JESAYA 26

Karunga nga pa mbunga zendi efundo

1Ezuva ngali wiza apa ngazi dimba mbunga mosirongo saJuda rusumo oru asi:

Sitata setu nonkondo!

Karunga mwene yige a popere

makuma gaso!

2Zegurureni marungavero gositata

mu sige muhoko gokulimburukwa

gu hwilire, muhoko govantu ava

ava rugana youhunga.

3Ove Hompa, gava mporazuni

kwava va kora mositambo sawo

yiyo va huguvara moge.

4Omu huguvare Hompa narunye;

age nga tu popera nkenye apa.

5Age kwa nunupika valinenepeki;

yiyo ga hanagura sitata

sononkondo omu va kere,

makuma gaso yiyo ga ga

rundumwina pevhu ga kare mbundu.

6Ava va hepekere, kwaso vana

kugenda ntaantani, kuna

kusilyatanga nonompadi dawo.

7 Hompa, ove kuwapeka nzira

zovantu wovawa;

nzira ezi ava gendi kwa hetakana.

8Ose tatu kwama eharo lyoge

oku tatu ku huguvara;

ove nyovelike twa tokomena.

9Masiku ame kukudiworoka

nomutjima gwange nagunye;

ano apa ngo pangura uzuni

novantu vamo,

navenye ngava lirongera mo

asi uhungami yinke.

10Vadinikarunga nampili o va fire nkenda,

kapi ava lirongo eyi ya hungama.

Nomosirongo si esi sovahungami,

awo kurugana udona;

awo kunyoka kudimburura

unene woge.

11Nonkore doge kapi da diva asi

ngo di pangura.

Hompa va fisa nomuga o va sige

va hepe;

siga li va hepeke efutiso

eli wa wapaika.

Va likida asi ngapi omu wa hara

vantu woge.

12Ove ngo tu pa erago, Hompa;

nayinye eyi atu kamba‐kamba

nyove o yi tu ruganene.

13 Hompa Karunga gwetu, vapeke

yiwo va kara vapangeli vetu,

nye ove nyovelike nyove Hompa gwetu.

14Ntaantani awo vafe, kapi ngava

kara hena nomwenyo;

vadimu vawo kapi ngava pinduka,

morwa ono va futisa

yiyo ono va hanagura po.

Nagumwe si nga va diworoka hena.

15 Hompa, nyove wa vhukisa

muhoko gwetu,

sirongo setu wa nenepeka

konombinga nadinye,

makura yiyo ya ku retera efumano.

16Ove kwa futisa mbunga zoge,

Hompa, ano mompatakani

yiyo va ku kanderera.

17 Hompa, nyove wa tu ninka

tu takume,

moomu a takuma mukadi

gokoruzega morwakukora.

18Ose kwa kere mokukora nomoutjirwe,

nye nayimwe si eyi twa hampuruka.

19Wombunga zetu ava va fa

ngava kara hena nomwenyo!

Marutu gawo ngaga tengwira

hena mwenyo.

Navenye ava vana rara

monontoko dawo,

ngava pinduka tava dimbi dehafo.

Moomu ali wapeke evembero

lyeme uzuni,

naHompa nage yimo nga

mwenyopeka ava va fa nare.

Epanguro newapukururo

20Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga. 21Hompa kuna kutunda mouhingiro wendi meguru a ya futise vantu vepevhu kononzo dawo. Varudipagi ava va zonene mokahore‐hore apa pevhu, ngava horoka poruzera, ano evhu kapi ngali pungura hena ava va dipaga.

Currently Selected:

JESAYA 26: KWN

Highlight

Compare

Copy