JESAYA 24
24
Hompa nga futisa uzuni
1 Hompa nga hanagura uzuni, tau kara ngorooro. Nga pirura ntunda zevhu, ano vako ta va haraganesa. 2Navenye ngava gwana sigwana simwe tupu — vapristeli novantuuntu, vapika nohekurwa, varandi novarandesi, vagavimakongo novagusimakongo, vanangawo novahepwe. 3Evhu ngali zera tooto erunda ngali kara. Hompa ana yi tanta, ano ayo yiyo kukara po.
4Evhu ngali kukuta tali suwu; uzuni mudima tau pili nonkondo; nayinye nevhu neguru tayi tengura monyima. 5Vantu va nyateka uzuni pokutaguruka noveta daKarunga nopokuteza egwanekero eli ga pakere po lyokukarerera. 6Hompa ana divisa efingo kevhu. Vantu tava futu eyi va liruganena. Wovanunu‐nunu tupu wokuparuka. 7Mandjembere govhinyu kuna kusuva, vhinyu kuna kupwira. Ano ava ava ga hafere vana guwu. 8Ehafo lyawo lyomarusumo goyiumba nonongoma, lina haga po. 9Kutupu ko hena ehafo lyokudimba pokunwa vhinyu, nagumwe si ogu zina kuhafesa ko utovara wazo. 10Mositata nkenye esi kuna piyagana, vantu kuna kulipaterera mononzugo dawo va paruke. 11Vantu kuna kukugagana mononzira doyitata, yeeyi vhinyu kapi zina kumoneka hena. Ehafo lina hagere po, vana li gusa mo mosirongo. 12Sitata kuna kara mapuku. Ano marungavero gaso, kuna ga tezagura po. 13Yangesi yiyo ngayi horokera nkenye muhoko mouzuni naunye. Ayo ngayi fana ngwendi ehagero lyetezo, apa ngava zuguma nonzwe kwankenye sitji, ano mandjembere gokuhupa ko ngava ga nyange ko va ga kame.
14Ava ngava kara nomwenyo ngava dimba nehafo. Ano ava va tunga korwaUtokero ngava sanseka unene waHompa 15nava wokorwaUpumezuva ngava hamberera Hompa. Vantu ava va tunga konontere defuta ngava fumadeka Hompa Karunga gwaIsraeli. 16Kutundilira koure‐ure komaruha gouzuni ngatu zuvha nonsumo dehamberero daIsraeli, muhoko gwa hungama.
Kutupu ko hena endindiro lyange! Ame kuna yeura nge! Vahokoli kuna kutwikira kuhokora, ano ehokoro lyawo lina ruru unene. 17Nkenye ogu a purakene nge! Etjiliso lyenene nomakero noyiraha kuna mu ndindire. 18Nkenye ogu nga kambadara asi a vande etjiliso eli lyenene nga gwira mekero. Ano ogu nga kambadara asi a tunde mekero, ngasi mu kwata siraha, yeeyi mvhura zondigu ngazi tunda meguru zi tjupute nomatateko gevhu ngaga linyunganga. 19Evhu ngali tenda nomufa tali gagauka‐gagauka tali zahama. 20Evhu ngali nengauka?-?nengauka ngwendi muntu gonkorwe, tali rerauka ngwendi ndunda mokakundungu. Uzuni kwa u remenena nonzo. Awo ngau rundumuka po, kapi ngau yambuka po hena nampili nakauke.
21Ezuva olyo, Hompa nga handukira mbunga zovakwayita vekeguru novapangeli vepevhu. 22Karunga nga pongeka vapangeli ngwendi vanadorongo vana kara mekero. Age nga va zedilira modorongo dogoro ruveze rwawo rokuvapangura taru siki mo. 23Kwedi ngaku sovagana nezuva kapi ngali minikira hena, yeeyi Hompa gombunga zovakwayita, yige nga kara mupangeli. Age nga pangera moJerusarema kondundu zaSiyoni. Ano vagendesi wombunga zendi ngava mona efumano lyendi.
Currently Selected:
JESAYA 24: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
