu digopera kuvanda. Ame nina zuvhu etokoro lyaHompa gonombunga dovakwayita lyokuharaganesa po sirongo nasinye.
Unongo waKarunga
23Purakeneni eyi nina kuuyunga, one mu pakere mbili eyi nina kumutantera. 24Kutupu ndimi ezi azi purura mapya gazo nkenye apa, nye zi dire kukuna. 25Ano nsene ta wapaike evhu, age kukuna mo nombuto doyitoveseso. Age kukuna hena mahangu noyilya monomukweyo dayo. Ano konontere domapya gendi ta kunu ko nombuto dapeke. 26Age ga diva kurugana yirugana yendi, yeeyi Karunga ga yi mu ronga. 27Age kapi a ruganesa nampili nakauke mpumo pokuhwaga nombuto doyitoveseso. Pevega lyompumo, age kuruganesa tupu mpango zokupepuka zina heteke. 28Age kapi a zonagura mahangu pokugahwaga, nye ga diva omu ava ga hwaga mokugendesa kontunda karukara ka hana kuharaganesa po mahangu. 29Unongo naunye ou, kwaHompa gonombunga dovakwayita au tundu. Magazaro gaKarunga kwa kara nounongo. Ago narunye kureta eragopo!
Currently Selected:
JESAYA 28: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
