JESAYA 25

Rusumo rwehamberero

1 Hompa, ove Karunga gwange;

ame kuna hara ni ku fumadeke

nokuhamberera edina lyoge.

Ove kwa rugana yininke yoyitetu.

Matumbwidiro goge ganare

ono ga sikisa mo.

2Yitata ono yi situnukisa

nondambo dohando,

yiyo ono hanagura po

makumapopero gayo,

nombara edi da dikire nonkore detu

dina dongonoka po dogoro narunye.

3Vantu womonomuhoko

dononkondo ngava ku fumadeka;

ngava ku tjira moyitata

yonomuhoko edi da runda mutwe.

4Nohepwe nava va hana ekwafo

koge va dukira,

yiyo va yoworoka posiruwo somaudigu.

Ono va horeke kekundungu

ono kara mundwire gwawo

koupyu wokutwera.

Vagara wokurunda mutwe kurwa

ngwendi ekundungu lyopokufu

5ngwendi ukukutu womosirongo somburundu.

Nye ove, Hompa, ono mweneke

nonkore detu;

ono mweneke ekugagano lyovagara

va runda mutwe moomu

ali tendeke eremo ezuva lyoupyu.

Karunga ta wapaike sipito

6Apa pondundu zaSiyoni Hompa nga wapaikira po nomuhoko nadinye sipito — sipito sonondyazuni novhinyuzuni. 7Pondundu ezi yipo nga gusira ko eremo lyoruhodi eli lya kudumika nomuhoko nadinye. 8Hompa Mupangeli nga hanagura po nomfa dogoro narunye! Navenye ngava kokota mahodi, ta gusa po eswau eli va kara nalyo vantu vendi mouzuni mudima. Hompa mwene yige ga yi uyunga eyi!

9Apa ngayi horaka eyi, nkenye ogu nga tanta asi: “Age yige Karunga gwetu! Ose kwa huguvarere mwendi, makura age yiyo ga tu yoworora. Age yige Hompa! Ose kwa mu huguvarere, makura ntaantani tuna ragopa tuna hafa, morwa ga tu parura.”

Karunga nga futisa Mowaba

10 Hompa nga popera ndundu zaSiyoni, nye Vamowaba ngava va myona moomu ava myona rwenge ru kare ruhoho. 11Awo ngava gonona mawoko gawo ngwendi vava asi tava hara kuzoga, nye Karunga nga va nunupika, ano mawoko gawo ngaga dama ga hana sikwafo. 12Age nga zungurura nohotepopero daMowaba, nomakuma gado gomare ta ga gandanga ga kare mbundu.

Currently Selected:

JESAYA 25: KWN

Highlight

Compare

Copy